Lăp đơ̆ng pơgê hrôih, kon pơlei kơ 3 pơlei ‘noh plei Pa, plei Năng păng plei Hoang hlôi pơ chôp hrŭk hơ băn ao tanh năm akŏm tơ̆ hnam hŏk hôp plei Pa - hơnih pơgơ̆r Năr tơgoăt 1 jơ hngơ̆m đon đĭ đăng kon pơlei kơ tơring kon pơlei oei xăh Cư Prao, apŭng M’Drak, dêh char Dak Lak. 2 jih trong ‘noh dôm hla kơ ƀrŭng ƀrăng tŏk bŏk păr lơ̆m kial, chĭng chêng re djơ djrĭng sa roi pơm ăn jơhngơ̆m bơngai chhôk hơ iă hloh dơ̆ng. Đei măt tơ̆ hnam hŏk hôp plei Pa đơ̆ng hrôih, ƀok Y Li Niê, bơngai pơgơ̆r pơlei plei Hoang tơroi:

“Hrei ‘nâu chơt bơih, pêng pơlei akŏm 1 hơnih ƀôh hiôk chơt, mơ̆ng đe joh hơri, tôn chĭng chêng, đei tơdrô ge hai, tơƀơ̆p ‘nhŏng oh vang hơdai et tơdrô hai.”

‘Nao đang kơ soang, mŏ H’Nhuyn Ksơr oei tơ̆ plei Năng, xăh Cư Prao tơbăt, năr ‘nâu khŭl hơsoang kơ pơlei tôch chơt yua kơ đei hơsoang pơyua ăn kon pơlei. Lăng ƀôh kon pơlei năm tôm, lăng hơlen tơdra hơsoang đơ̆ng khŭl, tơdrong chơt hơ iă nhen roi dêh:

“Năr ‘nâu lu oh hơsoang ƀai oh guăng nhen pơ kao ƀlang, ‘meh ƀai ‘nâu hơsoang đang bơ̆ih vă kơ bơ̆n ƀlŏk truh tơdrong joăt kơ bơngai Ê đê bơ̆n vă vei răk ling lang đơ̆ng rŏng âu dơ̆ng.”

Kiơ̆ kơ ƀok Y Linh Niê, phŏ Kơdră chĕp kơ̆l Mặt trận Tổ quốc Việt Nam xăh Cư Prao, plei Pa, plei Năng păng plei Hoang đei 346 ŭnh hnam hăm 1.440 ‘nu bơngai. Pêng pơlei đei 5 hơdrĕch hơdrŭng lơ̆m ŭnh hnam dôm hơdrĕch hơdrŭng Việt Nam vang arih sa, lơ̆m ‘noh bơngai Ê Đê đei hloh 90%. Rim sơnăm, lơ̆m năr tơgoăt 1 jơhngơ̆m đon đĭ đăng hơdrĕch hơdrŭng, khŭl kơdră chĕp kơ̆l xăh pơgơ̆r tơdrong jang kơ kuh chơt hơiă tơ̆ rim pơlei, mă lei, sơnăm ‘nâu Anih vei lăng kon pơlei xăh hlôi tơchơ̆t pơgơ̆r lơ tơring kon pơlei oei vă tơiung jơhngơ̆m đon tơgoăt tơgoăl đơ̆ng rim hơdrĕch hơdrŭng tơ̆ tơring. Hơdai hăm pơm tơdrong hiôk ăn kon pơlei đei tơ ƀơ̆p băl pơgơ̆r joh hơri hơsoang:

“ ‘Năr 18 khei 11 rim sơnăm đa pơgơ̆r tơdrong lêh tơ̆ dôm tơring kon pơlei oei. Rim sơnăm kiơ̆ tơdrong joăt tôn chĭng chêng đang kơ ‘noh et tơdrô ge, hơsoang. Tơring kon pơlei tôch kơ chhôk hơ iă, ‘nă hal.”

