VOV4.Bahnar - Tơ drong jang 1 xăh 1 tơ mam ( krao kơ kơ đeh ‘noh tơ drong jang OCOP) tơ̆ dêh char Dak lak tŏk bŏk đei tơ drong hơ tŏkt ơ iung pran kơ tang. Roi ‘năr roi lơ tơ mam OCOP đei hla ar pơ kăp 3 -4 hơ nglŏng. Tơ drong ‘nâu pơih ăn tơ drong hiôk hơ tŏk tơ iung tơ mam choh jang sa tơ ring, hơ tŏk tơ iung mŭk drăm tơ iung tơ ring tơ rang kiơ̆ trong hơ tŏk kơ jă tơ mam đơ̆ng choh jang sa đei.

            Jĭ anih jang đei tơ mam mắc ca găr iŏk đei hla ar pơ kăp tơ mam OCOP 4 hơ nglŏng kơ dêh char, Kŏng ti Cổ phần Damaca Nguyên Phương tơ̆ xăh Phú Lộc, apŭng Krông Năng tŏk bŏk hơ drin tơ plih ‘nao trong jang, kơ măy kơ mŏk hơ tŏk ‘lơ̆ng, tơ pu tơ mam vang hơ len lăng tơ mam OCOP kơ teh đak. Ƀok Phạm Đình Nhân, Kơ dră Anih Maketing Kŏng ti cổ phần Damaca Nguyên Phương tơ băt; iŏk đơ̆ng tơ mam đei drơ̆ng ăn păng iŏk yua hơ năn OCOP hlôi pơm tơ drong lui hăm bơ ngai răt yua, tơ mam lơ̆m dôm siêu thị, anih tĕch ƀônh ƀŏ ƀiơ̆. Kơ sô̆ tơ mam tĕch ăn rim năr roi tŏk. Hơ drô̆ sơ năm 2021, mă đơ̆ng ƀơm ưh kơ ‘lơ̆ng đơ̆ng jĭ Covid 19 mă lei kŏng ti hlôi tĕch tơ̆ anih tĕch mơ dro dang 70 tấn găr mắc ca.

        “ Đơ̆ng rŏng kơ iŏk đei hla ar pơ kăp OCOP 4 hơ nglŏng, kŏng ti ưh kơ pơ dơh hơ tŏk ‘lơ̆ng tơ mam, tơ pu tăh athei tơ plih ‘lơ̆ng vă lăp hăm tơ drong hơ găt kơ OCOP. ‘Ngoăih kơ ‘noh nhôn oei pơm hnam jang hơ tŏk ‘lơ̆ng iŏk yua tơ mam vă vang jang lơ̆m OCOP 5 hơ nglŏng kơ teh đak yak truh tĕch tơ mam lơ̆m teh đak păng tơ̆ teh đak đe”.

Hơ nih pơm tơ lĕch mắc ca kơ Kŏng ti Cổ phần Damaca Nguyên Phương

       Ƀôh hơ dăh hloh đei yua đơ̆ng tơ drong jang 1 xăh 1 tơ mam ưh kơ đei bu nai ‘noh jĭ kon pơ lei jang chŭn mir - dôm tơ ‘ngla vang jang tơ drong jang. Tơ ƀôh rơ đăh rơ đong hloh ‘noh jĭ tơ mam phe rơ goh HTB đơ̆ng hơp tak xăh pơ vih pơ văn akŏm choh jang sa Thăng Bình, xăh Cư Kty, apŭng Krông Bông. Iŏk đơ̆ng đei drơ̆ng ăn ‘noh jĭ tơ mam OCOP 3 hơ nglŏng, kơ jă phe hlôi tŏk hloh 2 ‘măng pơ têng hăm hơ drol, kơ sô̆ tĕch kŭm tŏk đơ̆ng 200 tấn tŏk 400 tấn 1 sơ năm, hơ nhăk ăn iŏk yua găh lơ tơ drong ăn hơp tak xăh kŭm nhen dôm bơ ngai vang jang. Ƀok Võ Văn Sơn, Kơ dră vei lăng hơp tak xăh pơ vih pơ văn akŏm choh jang sa Thăng Bình vang tơ roi:

        “Hơ drol sơ̆ tơ mam ĭnh tam mă đei anih tĕch mơ dro lăng ‘lơ̆ng dang ei iŏk đei hla ar pơ kăp OCOP ‘noh kơ jă tơ mam tŏk lơ, đơ̆ng kơ jă tĕch, đơ̆ng anih dơ̆ng kơ tơ mam bơ ngai jang đei tơ drong hiôk tĕch đei lơ tơ mam ƀiơ̆, sơ đơ̆ng ƀiơ̆ tôch kơ lơ. Anih tĕch mơ dro lơ̆m dêh char, ‘ngoăih dêh char jô̆ hloi tơ̆ teh đak đe.”

Bơ ngai jang kơ Hơp tak xăh pơ vih pơ văn akŏm choh jang sa Thăng Bình hơ len lăng kơ dơ chŭn na hơ drol kơ pơ yan jang plơ̆ng

        Kiơ̆ kơ Anih vei lăng găh choh jang sa păng hơ tŏk tơ iung tơ ring tơ rang dêh char Dak Lak, truh dang ei, lơ̆m dêh char hlôi đei 72 tơ mam đei hla ar pơ kăp tơ mam OCOP kơ dêh char. Lơ̆m noh 8 tơ mam đei 4 hơ nglŏng, găh lơ ‘noh cheh phe, ca cao, măcca. Dôm tơ mam âu tŏk bŏk hơ nơ̆ng đei tơ mơ̆t jên jang pơm hơ tŏk ‘lơ̆ng yak truh iŏk đei pơ kăp ‘lơ̆ng 5 hơ nglŏng kơ teh đak, hơ tŏk ‘lơ̆ng tơ drong hiôk vang mơ̆t lơ̆m anih tĕch mơ dro apŭng plĕnh teh. Ƀok Dương Tín Đức, Chánh văn phòng vei lăng tơ drong jang Tơ ring tơ rang ‘nao dêh char Dak Lak tơ băt:

        “ Nhôn gô hơ drin hăm tơ drong tơ gŭm đơ̆ng teh đak gô pơm hơ tŏk dôm tơ mam đơ̆ng 3 tŏk 4 hơ nglŏng, đơ̆ng 4 tŏk 5hơ nglŏng vă iŏk đei dôm tơ drong hơ găt ‘lơ̆ng ‘noh ƀơ̆t doh gô tơ goăt đei dôm tơ mam tơ ring hloh ‘noh jĭ tơ drong pơ trŭt mơ dro sa. Tơ dăh tơ mam 3 hơ nglŏng ‘noh dôm siêu thị, dôm anih tĕch tơ mam gô iŏk, 4 hơ nglŏng năm đei jơ̆p lơ̆m teh đak păng 5 hơ nglŏng năm đei tŏ sĕt hloh 45 teh đak vang jang tơ drong jang OCOP âu”.

        Hăm dôm tơ mam ‘lơ̆ng, đei yua găh dôm tơ mam choh jang sa, jang pơm hăm ti, dêh char Dak Lak tŏk bŏk hơ drin tơ lĕch jang jơ nei tơ drong jang OCOP vă hơ tŏk tơ iung mŭk drăm tơ ring tơ rang, hơ met ming dơ̆ng choh jang sa, bơ̆ jang kiơ̆ đei yua tơ drong tơm pơ jing tơ ring tơ rang ‘nao, hơ tŏk ‘lơ̆ng tơ drong arih sa kon pơ lei.

Hương Lý: Chih

Thuem: Tơ blơ̆