‘Măng apĭnh jet hăm tơdrong tơlĕch nơ̆r apĭnh đơ̆ng Bơngai tang măt Kuôk hô̆i năm tơ păt lơ̆m dôm tơdrong tam mă ‘lơ̆ng lơ̆m tơdrong bơ̆jang kiơ̆ 3 tơdrong jang tơm teh đak găh pơjing tơring tơrang ‘nao; hơtŏk tơiung mŭk drăm - tơpôl tơring kon pơlei kon kông păng tơring groi kông; sut pơngot tơjur dơnuh hin kơjăp. Bơngai tang măt Mai Văn Hải, khŭl Thanh Hóa apĭnh jet: “Đơ̆ng rŏng hloh 2 sơnăm tơlĕch jang kiơ̆ Tơdrong jang tơm teh đak hơtŏk tơiung mŭk drăm, tơpôl tơring kon pơlei kon kông păng tơring groi kông jăl jang 2021-2025 hlôi iŏk đei 1,2 jơnei ‘lơ̆ng. Mă lei hơdai hăm ‘noh tơdrong bơ̆jang kiơ̆ kơ sô̆ tơdrong jang iĕ đơ̆ng tơdrong jang tơ lĕch jên oei hiơ̆ păng tơ hlăk tơ hlĭn lơ găh trong jang vei lăng. Apĭnh Kơdră tơm tơbăt hơyơ ‘noh jĭ mơmat tat, tơhlăk tơhlĭn tih hloh, tơdrong tơm pơm ăn păng trong jang hơmet pơ ‘lơ̆ng. Apĭnh bơnê kơ ih Kơdră tơm”.

Kơdră tơm, Kơdră Anih vei lăng hơdrĕch kon kông Hầu A Lềnh tơbăt, tơdrong jang tơm teh đak găh hơtŏk tơiung mŭk drăm - tơpôl tơring kon pơlei kon kông păng tơring groi kông ‘noh mơmat tat hloh. Yua kơ tơdrong jang tih să păng oei tơ̆ tơring mơmat tat, hơnat hơnot. Dôm tơdrong jang, tơdrong tơgŭm đei akŏm lơ̆m tơdrong jang đei pơ đĭ hloi trong jang tơgŭm đơ̆ng jăl jang hơdrol oei gơh yua: “Tơchĕng tih hloh dang ei ‘noh jĭ kơplăh tơlĕch jang tơ̆ teh yan âu yua kơ đei dôm tơdrong jang tơlĕch jang hơdăh truh tơ̆ pơlei pơla, rim ŭnh hnam. Găh tơdrong jang tơgŭm, dôm hla ar pơtho hlôi tơlĕch ăn tôm, mă lei oei đei lơ̆m yan âu đei dôm tơdrong đei ƀôh yua đơ̆ng noh. Trung ương gô hơtŏk loi dơ̆ng tơdrong jang hơlen lăng păng pơtho hơmet pơ ‘lơ̆ng tơ tom dôm tơdrong mơmat tat, tơhlăk tơhlĭn ăn tơring. Hăm dôm tơring, lơ̆m dôm hla ar pơtho ‘măng âu gô hơtŏk loi dơ̆ng klaih song tôch ai đĭ đăng rim kon jên vă kơ tơring tơchơ̆t, akŏm khŭl jang vă tơlĕch jang”.

Hơnơ̆ng apĭnh jet tơdrong ‘nâu, bơngai tang măt Ma Thị Thúy, khŭl Tuyên Quang apĭnh jet thoi âu: “ ‘Năr 23/2/2023, Thủ tướng teh đak hlôi đei Hla ar 71 gơih kơ dôm anih tơm, anih jang hơmet pơ ‘lơ̆ng mơmat tat, tơhlăk tơhlĭn găh bơ̆jang kiơ̆ 3 Tơdrong jang tơm teh đak, lơ̆m noh đei Tơdrong jang tơm teh đak hơtŏk tơiung mŭk drăm - tơpôl tơring kon pơlei kon kông păng tơring groi kông. Hăm hơnăp jang ‘noh jĭ anih jang kơ Tơdrong jang ‘nâu, Kơdră tơm tơbăt lai yơ Anih tơm bơ̆jang đang kiơ̆ athei đơ̆ng Hla ar 71 vă kơ tơring tơlĕch bơ̆jang kiơ̆.”

