Yak ngôi rok trong bê tông rơgŏh ‘lơ̆ng, ƀrŭng ƀrăng tơter jih trong pơkao tơlang, tơƀưh đơ̆ng plei Ia Nueng lĕch tơ̆ Anih ