VOV4.Bahnar - Đơ̆ng rŏng khei ‘năr đunh athei pơ dơh ‘mơ̆i bơ̆ jang yua đơ̆ng ƀơm ưh kơ ‘lơ̆ng đơ̆ng jĭ Covid-19, dang ei dôm anih jang mơ dro sa tơ mang lăng tơ̆ Dak Lak hlôi pơ̆ih ‘măng vă dar deh tơ iung ming bơ̆ jang. Kŭm hăm hơ met ming dôm tơ mam đei dang ei, lơ anih jang tŏk bŏk tơ chă trong hơ tŏk tơ iung  dơ̆ng dôm tơ mam ‘nao vă pơ trŭt tơ mang lăng tơ̆ tơ ring.

        Đơ̆ng rŏng vă jê̆ 8 khei athei pơ dơh lê̆ tơ drong jang yua đơ̆ng ƀơm kơ nê̆ đơ̆ng jĭ hơ buh, đơ̆ng năr tết nguyên đán truh dang ei, hơ nih tơ mang lăng bri brăh tơ pôl Ko Tam tơ̆ pơ lei tơm Buôn Ma Thuột, dêh char Dak Lak hlôi pơ̆ih ‘măng hơ lơ̆k dơ̆ng pơ vih pơ văn ăn tơ moi tơ mang lăng. Hơ drol ‘noh, mă đơ̆ng pơ dơh sơng tơ moi prăt 8 khei anih jang mơ dro sa oei kla jên khei ăn kơ 20 ‘nu bơ ngai jang vei lăng pơ kao păng ‘long pơ rŏ, vei lăng mŭk drăm, vei lăng păng pơm hơ tŏk ‘lơ̆ng dôm homestay. Iŏk đơ̆ng pơ̆ih ‘măng sơng tơ moi hơ lơ̆k dơ̆ng, kŭm hăm dôm tơ drong jang đei đơ̆ng hơ drol, anih jang hơ nơ̆ng tơ lĕch 1,2 tơ mam ‘nao, tơ lĕch dôm tơ drong tơ mang lăng vă kơ băt păng pơ vih pơ văn kiơ̆ meh vă đơ̆ng tơ moi tơ mang lăng. Hơ dai hăm jang kiơ̆ ‘lơ̆ng dôm trong jang vei sơ đơ̆ng lơ̆m tơ drong jĭ hơ buh. Yă Nguyễn Thị Ngọc Anh, kơ dră jơ nŭm vei lăng Kŏng ti tơ mang lăng bri brăh tơ pôl Ko Tam tơ băt:

        Ko Tam ‘noh đei lơ tơ drong vă kơ băt vei rong, choh pơ tăm, cheh phe, rong ka, glơi, pơ ma atŭm ‘noh lơ tơ mam vă kơ băt. Tơ drong vă kơ băt joh ayŏ sơ năm ‘nâu nhôn tơ lĕch jang ưh kơ et tơ drô ge, lăp tôn chĭng chêng păng hơ soang rim grŭp, ưh kơ akŏm. Dôm tơ drong vă kơ băt đơ̆ng nhôn kiơ̆ ‘meh vă đơ̆ng tơ moi, kăl vă kơ băt kiơ ‘noh nhôn gô hơ met ăn vă kơ băt ‘noh, mă lei athei đei khei ‘năr hơ met ăn, roi hơ drol păng hơ met ăn nhôn ưh kơ tơ lĕch lơ.

Prăt khei ‘năr pơ dơh bơ̆ jang, dôm anih jang tơ mang lăng oei hơ drin pơm hơ met tơ mam tơ mang lăng

        Kŭm yak truh dôm tơ mam ‘nao vă sơng đei tơ moi tơ mang lăng, Kŏng ti tơ mơ̆t jên jang păng mơ dro sa Đam San tơ̆ pơ lei tơm Buôn Ma Thuột ‘noh rơ̆ih dôm tơ drong jang tơ mang lăng rơ goh vă hơ tŏk tơ iung. Ƀok Lê Hoàng Cơ, Kơ dră dơ nơm Kŏng ti tơ băt, đơ̆ng dôm tơ drong đei kơ dih păng tơ drong pha ra băl găh hơ nih, teh, anih jang tŏk bŏk pơ jing păng yak truh tơ mang lăng choh jang sa, tơ mang lăng pơ dơh pơ dơi hăm hơ nih hiôk rơ hơi, vă kơ băt hai vei lăng jơ hngơ̆m jăn hai. Hơ dai hăm ‘noh, kŏng ti jang hơ dai hăm dôm anih jang kơ dêh char Dak Nông, Khánh Hòa vă jang hơ dai dôm tour tơ mang lăng nhen chă năm lăng kơ dơ chŭn ƀa, hum trôk, pơ dơh pơ dơi. Ƀok Lê Hoàng Cơ pơ ma hơ dăh:

        Anih jang mơ dro sa tŏk bŏk yak mơ̆t lơ̆m tơ mang lăng hơ tŏk tơ iung rơ goh păng mă loi ‘noh hơ tŏk tơ iung tơ mang lăng choh jang sa păng tơ ƀôh ăn tơ moi truh tơ̆ âu ‘noh tơ moi ƀĭch pơ dơh ngôi. Dang ei tơ mam drăm tơ gŭm tôch kơ lơ, pơ tih gia nhen dôm pơ gar să tơ̆ âu tôch kơ lơ păng lơ̆m khei ‘năr âu ƀlep khei ‘năr mă sư tôch kơ hiôk lơ̆m  pơ yan pơ jing păng pơ trŭt tơ mam cheh phe, bơ̆n vă ba tơ moi truh tơ̆ dôm pơ gar cheh phe vă chă hơ len lăng jrŭ hloh găh cheh phe păng kŭm jing hơ nih vă kơ đei hơ yuh hiôk vă gơh ƀĭch pơ dơh ngôi păng gơ̆h hiôk. Đam San tŏk bŏk tơ goăt đơ̆ng Dak Nông yua kơ Đam San tŏk bŏk lăng truh Buôn Chóa, apŭng Krông Nô jĭ tơ ring ƀa lơ̆m tơ ring nham thạch bazan ‘noh đei tơ drong pha ra pơ têng hăm tơ ring teh tơ măn păng lơ tơ ring nai.

