Kon pơlei tơ̆ xăh Quảng Điền, apŭng Krông Ana, dêh char Dak Lak hlôi joăt hăm um rup 1 ‘nu drŏ kăn thiếu tá kŏng an hơnơ̆ng năm dăr joang jơ̆p lơ̆m xăh đơ̆ng ƀơ̆t 5 jơ 1 puăt pơ gê rim năr. Ƀok Trần Văn Hữu, tơ̆ đội 5, thôn 2, xăh Quảng Điền tơroi: kon pơlei tơ̆ âu găh lơ jang chŭn mir, pơtăm ƀa đak kơna đa iung tôch kơ hrôih, akŏm huch cheh phe, pơma dơnuh đang kơ ‘noh mă năm tơ̆ chŭn. Dôm sơnăm hơdrol, tơdrong akŏm đang kơ ‘noh pơgơ̆r pơm bơ̆n văn ƀai, đăk sa jên đei ƀôh tôch kơ krê hơmơt. Lơ ŭnh hnam pơchah pơchek, hre đom đơ̆ng rŏng pơm bơ̆n văn ƀai, đăk sa jên. Mă lei dang 3 sơnăm kơ âu, dôm hơnih tơ tŏ găh pơm văn ƀai, đak sa jên hlôi tơjur hloi, tơdrong sơđơ̆ng lơ̆m xăh roi ‘năr roi đei tơplih ‘lơ̆ng: Iŏk đơ̆ng năr mă Thảo năm pơm kơdră vei lăng kŏng an tơ̆ âu păng ‘nhŏng oh kŏng an apŭng tơplih năm jang tơ̆ âu tơdrong sơđơ̆ng lơ̆m tơpôl đei ‘lơ̆ng. Kŏng an tơ̆ âu kŭm hơdai hăm kon pơlei, jur năm ngôi tơ̆ kon pơlei, mơ̆ng nơ̆r tơroi đơ̆ng kon pơlei. Tơ̆ kueng, tơ̆ tổ đang kơ ‘noh khŭl vei lăng kơ dih kơ pơlei tơ̆ âu kŭm băt hơdăh đei tơdrong tơ̆ tơring păng hơdai hăm jang kiơ̆ 1 trong mă hơlen kơ na tơdrong sơđơ̆ng, pơm glăi tơ̆ âu ‘noh ưh kơ pă đei tŏk.

Bơngai mă ƀok Hữu tơroi truh ‘noh jĭ Thiếu tá Lê Nguyễn Hiếu Thảo - Kơdră kŏng an xăh Quảng Điền. Jĭ bơngai Thái, rơneh sơnăm 1986, hơdrol ki, mŏ Thảo hlôi đei 13 sơnăm bơ̆jang tơ̆ Kŏng an apŭng Krông Ana lơ̆m Khŭl vei lăng sơđơ̆ng đang kơ ‘noh Khŭl Kanh sat vei lăng hành chính găh tơdrong sơđơ̆ng tơpôl. Đơ̆ng hơtuch sơnăm 2019, sư apĭnh năm jang tơ̆ tơring kiơ̆ tơdrong jang đơ̆ng Anih tơm vei lăng Kŏng an păng đei Kŏng an apŭng Krông Ana lui ngeh ăn năm jang, pơm Kơdră Kŏng an xăh Quảng Điền. Mŏ Thảo kŭm jing kang ƀô̆ drŏ kăn drô̆ đĕch lơ̆m kơ sô̆ 5 ‘nu kŏng an đei ăn năm jang tơ̆ xăh.

Ƀơ̆t iŏk năm bơ̆ jang, mŏ Thảo hlôi hơdai hăm đe buăl jang hơ dai sư năm tơ̆ tơring băt hơdăh tơdrong. Pơgơ̆r pơjing trong pơkăp tơdrong jang, bơ̆jang kơ tă hăm dôm pơlei pơla vă dăr hơlen bơngai, akŏm hơnih lơ̆m tơring. Hơnơ̆ng dăr joang, vei lăng tơ̆ dôm tơring hơdral; pơgơ̆r tơroi tơbăt lơ̆m kon pơlei hăm lơ trong. Hơdai hăm ‘noh, kŏng an xăh oei  hơdai hăm năm truh tơ̆ hnam năm ngôi apĭnh jet gia, pơlung kon pơlei dăh mă asong tơmam ăn dôm bơngai bơngai mơmat tat, dôm bơngai oei lơ̆m hnam pơnă brŏk tơ̆ pơlei. Mŏ Nguyễn Mỹ Hạnh oei tơ̆ thôn 4, xăh Quảng Điền tơbăt, gơnang đơ̆ng đei tơdrong bơngơ̆t truh pơlung đơ̆ng kŏng an xăh, đơ̆ng rŏng kơ pơtôch pơm kiơ̆ oei lơ̆m hnam pơnă, klo sư hlôi tơtĕnh ngôi hơdai hăm tơpôl, hơdrin jang sa: Ƀơ̆t mă ƀrŏk đơ̆ng hnam pơnă ‘noh sư ngôi hơdai hăm kon pơlei tôch kơ hrĕnh, vang jang mŭk drăm tôch kơ ‘lơ̆ng, mă loi ‘noh tôch kơ hơdrin. Mă kăl loi ‘noh ƀơ̆t ƀrŏk tơ̆ tơring ‘noh khŭl kơdră tơring đang lơ ‘noh khŭl kŏng an xăh tă kơ dôm ‘nhŏng tôch kơ ‘lơ̆ng, đe sư pơlung hơnơ̆ng, đe sư tơgŭm găh jơhngơ̆m đon tôch kơ lơ.

