Vă jê̆ 20 sơnăm iŏk yua dôm kon jên tŏk iŏk đơ̆ng anih mong jên tơgŭm tơpôl, yă Nguyễn Thị Tín, oei tơ̆ thôn 3, xăh Hòa Lễ, apŭng hơtăih hơtŏ Krông Bông, dêh char Dak Lak hlôh tôch kơ rơđăh tơdrong kăp gĭt đơ̆ng jên âu yua gơnang đơ̆ng noh mă ŭnh hnam sư hlôi tŏk klăih đơ̆ng dơnuh hin, sơđơ̆ng tơdrong arih sa. Yă Nguyễn Thị Tín tơroi: sơnăm 2005, ‘moi kiơ̆ Khŭl vei lăng linh so xăh, sư đei tŏk iŏk jên tơgŭm vă rong rơmo păng vei lăng ‘long cheh phe. Gơnang đơ̆ng chu mơ mat jang sa, chă mong pơđom, ŭnh hnam dar deh pơih să tơdrong jang vei rong kon tơrong, răt dơ̆ng chŭn na ƀa đak. Đunh kơ âu 3 sơnăm, ŭnh hnam sư hlôi klăih đơ̆ng dơnuh hin păng kla đĭ kơ sô̆ jên tŏk iŏk hơdrol ‘noh. Yă Nguyễn Thị Tín tơbăt, ŭnh hnam tŏk iŏk dơ̆ng 40 triệu hlak jên ‘măn ăn ŭnh hnam ‘nao klăih đơ̆ng dơnuh hin vă hơtŏk tơiung mŭk drăm hloh dơ̆ng: “Hăm jên âu tôch kơ ‘lơ̆ng hăm dôm ŭnh hnam tŏk iŏk, dôm ŭnh hnam mơmat tat. Nhen ƀơ̆t blŭng a ĭnh kŭm gơnang đơ̆ng jên đơ̆ng Anih mong jên tơgŭm mă ŭnh hnam hơtŏk tơiung mŭk drăm, đơ̆ng noh mă pơm tơdrong hiôk ăn kơ đe kon hŏk truh trong. Ĭnh kŭm ‘meh tŏk iŏk hơtŏk jên vă vei rong thim kon tơrong, pơih să vei rong kon tơrong vă hơtŏk tơiung mŭk drăm ăn ŭnh hnam đei sơđơ̆ng hloh dơ̆ng.”

Jĭ 1 lơ̆m dôm anih jang pơjao ăn jên tŏk iŏk hăm Anih mong jên tơgŭm tơpôl tơ̆ apŭng Krông Bông, Khŭl vei lăng lĭnh so xăh Hòa Lễ tŏk bŏk đei 5 grŭp ‘mơ ‘met păng tŏk iŏk jên, akŏp rơkăh hre vă jê̆ 14 ti hlak jên. Ƀok Thiều Đình Long, Kơdră Khŭl vei lăng lĭnh so xăh Hòa Lễ tơbăt, đei lơ tơdrong jang asong tŏk iŏk jên tơgŭm nhen: asong tŏk iŏk jên hăm ŭnh hnam dơnuh hin, vă jê̆ dơnuh hin păng ŭnh hnam ‘nao klăih đơ̆ng dơnuh hin; asong tŏk iŏk jên tơchă ăn tơdrong jang păng năm jang tơ̆ teh đak đe; ăn tŏk iŏk tơdrong jang đak rơgoh păng pơm rơgoh cham char tơring tơrang... tơgŭm kon pơlei ƀônh kơ tŏk iŏk. Khŭl vei lăng jang hơdai hăm anih mong jên hơnơ̆ng hơlen lăng dăr lăng pơtho vă kơ dôm ŭnh hnam iŏk yua jên tŏk iŏk ƀlep tơdrong: “Dôm khŭl jang tơ̆ âu ‘noh tô trơng ‘noh kơdră khŭl. Mưh hôp âu to ‘noh đe sư đa tơroi truh tơdrong tŏk iŏk jên. Kon pơlei tơ̆ âu đei lơ bơngai kŭm tôch hlôh vao găh tơdrong jang anih mong jên tơgŭm tơpôl, tơdrong jang rim năr kơ đe sư, đe sư tŏk iŏk jên cheh, kla jên cheh đang kơ ‘noh nôp ‘mơ ‘met đe sư kŭm băt păng tơdrong pơm kiơ̆ kla jên cheh rim khei đe  kŭm  tôch kơ ‘lơ̆ng. Tŏk iŏk jên tơ̆ âu ‘noh kon pơlei akŏm lơ̆m jang sa, rong rơmo yŏng dăh mă răt chŭn teh, răt phŏng vă hơtŏk tơiung mŭk drăm ŭnh hnam.”