Kơdră tơm, Kơdră Anih vei lăng hơdrĕch kon kông Hầu A Lềnh tơbăt hla ar hlôi đei dôm anih tơm, anih jang, tơring tơlĕch jang tơpăt păng tơlĕch ăn lơ hla ar vă tơlĕch jang kiơ̆. Mă lei lơ trong jang tơgŭm nai đei ƀơm truh tơring kon pơlei kon kông kăl athei đei chih tơroi păng tơmơ̆t dơ̆ng hơmet ming mă lăp hăm yan âu:  “Truh ‘năr 30/3 ‘noh 15/15 anih tơm, anih jang đei pơjao hơnăp jang hlôi hơmet pơ ‘lơ̆ng păng đei hla ar tơl tơblang, pơtho ăn dôm tơring hơmet pơ ‘lơ̆ng đei 121 mơmat tat, tơhlăk tơhlĭn. Thoi noh, grŭp mă 1 jang đang hơdrol kơ 30/3. Grŭp mă 2 ‘noh grŭp dôm hla ar tơchơ̆t tam mă đei tơlĕch ăn ‘noh lăp oei pă 2 hla ar. Mĭnh ‘noh pơtho bơ̆jang kiơ̆ tơdrong jang iĕ 1, tơdrong jang 9 yua đơ̆ng Anih vei lăng hơdrĕch kon kông pơgơ̆r păng pơtho bơ̆jang kiơ̆ tơdrong jang 2 đơ̆ng Anih tơm vei lăng găh tơdrong kơtơ̆ng ang păng tơroi tơbăt, ‘noh jĭ grŭp tam mă tơlĕch ăn. Grŭp mă 3 ‘noh jĭ grŭp dôm hla ar tơchơ̆t, pơtho đơ̆ng dôm anih tơm, anih jang mă lei oei tam mă ‘lơ̆ng, hơdrom băl mă kăl athei hơmet ming, lơ̆m noh đei tơdrong Tơchơ̆t 27. Gơh tơroi truh khei ‘năr âu ‘noh đĭ đăng dôm tơdrong kiơ̆ hla ar  71 đơ̆ng Thủ tướng teh đak, hlôi athei jang đang”.

Kŭm tơ̆ ‘măng apĭnh jet, Kơdră tơm, Kơdră Anih vei lăng hơdrĕch kon kông Hầu A Lềnh tơl nơ̆r găh dôm tơdrong mơmat tat, tơhlăk tơhlĭn lơ̆m tơdrong jang tơgŭm hơdrĕch kon kông ƀơm truh klăih song băt hơdăh xăh, pơlei tơring kon pơlei kon kông, tơring groi kông: “Dôm xăh, pơlei đei 15% ‘noh bơngai kon kông tơ̆ kơpal, ‘noh đei băt hơdăh ‘noh jĭ xăh dăh mă pơlei, tơring kon kông. Mă 2 xăh dơnuh hin, pơlei dơnuh hin ‘noh dôm xăh đei 15% kơ sô̆ kon pơlei kon kông arih sa tơ̆ noh oei đei ŭnh hnam dơnuh hin tơ̆ kơ pal ‘noh xăh dơnuh hin. Tơdrong klăih song băt hơdăh âu đei ƀôh 1 tơdrong ‘noh jĭ, ƀơ̆t băt hơdăh đei xăh dơnuh hin, pơlei dơnuh hin ‘noh oei dôm xăh, pơlei đei kơ sô̆ ŭnh hnam dơnuh hin hơla kơ 15 % ‘noh ưh pă oei xăh dơnuh hin, xăh mơmat tat dêh hloh dơ̆ng - păng ‘nâu jĭ 1 tơdrong ưh kơ ‘lơ̆ng”.