Vang truh Năr tơgoăt 1 jơhngơ̆m đon đĭ đăng hơdrĕch hơdrŭng tơ̆ lơ tơring kon pơlei kơ xăh Cư prao, apŭng M’drak, ƀok Y Biêr Niê, Phŏ Bí thư anih jang Đảng dêh char Dak Lak tơbăt, hrei ‘nâu, tơ̆ lơ pơlei lơ̆m dêh char Dak Lak tŏk bŏk pơgơ̆r lơ tơdrong jang joh ayŏ kơ dŏ soang kơ kuh chơt hơiă 92 sơnăm Năr tơgoăt 1 jơhngơ̆m đon đĭ đăng hơdrĕch hơdrŭng (18/11/1930 – 18/11/2022). Tơdrong jang âu hlôi jing Năr lêh tih kơ tơpôl kon pơlei oei hăm lơ tơdrong jang hơiă  joh ayŏ joăt joe đơ̆ng ŭnh hnam tih kơ dôm hơdrĕch hơdrŭng Việt Nam tơgop pơm hơtŏk loi dơ̆ng pơjing grŭp tơgoăt 1 jơhngơ̆m đon đĭ đăng hơdrĕch hơdrŭng:

“Tơdrong tơm đơ̆ng năr lêh ‘noh jĭ vă kon pơlei bơ̆n tưk tơiung dôm tơdrong hơiă đơ̆ng hơdrĕch hơdrŭng păng pơma dơnuh, hŏk pơhrăm dôm tơdrong kiơ ‘lơ̆ng rŏ. Kiơ̆ đơ̆ng noh gơh tơmơ̆t hơdai 1,2 trong jang tơgŭm, trong jang ‘nao vă tơroi tơbăt pơtho pơhrăm ăn kon pơlei hlôh băt dơ̆ng, đơ̆ng noh đe sư tơ klep hơdai tơdrong arih sa đơ̆ng tơpôl hăm khôi luơ̆t đơ̆ng teh đak vă pơjing pơlei pơla roi ‘năr roi ‘lơ̆ng hơiă hloh.”

Lơ̆m dôm năr âu ki, jơ̆p tơ̆ rim pơlei pơla kơ dêh char Dak lak kŭm hlôi pơgơ̆r Năr tơgoăt 1 jơhngơ̆m đon đĭ đăng hơdrĕch hơdrŭng, hăm tơdrong vang akŏm đơ̆ng kơdră chĕp kơ̆l Đảng, kơdră chĕp kơ̆l tơring. Ƀôh hơdăh, tơ̆ lơ tơring kơsô̆ 5, xăh Ea Bar, apŭng Buôn Đôn chơt hơ iă đei sơng ƀok Phạm Minh Tấn, Phŏ Bí thư Anih jang Đảng dêh char, Y Giang Gry Niê Knơng, jang lơ̆m anih jang Đảng dêh char, kơdră Anih jang Mặt trận Tổ quốc Việt Nam dêh char, păng kơdră chĕp kơ̆l dôm anih jang, kơdră đảng, kơdră chĕp kơ̆l tơring. Pơ ma tơ̆ âu, ƀok Phạm Minh Tấn, Phŏ Bí thư Anih jang Đảng dêh char Dak Lak chih iŏk păng pôk pơ ư dôm tơdrong vang tơgop đơ̆ng kon pơlei lơ tơring kon pơlei oei kơ sô̆ 5 lơ̆m jang kiơ̆ dôm tơdrong jang pơjei băl ‘mêm kơ teh đak, kŭm nhen dôm ‘măng krao hơvơn yua đơ̆ng kơdră đảng, kơdră chĕp kơ̆l, Mặt trận Tổ quốc păng dôm khŭl grŭp tơlĕch jang lơ̆m khei ‘năr âu ki. Hơdai hăm ‘meh vă kơdră đảng, kơdră chĕp kơ̆l, Mặt trận Tổ quốc, rim khŭl grŭp păng kon pơlei 5 pơlei hơnơ̆ng hơtŏk jơhngơ̆m đon tơgoăt tơgoăl, yak hloh rim tơdrong mơ mat tat, long nol vă hơtŏk tơiung pơm tơlĕch, pơ jing tơring kon pơlei oei hơtŏk tơiung, tơdrong arih sa kon pơlei roi ‘năr roi phĭ tơnŏ, hiôk hian.