Ŭnh hnam găh dơnuh hin, ưh kơ măh teh choh jang sa, klo lôch đunh kơ âu 3 sơnăm yua đơ̆ng jĭ jăn, mŏ H Rung Mlô (mĕ Trâm) oei tơ̆ plei Ea Kjoh A, xăh Ea Drông, thị xã Buôn Hồ athei mĭnh drô̆ kơ rŭn pŭ rong 2 ‘nu kon tŏk bŏk sơnăm năm hŏk. Tơ̆ hơnăp tơdrong arih mơmat tat ‘noh, mŏ hlôi đei tơgŭm 1 pôm rơ mo yŏng păng 2 tŏ pơ be yŏng vă rong. Hơdai hăm ‘noh, ‘moi kiơ̆ tơdrong jang “Hơdrin đơ̆ng kơ dih” mŏ đei pơtho ki thuơ̆t vei lăng vă kon tơ rong tih vơ̆ ‘lơ̆ng: Ĭnh đei tơgŭm rong rơmo păng pơ be kiơ̆ ŭnh hnam dơnuh hin, tơdrong arih sa mơmat tat dêh, ưh kơ đei trong hơ yơ vă hơtŏk tơiung mŭk drăm. ‘Noh kŭm hơ mĕng jĭ đei jơ hngơ̆m pran vă jang sa, hơ tŏk tơiung rong kon tơ rong vă đei tơdrong hiôk vei lăng ăn kon hơ ‘lơ̆p hŏk jing bơngai.

“Hơdrin đơ̆ng kơ dih” jĭ tơdrong jang yua đơ̆ng anih jang ‘mêm mơ nat tơ jră dơnuh hin jơ̆p plei teh păng dŏng tơ gŭm hăt hot (CARE apŭng plĕnh teh) tơ̆ Việt Nam jang hơdai hăm Anih hơ tŏk tơiung tơpôl păng dôm anih jang tơgŭm tŏk bŏk tơlĕch jang tơ̆ Dak Lak. Kiơ̆ kơ ‘noh, lơ̆m 2 sơnăm 2023-2024, tơdrong jang yak truh tơdrong pơ trŭt hơtŏk tơiung jang sa ăn ŭnh hnam jang chŭn mir, mă loi ‘noh jĭ drŏ kăn kon kông tơ̆ 2 xăh Ea Drông păng Cư Bao, thị xã Buôn Hồ. Kiơ̆ kơ yă Vũ Lan Hương, vei lăng tơdrong jang kơ anih jang CARE apŭng plĕnh teh tơ̆ Việt Nam, tơdrong jang gô yak hơdai kơ tă hăm dang 4.000 ‘nu kon pơ lei kiơ̆ trong pơtho jang hloi, đơ̆ng trong pơm hơdrong, pơm tơmam hrĕm, tang găn jĭ ăn kon tơ rong; truh dôm tơdrong iŏk, tơlĕch, ‘mơ ‘met jên răt yua. Pơ tho pơ jing păng pơ vei dôm tơdrong jang ‘mơ ‘met, hơvơn jên tơpôl vă pơm jên tŏk iŏk ăn kon pơlei. Pơ gơ̆r dôm tơdrong jang tơƀơ̆p, pơma dơnuh hăm dôm anih răt iŏk, pơm tơlĕch ‘lơ̆ng vă hơtŏk ‘lơ̆ng kơ jă tơmam. Hơtăih hloh dơ̆ng ‘noh jĭ yak truh pơ jing dôm tơmam OCOP. Yă Vũ Lan Hương tơbăt, lơ̆m 2 sơnăm, tơdrong jang tơlĕch ăn tơdrong tơm tơgop tơplih ‘lơ̆ng tơdrong arih sa ăn kơ dang 15.000 ‘nu păng lăng să kơ jă lơ hloh ăn tơ pôl, hăm bơngai tơgŭm hơdrol ‘noh jĭ drŏ kăn kon kông: Lơ̆m tơdrong jang ‘noh nhôn gô đei 3 tơdrong jang tơm, mă blŭng ‘noh dôm tơdrong jang ƀơm truh hơtŏk ‘lơ̆ng tơdrong jang găh hơ tŏk tơiung tơdrong jang sa, đei hloi dôm tơdrong ƀơm truh ki thuơ̆t pơm tơlĕch, choh pơ tăm, vei rong kon tơrong. Tơgŭm vă kơ kon pơlei gơh hơtŏk ‘lơ̆ng tơdrong băt vao ƀơm truh vei lăng jên hu păng iŏk yua dôm kon jên jang vă pơyua ăn tơdrong pơm tơlĕch đơ̆ng đe sư. Păng tơdrong tôch kơ gĭt kăl vă gơh hơtŏk tơiung tơdrong jang kơ jăp, ‘noh jĭ athei gơh băt hăm anih tĕch mơdro, athei tĕch đei tơmam păng 3 tơdrong jang ‘noh gô jing dôm tơdrong jang hơdai kŭm hăm tơ pôl vă pơm liơ hơtŏk loi dơ̆ng đei tơdrong jang hơdai đơ̆ng dôm bơngai jang lơ̆m tơ pôl păng pơ trŭt nơ̆r pơ ma păng hơnăp jang đơ̆ng drŏ kăn ‘lơ̆ng hloh lơ̆m đĭ đăng tơdrong đơ̆ng pơm tơlĕch truh tĕch tơmam.

Cư Bao păng Ea Drông jĭ 2 xăh jang chŭn mir ngăl, hăm hloh 80% kơ sô̆ kon pơlei ‘noh bơngai kon kông, tơdrong arih sa kơ kon pơlei oei tôch kơ mơ mat tat. Ƀok Võ Văn Sự, Kơdră anih jang mŭk drăm thị xã Buôn Hồ tơbăt, kiơ̆ đơ̆ng hơlen lăng ăn ƀôh 2 xăh đei lơ tơdrong hiôk vă rong rơmo păng pơ be. Yua thoi noh, tơdrong tơlĕch jang tơdrong jang đei hơmĕng pơih ăn tơdrong hiôk vă kon pơlei hơtŏk tơiung mŭk drăm đei yua hloh: Tơdrong tŏ ‘mi kial tơ̆ Buôn Hồ pơma atŭm păng 2 xăh âu pơma hơdrô̆ tôch kơ hiôk vă hơtŏk tơ iung 2 kơ loăi kon tơrong âu, mă loi ‘noh jĭ tơmam pơ be hrei ‘nâu kơ jă tĕch sư kŭm tôch kơ ‘lơ̆ng, anih tĕch ‘noh sơđơ̆ng. Kơna tơlĕch jang tơdrong jang ‘nâu ‘noh lăp hăm 2 xăh ‘nâu. Lui ngeh akhan blŭng a ‘noh gô tơplih đon hlôh vao găh tơdrong jang vei rong kon tơ rong đơ̆ng kon pơlei kon kông, tơ gop sut pơ ngot tơ jur dơnuh hin, hơtŏk ‘lơ̆ng tơdrong arih sa kơ kon pơlei. Păng đơ̆ng tơdrong jang ‘nâu lang să tơ̆ tơpôl lơ hloh.