Sơnăm ‘nâu jĭ sơnăm mă blŭng, hơbong pởo đak đơ̆ng Dơnâu đak Ia Mơr hlôi pơm đang, pơro đak tơ̆ kơdơ chŭn na kơ kon pơlei plei Klah, xăh Ia Mơr. ‘Nâu kŭm jing sơnăm mă blŭng, kon pơlei bơngai Jrai tơ̆ Ia Mơr pơtăm ƀa đak mă hlôi lăp pơtăm đei ƀa roh. Ƀok Siu Thọ- bơngai pơgơ̆r pơlei tơbăt, ƀơ̆t blŭng pơyan jang, kon pơlei oei ưh kơ gan băt, mă lei iŏk yua kŭm đei 4 tấn lơ̆m1 hek tar, hloh 4 ‘măng ƀa roh. Iŏk yua âu tơgŭm dôm ŭnh hnam kon pơlei lơ̆m pơlei lui yak mơ̆t lơ̆m pơgang jang ƀa phang:

Sơ̆ jang 1 pơyan ƀa iŏk yua 1 sơnăm lăp iŏk đei đơ̆ng 1-2 tạ ƀa đĕch, dang ei jang đei 2 pơyan 1 sơnăm iŏk đei đơ̆ng 7-8 tấn lơ̆m 1 hek tar. Kon pơlei hrei ‘nâu yua hơdrĕch ƀa ‘nao plei tôch kơ lơ, kon pơlei tôch kơ chhôk hơiă. Bơnê kơ Đảng, teh đak hlôi tơgŭm kon pơlei.

Kŭm hăm tơdrong jang dơnâu mong đak tih hơtŏk đei yua, anih tĕch mơdro kơ su kŭm tơiung ming rơđăh ‘lơ̆ng hloh, tơgŭm dôm anih tĕch mơdro jang sa đei, pơm dơ̆ng tơdrong jang păng sơđơ̆ng iŏk yua ăn bơngai jang tơring. Rơ Lan Bên, rơneh sơnăm 1995, oei tơ̆ plei Khôi, xăh Ia Mơr chhôk hơiă tơbăt, sơnăm ‘nâu jên khei kơ bre klo kăn sư sơ đơ̆ng tơ̆ kơ sô̆ đơ̆ng 13 truh 15 triệu hlak jên 1 khei. ‘Ngoaih kơ ‘noh, ŭnh hnam oei đei hơdrô̆ 2 sao cheh phe, 6 sao ƀa păng dôm tŏ rơmo, kơ na kŭm đei jên chă pơ đom:

“ Đơ̆ng năr mơ̆t jang kŏng nhân ăn Kŏng ti kơ su đe sư hơgăt ăn kơ ĭnh chrek kơ tăk kơ su lơ̆m 3 sơnăm, đơ̆ng rŏng 3 sơnăm ĭnh iŏk jên ‘noh pơm hnam đĭ  200 triệu hlak jên. Sơnăm đơ̆ng rŏng dơ̆ng ‘noh ĭnh tơplih gre ‘nao 57 triệu kơ loăi gre Sonic, đang kơ ‘noh jên ăn kon hŏk pơhrăm. Lơ̆m hnam răt tôm tơmam, dang ei ŭnh hnam sơđơ̆ng ƀiơ̆ bơih. Sơ̆ ŭnh hnam nhôn mơ mat tat dêh, dang ei ‘noh ưh pă bơngơ̆t kơ pơngot mơmat dơ̆ng bơih.”

Ia Mơr jĭ xăh sơlam đei tơdrong joăt joe kach mang, tŏk bŏk đei pơjing anih jang kăl tôm păng sơng lơ tơdrong hiôk hơtŏk tơiung ‘nao. Ƀok Nguyễn Tuấn Anh- Phŏ Kơdră Anih vei lăng kon pơlei xăh tơbăt, ŭnh điên hlôi chô̆ truh jơ̆p pơlei pơla; dôm tơdrong jang nhen hnam hŏk hôp tơ pôl, hnam trưng, hnam pơgang xăh kŭm đei pơm hơmet, pơm ‘nao tôm. Mă loi ‘noh jĭ, trong nơ năm lơ̆m pơlei, tơ̆ chŭn na klĕp truh tơ̆ trong lơ̆m dêh char tă kơ hlôi păng vă jê̆ đei pơm đang, tơgŭm Ia Mơ năm vih vơ̆t, mơdro sa hiôk hian. Ƀok Nguyễn Tuấn Anh pơma hơdăh:

“Trong nơnăm hrei ‘nâu kŭm đĭ sơđơ̆ng bơ̆ih, hơmet ăn va wpơm đang trong lơ̆m dêh char 665 păng hơbong đak lơ̆m chŭn na. ‘Nâu jĭ dôm tơdrong gĭt kăl vă kon pơlei chơ chuĕn tơmam, pơtrŭt mŭk drăm tơ̆ xăh Ia Mơr hơtŏk tơiung.”

Mă đơ̆ng tơdrong arih sa kơ kon pơlei xăh sơlam Ia Mơr, apŭng Chư Prông oei lơ mơmat tat, mă lei kŭm hăm tơdrong bơngơ̆t truh tơmơ̆t jên jang đơ̆ng rim kơdră chĕp kơ̆l, kon pơlei dôm hơdrĕch hơdrŭng tơ̆ âu tŏk bŏk roi ‘năr roi đei lơ tơdrong hiôk hloh, pơm tơdrong ‘lơ̆ng tơgŭm kon pơlei hơdrin jang tŏk pơjing tơdrong arih sa phĭ tơnŏ, hơtŏk tơiung; tơgop vei kơjăp tơdrong sơđơ̆ng tơ̆ tơring sơlam păh pơmơ̆t kơ teh đak.