Yak rok trong ƀê tŏng vă jê̆ 1km, să 4m, tơƀưh đơ̆ng plei Myah năm tơ̆ hơnih choh jang sa, ƀok Ksor Jinh (rơneh sơnăm 1950, oei tơ̆ xăh Ia Krai, apŭng Ia Grai) tơbăt, lăp đunh kơ âu 1 sơnăm, ‘nâu jĭ trong teh, să lăp 2 met, ‘mui ‘mê̆ ‘mach lơ̆m pơyan tŏ, tơ sĕr rơƀơ̆r pơm ăn lơ bơngai pơ̆k kơ gre mưh chơ chuĕn tơmam đơ̆ng choh jang sa lơ̆m pơyan ‘mi.

Iŏk đơ̆ng đei khŭl kơdră xăh roi tơbăt găh tơdrong teh đak tơgŭm kon pơlei pơm trong ƀê tŏng, ƀok Ksor Jinh hlôi plang song hơdrol 100m2, lơ kon pơlei lơ̆m pơlei lui ngeh, plang song kơ hrĕng met vuông teh vă pơih să păng pơm pơ keh trong: “Hơdrol sơ̆ trong nơnăm vih vơ̆t mơmat tat dêh, kon hơ ‘lơ̆p năm hŏk gleh dêh, bơngai ‘lŏ dôm ‘măng năm tơ̆ kơ chơ răt phe pŭ brŏk trong rơ ƀơ̆r hlŭt nơnăm mơ mat tôch kơ dêh. Đơ̆ng rŏng ‘măng tơƀơ̆p pơma dơnuh hăm bơngai tăh hla, xăh kŭm jur tơ̆ hơnih vă lăng păng kiơ̆ đơ̆ng dăr hơlen lăng yan âu, xăh kŭm hlôi đei tơdrong jang pơm trong, đơ̆ng rŏng ‘noh krao hơvơn kon pơlei plang song teh, phă tŏ sĕt ‘long cheh phe, điêu vă pơih să trong, nhôn kŭm tôch kơ hiôk jang kiơ̆. Klĕp truh dang ei trong hlôi đei pơih să, lăng kon hơ ‘lơ̆p năm hŏk kŭm tôch kơ sơđơ̆ng jơhngơ̆m păng hiôk ăn kơ kon pơlei jang chŭn mir chơ chuĕn tơmam đơ̆ng choh jang sa đei, tơdrong ‘nâu pơm ăn kơ rim bơngai chhôk hơiă dêh.”

Oei tơ̆ plei Nú, xăh Ia Khai, apŭng Ia Grai, kŭm đơ̆ng tơdrong jang plang song teh pơm trong, mă blŭng sơnăm 2023, trong ƀê tŏng kơ jung 800 mét, să 4 mét hlôi tơtom pơm đang hơdrol kơ pơyan phĕ điêu. Ƀok Rơ Châm H'Monh, bơngai đe lui yom plei Nú tơbăt, ƀơ̆t khŭl kơdră tơring krao hơvơn kon pơlei plang song teh, pơih să trong, lơ ŭnh hnam pơjăng yua kơ plang song teh ‘noh athei koh kơ hrĕng tơnơm điêu tŏk bŏk ăn phĕ plei rim sơnăm. Ƀok H'Monh iung jang hơdrol, koh 19 tơnơm ‘long kơ ŭnh hnam sư, đang kơ ‘noh krao hơvơn ‘nhŏng oh, kon sâu lơ̆m kơ tum kơ tŏng jang kiơ̆. Đơ̆ng noh, kŭm hăm tơdrong krao hơvơn hơdrin đơ̆ng khŭl vei lăng pơlei, 20 ŭnh hnam kon pơlei hlôi koh 300 tơnơm điêu tơ ter 2 păh trong vă trong ‘lơ̆ng gơh pơm đang. Ƀok H'Monh tơbăt: “Đơ̆ng năr pơjing tơring tơrang ‘nao, lơ̆m pơlei đei tơplih tôch kơ lơ, đei teh đak bơngơ̆t truh, tơgŭm ming man pơih să trong. Hrei ‘nâu, lơ trong lơ̆m pơlei đei pơm ƀê tŏng ‘lơ̆ng. Hơdrô̆ ŭnh hnam nhôn kŭm hlôi plang song 1 păh teh păng hlôi koh hŭt dôm tơnơm ‘long vă pơih să trong. Oei dôm ŭnh hnam nai tơdăh khŭl kơdră athei plang song teh, koh hŭt ‘long ‘noh kon pơlei kŭm kơchăng kơ dih pơm kiơ̆, yua kơ kon pơlei hlôh akhan teh đak kŭm ‘meh pơm tơdrong hiôk vă kon pơlei đei trong nơnăm ‘lơ̆ng rơgoh. Ĭnh chơt hơiă dêh păng bơnê tơdrong bơngơ̆t truh đơ̆ng khŭl kơdră.”