Kiơ̆ kơ ƀok Nguyễn Xuân Điền, Kơdră vei lăng Anih mong jên tơgŭm tơpôl apŭng Krông Bông, vă kon pơlei ƀônh gơh tŏk iŏk jên tơgŭm, hơdai hăm tơdrong hơmet ming trong jang tŏk iŏk jên, rim khei anih jang pơgơ̆r 14 ‘măng chă pơm hla ar tŏk iŏk tơ̆ rim xăh, thị trấn. Gơnang đơ̆ng noh mă khei ‘năr âu ki, hloh 58.700 ŭnh hnam tơ̆ apŭng Krông Bông hlôi đei tŏk iŏk kiơ̆ 14 tơdrong jang asong tŏk iŏk jên, akŏp rơkăh hre hloh 532 ti hlak jên. Ƀok Nguyễn Xuân Điền kŭm akhan thoi âu, vă hơtŏk đei yua jên ‘noh hơnăp jang đơ̆ng dôm anih pơ jao ăn  hơnăp jang, dôm grŭp ‘mơ ‘met - tŏk iŏk jên ‘noh tôch kơ gĭt kăl. ‘Nâu jĭ bơngai jang tơgŭm kơ anih mong jên truh tơ̆ dôm tơring hơtăh hơtŏ, tơring mơmat tat, tơgop tang găn tơdrong chă tŏk iŏk jên đơ̆ng ‘ngoăih hăm jên cheh lơ: “Rim sơnăm ‘noh anih asong tŏk iŏk jên ‘noh tă kơ pơgơ̆r pơhrăm ăn dôm anih pơ jao ăn hơnăp jang nhen dôm khŭl tơ̆ xăh, tô trơng grŭp mơ ‘met, tŏk iŏk jên, Khŭl vei lăng kơdih dôm pơlei. ‘Noh kiơ̆ đơ̆ng âu kŭm jing 1 tơdrong tơroi tơbăt vă kơ kon pơlei băt đei asong tŏk iŏk jên tơgŭm păng hlôh vă gơh băt, bơ̆jang kiơ̆. Hla ar hô sơ ‘noh tă kơ đei asong đĕch ngăl, kơna kon pơlei kŭm gơh pơm tôch kơ ƀônh, kơna tơdrong chă tŏk iŏk jên đe tơ̆ ‘ngoăih lơ̆m apŭng ‘noh ưh pă đei dơ̆ng bơih.”

Lơ̆m dêh char Dak Lak, sơnăm 2022, anih mong jên tơgŭm tơpôl hlôi tơlĕch jên ăn hloh 51.800 ŭnh hnam tŏk iŏk jên, akŏp kơsô̆ ăn tŏk iŏk vă jê̆ 2.000 ti hlak jên. Dôm jên tơgŭm ăn ŭnh hnam dơnuh hin, ŭnh hnam vă jê̆ dơnuh hin, ŭnh hnam năm jang hơtăih vih tơ̆ tơring tŏk iŏk vă hơtŏk tơiung mŭk drăm ŭnh hnam, sơđơ̆ng tơdrong arih sa. Jên âu pơm lăp hăm ‘meh vă tŏk iŏk jên đơ̆ng dôm ŭnh hnam, akŏm lơ̆m dôm dôm xăh hơtăih hơtŏ, tơgop ‘lơ̆ng lơ̆m tơdrong jang tơ jur dơnuh hin păng hơtŏk tơiung mŭk drăm - tơpôl tơring.