Ŭnh hnam yă H’Sắk oei tơ̆ plei Mơ Nú, xăh Chư Á, pơlei tơm Pleiku đei 7 ‘nu, hơrih lơ̆m hnam hmă hlôi đei man đunh bơih. Klo yă H’Sắk đĭ lôch yua kơ jĭ jăn, kơdih kâu yă athei vei lăng dơ̆ng oh klo sư đei jo po đơ̆ng nge kơna tơdrong hơrih sa tôch kơ mơmat tat, iŏk yua găh lơ pơ mơ̆ng lơ̆m jang thuê. Vă tơgŭm ŭnh hnam yă H’Sắk yak tŏk “Tơdrong jang đei lơ tơdrong jang sa, hơtŏk tơiung tơdrong jang tơ jur dơnuh hin” hlôi tơgŭm 1 pôm rơmo yŏng.

Yă H'Sắk tôch kơ chhôk yua kơ đơ̆ng rŏng 2 sơnăm vei rong, yă hlôi ƀôh đei jơnei:“Bơnê kơ khŭl kơdră tơring hlôi tơbơ̆t truh dôm ŭnh hnam mơmat tat nhen nhôn, gơnang đơ̆ng tơdrong tơgŭm ‘nâu mă nhôn đei tơdrong hiôk yak tŏk lơ̆m tơdrong hơrih sa, ĭnh bơnê.”

Kiơ̆ kơ yă Nguyễn Thu Hương, Phŏ Kơdră Anih vei lăng kon pơlei xăh Chư Á, ‘ngoăih kơ hơtŏk tơiung vei rong đơ̆ng kon yŏng mă khŭl kơdră tơgŭm, tơdrong jang tơ jur dơnuh hin tơ̆ tơring oei hơtŏk đei yua kiơ̆ tơdrong tơgŭm tŏk iŏk jên tơgŭm, tơplih tơdrong jang. 3 sơnăm âu ki, xăh hlôi asong 42 tŏ rơmo ăn ŭnh hnam dơnuh hin, tơgŭm jên tơplih tơdrong jang ăn kơ 10 ŭnh hnam păng ăn 8 ŭnh hnam tŏk iŏk hăm kon jên cheh tŏ sĕt...

Yă Nguyễn Thị Thu Hương tơbăt.“Rim sơnăm xăh ling lang tơgŭm hơdrol dôm tơdrong jang sa yua đơ̆ng pơlei tơm Pleiku păng xăh tơgŭm truh dôm ŭnh hnam dơnuh hin, ŭnh hnam vă jê̆ dơnuh hin găh pơgang, pơtho pơhrăm, hnam oei, jên tŏk iŏk tơgŭm, pơtho tơdrong jang đei iŏk yua, đơ̆ng noh tơgop tơplih ‘lơ̆ng tơdrong hơrih sa, hơtŏk tơdrong gơh băt dôm tơdrong pơvih pơvăn lơ̆m tơpôl truh hăm ŭnh hnam dơnuh hin păng ŭnh hnam vă jê̆ dơnuh hin.”

Tơpă yan âu ăn ƀôh, rim ŭnh hnam dơnuh hin tơ̆ pơlei tơm Pleiku dêh char Gia Lai ‘noh đei tơdrong hơrih sa mơmat păng ‘meh vă đei tơgŭm pha ra băl. Nhen yă Trần Thị Phượng, 50 sơnăm, oei tơ̆ thôn 4, xăh Trà Đa, pơlei tơm Pleiku, đơ̆ng rŏng kơ ưh pă đei yă kiơ yua đơ̆ng jên hơmet ăn bơngai lơ̆m ŭnh hnam đei jĭ ung thư, sa roi kăl lơ tơdrong tơgŭm. Păng tơpă yan âu, đơ̆ng khŭl kơdră xăh, khŭl drŏ kăn, dôm bơngai đei jơhngơ̆m đon ‘mêm mơnat... hlôi vang tơgŭm sư ƀơ̆t mơmat tat.

Yă Phượng oei ƀlŏk đĕch dôm jên tơgŭm kăp gĭt ‘noh, đơ̆ng por sŏng truh 1 pôm hnam: “Ƀơ̆t mơmat tat hloh khŭl kơdră tơring hlôi tơgŭm ŭnh đei 1 pôm hnam oei, dôm anih jang kơpal tơgŭm ăn kơ đe kon ĭnh đei dôm ‘măng sŏng sa rim năr ƀơ̆t mơmat tat ‘noh. Dang ei đe kon hơdrin hŏk pơhrăm vă klăih đơ̆ng tơdrong dơnuh hin. ‘Măng mă klo ĭnh jĭ pơlŏ dêh ‘noh xăh Trà Đa păng Khŭl drŏ kăn tơgŭm ĭnh 5 triệu jên kŏng ĭnh thuê bơngai phĕ cheh phe yua kơplăh doh ĭnh oei tơ̆ hnam pơgang kơna athei thuê bơngai phĕ, 1 kơđôp ƀơ̆t pơngot dang 1 tơpu ƀơ̆t phĭ, ĭnh hrĭ jơhngơ̆m.”