Tơ gĕch yua tơ drong ‘lơ̆ng găh cham char, joh ayŏ vă hơ tŏk tơ iung tơ mang lăng vă kơ băt kiơ̆ ‘meh vă đơ̆ng tơ moi tơ mang lăng

         Kiơ̆ chih jô̆ đơ̆ng Anih vei lăng găh joh ayŏ - tơ plŏng kơ dâu păng tơ mang lăng Dak Lak, lơ̆m năr tết nguyên đán âu ki hlôi đei dang 144 rơ bâu ‘nu tơ moi truh tơ̆ Dak Lak năm tơ mang lăng, ngôi pơ chơt păng vă kơ băt tơ̆ vă đĭ đăng 21 hơ nih tơ mang lăng, tŏk hloh 1 puăt pơ têng hăm khei ‘nâu sơ năm sơ̆. Kiơ̆ kơ yă Nguyễn Thụy Phương Hiếu, Phŏ kơ dră vei lăng găh joh ayŏ - tơ plŏng kơ dâu păng tơ mang lăng dêh char Dak Lak, ‘nâu jĭ ƀôh tôch kơ chhôk hơ iă yua kơ hloh 2 sơ năm âu ki, anih jang tơ mang lăng hlôi athei pŭ lơ tơ drong ƀơm ưh kơ ‘lơ̆ng pơm ăn iŏk yua păng bơ̆ jang tơ ƀơ̆p lơ mơ mat tat.

Dak Lak đei lơ hơ nih chă lăng ‘lơ̆ng, să vă hơ tŏk tơ iung tơ mang lăng

         Kŭm kiơ̆ kơ yă Hiếu, dang ei, anih tơ mang lăng tŏk bŏk dar deh đei dôm hơ yak tơ iung ming, hơ tŏk tơ goăt hơ dai, jang hơ dai hăm dôm tơ ring vang hơ tŏk tơ iung tơ mang lăng, hơ dai hăm ‘noh chă pơm ‘nao kơ dih dôm tơ mam tơ mang lăng kơ tơ ring vă sơng đei tơ moi tơ mang lăng. Hơ dai hăm tơ drong hơ len lăng tơ drong jang vei sơ đơ̆ng tang găn jĭ tơ̆ dôm anih tơ mang lăng, anih jang tơ mang lăng tŏk bŏk hơ drin tơ goăt, chă tĕch dôm tơ mam tơ mang lăng ‘lơ̆ng đei pơ jing đơ̆ng dôm tơ drong pran kơ tơ ring.

        Pơ gơ̆r tơ drong dăr hơ len, pơ jing dôm tơ mang lăng ‘nao, dơ ving tơ̆ 4 apŭng mă lĕch trŭh hloi tơ ring sơ lam ăn dôm anih jang mơ dro sa. Lơ̆m khei ‘năr âu gô vang jang hăm dôm tơ ring pơ jing dôm tơ mam tơ mang lăng ‘nao. ‘Nao âu dơ̆ng ‘noh nhôn đei dăr hơ len pơ jing tơ mam tơ̆ pơ lei tơm Buôn Ma Thuột ƀơm truh tơ mam cheh phe, vă đơ̆ng noh lơ̆m khei ‘năr jĭ ‘noh mơ̆ng kiơ̆ tơ drong thoi yơ gô pơ gơ̆r vă ăn kơ dôm anih jang mơ dro ling lang đei tơ mam ‘nao kŭm nhen pơm ‘nao tơ mam đơ̆ng dôm bơ ngai jang mơ dro sa tơ̆ anih jang mơ dro sa.

Tơ mang lăng choh jang sa jĭ trong hơ tŏk tơ iung đei anih jang tơ mang lăng tơ̆ Dak Lak rơ̆ih iŏk vă sơng đei tơ roi tơ mang lăng

        Đơ̆ng rŏng dăr hơ len păng pơ jing, 1,2 tơ mam nhen tour “Famtrip Caraval - Tây Nguyên huyền thoại”, Tơ drong joh hơ ri pơm tông “Khát vọng Đam San”, dôm tơ drong jang joh ayŏ - kơ dŏ soang - tơ plŏng kơ dâu lơ̆m teh đak đei pơ gơ̆r tơ̆ Dak Lak đei hơ mĕng gô jing 1 lơ̆m dôm tơ drong hơ iă vă tơ iung ming păng hơ tŏk tơ iung tơ mang lăng tơ̆ dêh char. Mă loi ‘noh, hăm tơ drong pơ̆ih ‘măng tơ mang lăng apŭng plĕnh teh tŏk bŏk đei tơ lĕch jang hrei ‘nâu, Dak Lak hơ mĕng tơ drong jang tơ mang lăng gô ƀrư̆ ƀrư̆ tơ iung ming păng kĕ iŏk jang đei yua dôm tơ mam, tơ drong ‘lơ̆ng đei đơ̆ng hơ drol, yak truh tơ drong hơ găt sơng hloh 900 rơ bâu ‘nu tơ moi truh tơ̆ Dak Lak lơ̆m sơ năm ‘nâu.

H’Xíu H’mốc: Chih

Thuem: Tơ blơ̆