Vă jang kiơ̆ dôm tơdrong jang tơm teh đak găh pơjing tơring tơrang ‘nao păng hơtŏk tơiung mŭk drăm - tơpôl tơring kon kông, lơ sơnăm kơ âu, kơdră đảng, kơdră apŭng Ia Grai, dêh char Gia Lai hlôi krao hơvơn tơdrong mơ̆t jang đơ̆ng pơ đĭ khŭl jang chĭnh trĭ, kon pơlei păng anih mơdro sa. Lơ̆m noh, tơdrong tơm đơ̆ng apŭng ‘noh jĭ tơgŭm hơdrol tơring kon pơlei kon kông, tơring mơmat tat; tơgŭm hơdrol hơtŏk tơiung trong nơnăm, pơm tơdrong ‘lơ̆ng ăn hơtŏk tơiung mŭk drăm, tơpôl. Kiơ̆ đơ̆ng noh, tơdrong jang plang song teh pơm trong, vă bơ̆jang kiơ̆ dôm tơdrong jang, đei kon pơlei drơ̆ng lăp, jang kiơ̆. Hơdrô̆ đơ̆ng sơnăm 2020 truh dang ei, lơ̆m apŭng jô̆ pơhlom hlôi krao hơvơn dôm jĭt rơbâu ŭnh hnam kon pơlei, plang song akŏp kơ sô̆ hloh 20.000 m2 teh. Lơ̆m kơ sô̆ ‘noh, dôm xăh đei lơ kon pơlei kon kông nhen Ia Krai, Ia Khai, Ia Yok, Ia O,... jĭ dôm tơring đei lơ trong jang hơiă, đei yua. Kiơ̆ kơ ‘noh, kang ƀô̆, đảng viên, bơngai đei đe lui yom, kră pơlei hơgei ling lang jĭ khŭl jang hơ drol lơ̆m tơdrong jang krao hơvơn,  đơ̆ng noh pơm tơdrong drơ̆ng lăp, lui ngeh păng jang kiơ̆ đơ̆ng kon pơlei. Yă Nguyễn Mai Lương- Kơdră Anih vei lăng kon pơlei xăh Ia Khai, apŭng Ia Grai tơbăt: “Xăh hlôi hôp kŭm hơvơn kră pơlei, bí thư chi bộ păng mă loi ‘noh jĭ bơngai đei đe lui yom lơ̆m tơring. Lơ̆m kơplăh bơ̆jang kiơ̆, trong jang kăl ‘noh jĭ ‘mi hngach yôm đunh, năr ‘nâu đe sư tam mă hlôh ‘noh ‘năr dơning nhôn jur năm dơ̆ng, năr ‘nâu klăih song bơngai âu jur pơ lung ‘noh ‘năr dơning klăih song bơngai nai dơ̆ng. Tơdăh nhen ŭnh hnam ‘noh đei bơngai jang lơ̆m Khŭl vei lăng kon pơlei jang chŭn mir, bơngai jang lơ̆m Khŭl vei lăng drŏ kăn ‘noh nhôn ăn kơdră vei lăng khŭl drŏ kăn, tơblang hơdăh ăn kơ kon pơlei hlôh.”

Trong nơnăm roi ‘năr roi ‘lơ̆ng hlôi tơgŭm tơdrong mơdro sa đơ̆ng dôm pơlei hơtăih hơtŏ, tơring kon pơlei kon kông hiôk ƀônh ƀiơ̆, jĭ tơdrong ‘lơ̆ng vă đảng bộ, khŭl kơdră păng kon pơlei tơring sơlam dơnuh hin Ia Grai hơdrin pơjing tơdrong arih sa roi ‘năr roi phĭ tơnŏ, ‘lơ̆ng hơiă.