Ưh khan lăp jê̆ kon pơlei, hơdai hăm tơring, Thiếu tá Lê Nguyễn Hiếu Thảo oei hơnơ̆ng tơlĕch jang pơgơ̆r dôm tơdrong ‘mêm mơnat, tơgŭm kon pơlei. Ƀơ̆t jĭ Covid-19 đei ƀôh krê hơmơt, kŏng an xăh Quảng Điền hlôi krao hơvơn dôm bơngai đei jơhngơ̆m đon ‘lơ̆ng, dôm bơngai chă tơgŭm đe tơgop dôm jĭt tất ‘nhot sa,tơmam sa gơih asong ăn khŭl jang tang găn jĭ tơ̆ pơlei tơm Hồ Chí Minh păng dôm dêh char găh pơbăh. Mŏ Thảo oei kơtă krao hơvơn păng pơgơ̆r 12 ‘măng bơ̆jang lăng găh tơring nhen jang tơgŭm kon pơlei, năm ngôi asong tơmam ăn dôm ŭnh hnam đei kŏng hăm kach mang, ŭnh teh đak teh đak tơgŭm, ŭnh hnam đei tơdrong arih sa mơmat tat hăm akŏp kơjă tơmam asong hloh 200 triệu hlak jên. Krao hơvơn tơgop jên tơgŭm jên hơmet jĭ ăn 1 ‘nu kang ƀô̆ xăh đei tơdrong arih sa mơmat tat. Dôm tơdrong jang âu đơ̆ng kŏng an xăh Quảng Điền đei kon pơlei lăng ‘lơ̆ng, kơdră chĕp kơ̆l tơring bơnê, pôk pơ ư. Thượng tá Lê Văn Tuấn, Kơdră vei lăng Kŏng an apŭng Krông Ana hơlen lăng: Yă Thảo hlôi hơtŏk ‘lơ̆ng hơnăp jang đơ̆ng bơngai chĕp kơ̆l kŏng an xăh. Sư tôch kơ pơnam, jang tôch tơnăp. Lơ̆m 3 sơnăm âu ki, yă Thảo kŭm đei Anih jang Đảng, kơdră chĕp kơ̆l Kŏng an apŭng Krông Ana păng Anih jang Đảng, Anih vei lăng kon pơlei xăh Quảng Điền lăng ‘lơ̆ng păng đei kon pơlei xăh Quảng Điền chih iŏk, ‘mêm kơ eng, tơgŭm tôch kơ lơ tơdrong jang ăn Kŏng ăn xăh Quảng Điền lơ̆m tơdrong bơ̆jang kiơ̆ hơnăp jang chĭnh trĭ tơ̆ tơring.

Hăm dôm tơdrong tơgop lơ̆m kơ plăh bơ̆jang,  Thiếu tá Lê Nguyễn Hiếu Thảo hlôi chơt hơiă đei iŏk hla ar Pôk pơ ư đơ̆ng Kơdră chĕp kơ̆l Anih vei lăng Kŏng an dêh char Dak Lak yua kơ hlôi đei jang hơgei lơ̆m tơdrong jang hơmet ming hành chính; Hla ar pôk pơ ư đơ̆ng Anih vei lăng kon pơlei apŭng Krông Ana găh jang hơgei hloh lơ̆m tơdrong jang pơ jei băl ‘mêm kơ teh đak jăl jang 2015 – 2020; Bằng khen đơ̆ng Kơdră Anih tơm vei lăng kŏng an găh jang hơgei hloh lơ̆m tơdrong jang hơdai, pơgơ̆r păng vang akŏm ‘măng pơlong rup phĭn ‘lơ̆ng, Video clip hơnăn “Dôm khŭl linh bơ̆jang vei lăng tơdrong arih sa sơđơ̆ng hiôk” sơnăm 2022. Thiếu tá Thảo tơroi, hăm sư, jang pơm kŏng an ‘noh jĭ tơdrong hưch hanh iŏk đơ̆ng oei ‘lơ̆p. Yua thoi noh, mă đơ̆ng yak hloh dôm tơdrong mơmat tat, gleh hrat, sư roi ‘mêm păng chhôk ‘nă hăm kơ mâu ao sư tŏk bŏk hrŭk păng oei hơnơ̆ng hơdrin plang jơhngơ̆m vă vei lăng tơdrong sơđơ̆ng ăn kon pơlei: Tơdrong jang ĭnh rơih iŏk ‘noh jĭ đơ̆ng ĭnh hưch hanh ‘mơ̆i. Đơ̆ng âu tơ̆ ning nai kơnh, ĭnh lăp ‘meh ‘noh jĭ ĭnh gô hơdrin jang tơgŭm păng gô đei dôm tơdrong pơ cheh vang tơgop jơhngơ̆m vă kon pơlei păng xăh âu tang găn tơdrong pơm glăi tơpôl 1 trong kơ tang hloh. Păng ‘meh tơ̆ hơnăp kơnh kon pơlei nhen dang ei, tơgŭm hăm khŭl linh kŏng an xăh lơ̆m tơdrong jang đĭ đăng kon pơlei vei lăng sơđơ̆ng teh đak.

Tơdrong jang tơnăp, đĭ jơhngơ̆m đơ̆ng Thiếu tá Lê Nguyễn Hiếu Thảo hlôi đei kon pơlei chih iŏk păng hôn bơnê. Kiơ̆ đơ̆ng noh tơgop pơm kơjăp dơ̆ng tơdrong ‘mêm tơklep hơdai đơ̆ng kon pơlei păng kŏng an, mĭnh ‘nu kon pơlei kŭm jing mĭnh “ ‘nu bơngai jang kŏng an”, jĭ bơngai jang tơgŭm vang tang găn dôm kơ loăi pơm glăi, vei kơjăp tơdrong sơđơ̆ng tơring pơlei pơla.