Jĭ 1 lơ̆m dôm HTX năm hơdrol lơ̆m tơdrong chă tơmang lăng, choh jang xa – bri brăh lơ̆m tơpôl, HTX choh jang xa păng chă tơmang lăng Phú Nông – Buôn Đôn, apŭng Buôn Đôn, dêh char Đắk Lắk hlôi adrin jang hơdoi hăm dôm bơngai jang lơ̆m tơpôl atŏk tơiung chă tơmang lăng kơtă tơ̆ pơlei kơdih. Hăm tơdrong ‘lơ̆ng găh cham char bri brăh nhen: Bri ‘long kơdrơ̆ng lơ̆m Pơgar teh đak Yok Ðôn, anih ‘lơ̆ng rŏ tơ̆ đak krong Sê-rê-pốk, đei lơ đak krong, hơbong đak, dơnâu, chơkơi đak, bri kông, tơdrong joh ayŏ kơ dŏ xoang, tơmam xa kơ dôm hơdrĕch tôch ‘lơ̆ng,.. HTX hlôi tơgĕch iŏk tơdrong ‘lơ̆ng ‘nâu vă atŏk tơiung chă tơmang lăng.

Truh dang ei, lơ trong jang đơ̆ng dôm HTX hlôi đei tơmoi chă tơmang lăng băt truh. Mă lei, vă pơjing dôm tơmam chă tơmang lăng kiơ̆ tơdrong jang OCOP, HTX choh jang xa păng chă tơmang lăng Phú nông – Buôn Đôn, oei tơƀâp lơ pơmat tat, lơ̆m noh đei tơdrong chĕng hơmet teh vă bơ̆ jang.

Ƀok Trần Văn Toàn, Kơdră chĕp kơ̆l Khul vei lăng HTX ăn tơbăt: “Pơmat hlŏh hrei ‘nâu jĭ tơhlăk lơ̆m tơdrong tơmât jên jang păng jang tŏk, yoa ưh jăh chĕng hơmet dôm tơring vă atŏk tơiung chă tơmang lăng. Pơtih gia nhen, iŏk 1 păh teh choh jang xa jing pơm teh vă tĕch mơdro, pơvih pơvăn dăh mă pơtho tơƀôh trong iŏk teh choh jang xa ăn lơ tơdrong jang, đơ̆ng noh sư jing pơdui đunh khei ‘năr mưh pơm hla ar tơmât jên jang păng jang tŏk trong chă tơmang lăng tơ̆ tơring tơrang”.

Kiơ̆ tơdrong tơchơ̆t kơsô̆ 148/QĐ-TTg sơnăm 2023 đơ̆ng Thủ tướng teh đak, dôm tơdỏng hơgăt vă hơlen năng grŭp tơmam OCOP chă tơmang lăng đei chih tôch hơdăh, mă lei vă pơjing đei ‘nŏh ưh kơ ƀônh kiơ. Kiơ̆ PGS.TS Trần Văn Ơn, bơngai jang tơgŭm găh Tơdrong jang OCOP kơ teh đak, tơdrong pơmat hlŏh jĭ yoa tơmam đei ƀơm truh tơ̆ lơ anih jang. Kơlih thoi noh, mă đơ̆ng Đắk Lắk oei đei lơ tơdrong ‘lơ̆ng vă jang tŏk mă lei hơnat vă gơ̆h jang đei tơdăh ưh đei trong vang jang hrơ̆ch ‘lơ̆ng đơ̆ng dôm anih jang đei ƀơm truh.

“Tơdrong jang 1 xăh, 1 tơmam yoa anih choh jang xa, atŏk tơiung tơring tơrang chĭu pŭ, mă lei tơmam đơ̆ng sư ưh lăp ƀơm truh anih choh jang xa păng atŏk tơiung tơring tơrang đĕch mă oei đei hloi tơmam vă chă tơmang lăng hai. Kơna mưh jang hơdrô̆ ‘nŏh tôch pơmat tat. Rim sơnăm anih chă tơmang lăng kŭm jang tôch lơ. Tơdăh jang hơdoi ‘lơ̆ng ‘nŏh tơmam chă tơmang lăng tơ̆ âu gô tŏk pran. Yoa tơpă tơ̆ yăn âu hlôi đei lơ tơmam chă tơmang lăng iŏk yoa kơjă kăp gĭt đơ̆ng dôm tơring tơ̆ Đắk Lắk mă lei yoa bơ̆n năng tam mă trŏ kơna tam mă đei trong jang hơdoi. Tơdăh đei trong jang hơdoi ‘nŏh ưh jor gô jang tŏk pran ‘lơ̆ng hloi”.

Ƀok Nguyễn Hoài Dương, Kơdră Anih vei lăng choh jang xa păng atŏk tơiung tơring tơrang dêh char Đắk Lắk ăn tơbăt, lơ̆m dêh char đei dang 17 pơlei, pơla gơ̆h iŏk yoa dôm tơdrong ‘lơ̆ng đơ̆ng sơ̆ vă atŏk tơiung chă tơmang lăng OCOP. Mă lei, dêh char tam mă pơjing đei tơmam OCOP chă tơmang lăng, kơlih yoa trong chă tơmang lăng âu oei jang kơdih kơdih đĕch, jang răh rai ie iĕ, mă lơ ‘nŏh iŏk yoa dôm tơmam hlôi đei, tam mă tưk tơiung đei tơdrong ‘lơ̆ng đơ̆ng jŏh ayŏ kơ dŏ xoang vă pơm hơtŏk kơjă tơmam. Đắk Lắk oei adrin iŏk yoa dôm trong jang, tơdrong tơgŭm vă tưk tơiung tơmam OCOP chă tơmang lăng tơgăl hăm tơdrong ‘lơ̆ng đơ̆ng tơring.

Ƀok Nguyễn Hoài Dương ăn tơbăt: “Dôm anih jang kơpal athei đei lơ tơdrong roi tơƀôh vă anih jang, HTX păng kon pơlei tơ̆ dôm tơring, mă loi jĭ tơ̆ dôm tơring đei lơ tơdrong ‘lơ̆ng găh chă tơmang lăng ƀôh hơdăh dôm tơdrong pran ‘lơ̆ng păng pơjing đei tơmam chă tơmang lăng ‘nŏh jĭ tơmam OCOP vă tưk tơiung đei yoa hlŏh dơ̆ng dôm tơdrong pran ‘lơ̆ng tơ̆ tơring âu”.

Tơdrong Đắk Lắk atŏk tơiung chă tơmang lăng tơklep hăm tơdrong jang OCOP gô tơgop pơm hơtŏk đei tơmam chă tơmang lăng, hơnhăk ba tơdrong đei yoa găh mŭk drăm, pơm hơtŏk iŏk yoa ăn kon pơlei. Đơ̆ng noh, tơgŭm ăn tơpôl roi đei đon chĕp vei dôm kơjă kăp gĭt đơ̆ng jŏh ayŏ kơ dŏ xoang đơ̆ng sơ̆./.