Jang kiơ̆ Tơdrong jang kơsô̆ 31-CTr/TU ‘năr 3/11/2021 đơ̆ng Anih chĕp kơ̆l pơgơ̆r Đảng bộ pơlei tơm Pleiku jăl XII “Găh hơnơ̆ng tŭn pran tơdrong jang tơ jur dơnuh hin kơjăp, hơtŏk ‘lơ̆ng tơdrong hơrih sa kon pơlei, mă loi ‘noh jĭ tơ̆ dôm pơlei kon kông lơ̆m tơring”, đơ̆ng sơnăm 2021 truh dang, pơlei tơm jang hơdai hăm dôm anih jang, Anih vei lăng kon pơlei dôm xăh, phường krao hơvơn dôm anih mơdro sa, bơngai đei jơhngơ̆m đon ‘mêm mơnat, jên mong “Yua kơ bơngai dơnuh hin pơlei tơm” păng đơ̆ng xăh tơgŭm 95 ŭnh hnam man ‘nao păng hơmet ming hnam oei hăm akŏp kơsô̆ jên hloh 4,7 ti hlak jên; tơgŭm ‘long hơ drĕch - kon yŏng, phŏng, jên jang sa 1,2 ti hlak jên; tơgŭm 252 ŭnh hnam dơnuh hin, vă jê̆ dơnuh hin, ‘nao klăih đơ̆ng dơnuh hin tŏk iŏk jên tơgŭm hloh 13,8 ti hlak jên... Ƀok Trần Tấn Quang, Kơdră anih jang Mŭk drăm pơlei tơm Pleiku, tơbăt, kơsô̆ ŭnh hnam dơnuh hin tơ̆ pơlei tơm đei 0,24%, hăm 149 ŭnh hnam dơnuh hin. Pơlei tơm tŏk bŏk hơnơ̆ng tơchĕng hơlen, tơlĕch jang dơ̆ng lơ tơdrong jang sa trŏ lăp vă hơtŏk ‘lơ̆ng đei yua đơ̆ng tơdrong jang ‘nâu. “Hăm hơnăp jang ‘noh jĭ anih jang kơtă tơlĕch jang dôm hla ar athei đơ̆ng pơlei tơm găh tơgŭm tơdrong jang sa ăn bơngai dơnuh hin, anih jang hlôi pơm hơdăh dôm tơdrong jang tơgŭm jang sa, hơmet ăn dôm tơmam jang sa vă kơ lăp hăm tơdrong hơrih sa, ƀrư̆ ƀrư̆ yak klăih đơ̆ng dơnuh hin păng klăih đơ̆ng dơnuh hin kơjăp. Anih vei lăng Mŭk drăm pơlei tơm gô hơnơ̆ng hơdai hăm Anih vei lăng kon pơlei dôm xăh, phường păng Hơnih jang pơvih pơvăn choh jang sa tơchĕng hơlen, tơlĕch jang lơ tơdrong jang sa, lăp hăm yan âu tơdrong hơrih sa păng jang sa đơ̆ng kon pơlei, tơgop hơtŏk ‘lơ̆ng đei yua tơdrong hơgăt tơjur dơnuh hin kơjăp lơ̆m pơlei tơm tơ̆ hơnăp kơnh”.

Tơdrong jang tơjur dơnuh hin đei pơlei tơm Pleiku dêh char Gia Lai bơ̆jang kiơ̆ hơnơ̆ng lơ̆m lơ sơnăm âu ki. Lơ̆m jăl jang hơtŏk tơiung ‘nao tơdrong jang ‘nâu roi đei tơƀôh rơđăh rơđong kiơ̆ tơdrong tơgŭm hơdrol hơmet pơ ‘lơ̆ng dôm tơdrong kon pơlei oei, hnam oei păng tơdrong hơrih ‘lơ̆ng. Kiơ̆ đơ̆ng noh, hơtŏk tơmam ‘lơ̆ng, tơdrong ‘lơ̆ng hơtŏk tơiung kơ pơlei tơm, tŭn pran hơtŏk tơiung anih kơdrơ̆m, mŭk drăm - tơpôl pơlei tơm kơjăp, tơklep hăm vei lăng cham char bri brăh.