Bơ̆ jang lơ̆m anih jang pơgang đơ̆ng sơnăm 2014, mă đơ̆ng tơ̆ pơlei tơm Hồ Chí Minh dăh mă ƀrŏk tơ̆ Dak Lak, bơngai tơdăm Y Pốt Niê oei ling lang ƀlŏk hăm ƀâu phu cheh phe chă hơdrĕng kơ dih đơ̆ng ŭnh hnam. Khei 8 sơnăm 2019, Y Pốt pơdơh kơ jang pơgang, tơiung tơdrong jang sa hăm cheh phe. Sư pơjing Kŏng ti Ê đê Cafe păng đei Anih vei lăng tơdrong gơh hơgei chih hơnăn jang hơdrô đĕch. Đơ̆ng rŏng 3 sơnăm pơjing, hơnăn “Ê đê Cafe” đei anih tĕch mơdro lơ̆m păng ‘ngoăih teh đak sơng iŏk; đei khŭl kơdră tơring drơ̆ng ăn tơmam OCOP 4 hơnglŏng. Roi tơblang găh hơnăn Kŏng ti ‘noh Ê đê Cafe, Y Pốt Niê tơbăt:

“Tơroi găh bơngai Ê đê nhôn ‘noh hui đĕch bơngai Ê đê jang tĕch mơdro, ĭnh ‘meh ‘noh jĭ bơngai iung jang hơdrol găh tĕch mơdro, mă 2 dơ̆ng ‘noh jĭ hơnhăk truh tơdrong ƀơm ‘lơ̆ng đơ̆ng bơngai Ê đê, ‘meh tơƀôh hơdăh bơngai  Ê đê gơh jang đei rim tơdrong păng mă kăl hloh dơ̆ng ‘noh jĭ bơngai Ê đê gơh hơnhăk truh tơmam đơ̆ng kơdih ăn pơ đĭ apŭng plĕnh teh băt truh ngăl. Truh năr ‘nâu ‘noh ĭnh hlôi tơbăt hơdăh đei tơdrong ‘noh păng roi ‘năr roi lơ bơngai băt truh găh Ê đê Cafe.”

Vă đei tôm tơmam pơm tơlĕch cheh phe pŭk, Y Pốt jang hơdai răt iŏk cheh phe đơ̆ng kon pơlei lơ̆m tơring hăm kơjă măk ƀiơ̆ kơjă anih tĕch mơdro 10.000 hlak jên 1 kĭ cheh phe găr. Hơdai hăm ‘noh, sư tơgŭm hơdrĕch sầu riêng, ƀơ ăn kon pơlei pơtăm hơlam, krao hơvơn kon pơlei tơplih jing pơtăm hăm mơ̆r. Truh dang ei, kŏng ti sư hlôi đei tơring tơmam hloh 50 hek tar cheh phe. Kŏng ti kŭm pơm ăn tơdrong jang sơđơ̆ng ăn kơ dôm jĭt ‘nu bơngai jang bơngai Ê đê, hăm jên iŏk yua đơ̆ng 12-20 triệu hlak jên 1 khei. Ƀok Y Phen Niê, Kơdră vei lăng khŭl kon pơlei jang chŭn mir xăh Dray Sap, tơbăt, đơ̆ng trong jang đơ̆ng Y Pốt, đon tơchĕng jang chŭn mir đơ̆ng kon pơlei kŭm ƀrư̆ ƀrư̆ tơplih, tơdrong arih sa roi ‘năr dai roi đei ƀôh ƀiơ̆:

“Tơdrong jang kiơ̆ grŭp jang hơdai đơ̆ng Kŏng ti Ê đê Cafe đei lơ kon pơlei đei vang jang hŏk pơhrăm hăm băl. Đơ̆ng tơdrong ‘noh hlôi hơnhăk ăn lơ mŭk drăm păng iŏk yua đơ̆ng ‘long cheh phe hơnhăk ăn đei yua tôch kơ lơ păng tơdrong tơklep hơdai ‘noh pơm tơdrong hiôk ăn tơdrong hơtŏk tơiung kơ tơring tôch kăl.”

‘Ngoăih kơ tơmam cheh phe pŭk, Y Pốt tơchă hơlen lơ tơmam păng pơm tơdrong pha ra ăn tơmam đơ̆ng sư. Hrei ‘nâu, sư hlôi pơm đei tơmam cheh phe hơdai hăm dôm kơloăi ƀum plei păng đei lơ tơmam đe ‘meh răt. Sư hơdrin vang akŏm dôm ‘măng pơdă, jơnŭm kơchơ tĕch mơdro găh tơmam choh jang sa rơgoh, roi tơƀôh tơmam lơ̆m dôm kênh trực tuyến, mạng tơpôl... vă tơchă anih tĕch mơdro. ‘Nhŏng Vũ Trường Sinh, Kơdră vei lăng Kŏng ti Logicstic Tân Phát Địa, đơ̆ng Đồng Nai truh tơgoăt tĕch mơdro tơ̆ Kŏng ti Ê đê Café, tơroi:

“Hloh 2 năr ƀôh tơ̆ âu păng lăng băt yan âu đơ̆ng mir đak lar ding truh pơm tơlĕch ĭnh ƀôh tơmam ‘lơ̆ng hơiă tơpă. Kơna ‘meh vă đơ̆ng păih nhôn hăm Ê đê Cafe ‘noh jang hơdai tơ̆ hơnăp kơnh, ĭnh gô đei 1 trong jang hơnhăk tơmam lĕch tơ̆ teh đak đe.”

Pơm đei cheh phe đơ̆ng tăng, Y Pốt iŏk vih jing đei ‘ngam. Sơnăm 2020, Kŏng ti Ê đê Café đei Anih tơchĕng hơlen mơdro sa păh lăp păng iĕ asong hla ar pơkăp “Dơ̆ng mă 10 – hơnăn bưng ai 3 tơring, tơmam pơvih pơvăn ‘lơ̆ng”. Sơnăm  2021, cheh phe Robusta kơ Kŏng ti Ê Đê Café đei pơkăp “ Tơmam choh jang sa tơring tơrang ‘lơ̆ng kơ dêh char”, tơmam OCOP 4 hơnglŏng kơ Dak Lak. ‘Nao âu, Y Pốt Niê jĭ 1 lơ̆m dôm “ Kon pơlei jang chŭn mir Việt Nam hơgei hloh sơnăm 2022” yua đơ̆ng Trung ương Khŭl vei lăng kon pơlei jang chŭn mir Việt Nam pôk hơpăh. Tơroi găh jăl trong tơ̆ hơnăp, Y Pốt tơroi:

“Blŭng a ‘noh tơring tơmam mă să păng pơ đĭ hloi xăh Dray Sap păng apŭng Krông Ana adoi gô jang kiơ̆ păng jing gơng tơƀưh kơ Ê đê Cafe. Tơdrong ‘meh vă tih hloh đơ̆ng Ê đê Café hơnhăk truh tơmam kăp gĭt hloh, tơmam ‘lơ̆ng tơpă hloh ăn pơ đĭ apŭng plĕnh teh đei băt truh.”

Hăm tơdrong hưch hanh păng hơdrin ưh kơ pơdơh, Y Pốt Niê hlôi hơnhăk ƀâu phu cheh phe ‘lơ̆ng kơ hơdrĕch sư yak hơtăih.