Atŭm hăm khul tôn ching chiêng bơngai ‘lŏ kră, pơlei Groi Wêt, tơring G’Lar, apŭng Đak Đoa, hlôi pơjing đei khul chĭng chêng hơ ioh hăm hloh 20 ‘nu hơ ioh.

Đei dôm bơngai kiơ̆ yok rok jơ̆ng vei lăng năng tông tơdrong oei sa joh ayŏ joăt joe sơ̆ ki tơ̆ pơlei đei hơnăp jang kơtang đơ̆ng rim bơngau nghệ nhân - đảng viên Alip. Oh Uyết, 13 sơnăm, khul chĭng chêng hơ ioh pơlei Groi Wêt, tơbăt:“Lơ̆m hŏk lăm 4 ĭnh pơhrăm tôn chĭng. ‘Măng mă blŭng tôch mơmat, mă lei roi đunh roi joăt. Ƀok Alip ba nhôn chă tông chĭng chêng tơ̆ au tơ̆ to, bơnê kơ ƀok Alip dêh".

Lơ̆m prăt vă jê̆ 20 sơnăm au, nghê̆ nhân Alip pă chăm hlôi pơtho tôn chĭng chêng ăn dôm grŭp bơngai ‘lŏ, đe hơ ioh tơ̆ rim pơlei pơla. Ƀok chơt hơ iă tơroi; Dang yơ đei đe hơ iŏh ‘mĕh pơhrăm tôn chĭng chêng ‘nŏh ƀok oei hơnơ̆ng chă pơtho ăn đĕch.“Ba hli hiong hiơt, kơna ba hơdrin chă pơtho ăn. Sơ̆ đe hơ ioh ưh kơ ‘mĕh pơhrăm, dang ei đe hăp ‘meh bơih, vang năm tôn pơlong dih băl tơ̆ lơ̆m tơring, apŭng, dêh char bơih. Ba jĭ bơngai đảng viên kơna ba hơdrin chă pơtho, hơpơi đơ̆ng rŏng au kơnh vei răk tơƀăk mong gei tơdrong jŏh ayŏ kơdŏ soang joăt joe kơ hơdrĕch hơdrung bơ̆n”.

Tơ̆ tơring G’lar, găh lơ bơngai Bahnar erih sa, rim đảng viên tŏk bŏk yŭk trong hơlau tơgŭm ăn kon pơlei vei răk tơƀăk mong tơdrong oei sa joăt joe sơ̆ ki păng atŏk tơ iung mŭk drăm-tơpôl. ‘Nhŏng Sin - Bí thư chi bộ, thôn trơng pơlei Dôr 1, ling lang chă pơtho khan ăn hơdruh tơdăm pơm kiơ̆ ‘lơ̆ng sơđơ̆ng trong nơnăm, vei lăng năng tông sơđơ̆ng tơring pơlei. Ŭnh hnam ‘nhŏng jei yŭk trong hơlau lơ̆m jang chehphe, pơtăm chehphe kiơ̆ trong pơkăp ‘lơ̆ng 4C păng chă pơtho khan kon pơlei jang kiơ̆ vă iŏk đei kơjăp:“Tơdrong yuk trong hơlau ‘nŏh ba ưh kơ pơma lơ, nơ̆rpơma tơ-‘ngla iung jang hloi, jang kơrŭn đĭ jơhngơ̆m păng vang chă tơgŭm dủu kon pơlei. ‘Meh vă xut xa pơngot rơvĕt tơjur dơnuh lei kăl jang sa pơnam, đơ̆ng noh mư̆h chă pơrô̆ pơrôp ‘noh kon pơlei mă mơ̆ng. Pơtih gia 2-3 sơnăm hơdrol, ba pơtăm ming chehphe, kon pơlei lăng ba jang hăm ‘lơ̆ng ưh, mư̆h ƀôh jing ‘lơ̆ng plei ăl ‘nŏh kon pơlei mă druh kiơ̆. Ba akhan chehphe đĭ kră đunh sơnăm ‘noh pă gan plei bơih kơna rô̆ pơtăm hle hăp plei lơ hloh".

Hrei au, Đảng bộ tơring Glar, apŭng Đak Đoa đei 15 chi ƀô̆ hăm 160 ‘nu đảng viên, lơ̆m au 100 ‘nu đảng viên kon kông. Rim đảng viên ling lang pơm jŭk yŭk trong hơlau jang ‘lơ̆ng rim tơdrong jang pơting dih băl ‘mêm kơ eng teh đak, vei lăng năng tông sơđơ̆ng tơring. Atŭm hăm tơdrong tơmơ̆t jên jang đơ̆ng Teh đak, tơdrong tơgoăt tơgoăl mĭnh nơ̆r ƀơ̆r đon kơjăp đơ̆ng pơđĭ khul chinh trĭ, kon pơlei lơ̆m tơring, G’Lar hlôi jang keh đang tơdrong jang tơ iung pơjing tơring tơrang ‘nao lơ̆m sơnăm 2017 sơ̆ păng tŏk bŏk tơ iung pơjing tơring ‘nao kiơ̆ tơdrong pơkăp kơtang hlŏh dơ̆ng. Ƀok Y Suôn- Kơ iĕng Bĭ thư Đảng tơring G’Lar, tơbăt:“Khul kơdră chĕp pơgơ̆r Đảng tơring lăng kơjăp bơ̆ jang tơ iung pơjing đảng viên păng đảng viên lơ̆m tơring pơlei kon kông. Hăm đảng viên kon kông kơtă ‘nŏh jing dôm bơngai kăl hloh lơ̆m bơ̆ jang pơtho tơbăt chinh trĭ, jơhngơ̆m đon ăn kon pơlei, vă atŏk kơtang hơnăp jang ‘lơ̆ng đảng viên, hơmet pơ ‘lơ̆ng jơhngơ̆m đon lui kiơ̆ ƀar păh đảng hăm kon pơlei lơ̆m tơring."

Hrei au lơ̆m tơring G’Lar lăp pă 4% ŭnh hnam dơnuh, rim tơdrong pơkăp jang kơ tơring tơrang ‘nao đei vei kơjăp, trong hnam pơlei pơla roi năr roi ‘lơ̆ng rŏ hơbŏ nhen. Tơdrong sơđơ̆ng đei vei kơjăp, mŭk drăm hơnơ̆ng atŏk tơ iung, tơdrong oei sa joh ayŏ kơdŏ soang ling lang vei răk tơƀăk mong, lơ̆m tơdrong jơnei au đei dôm tơdrong tơgop tih tên đơ̆ng rim đảng viên kon kông tơ̆ G’Lar, pơjing ăn pơlei pơla roi năr roi pơdrŏng ‘lơ̆ng liĕm.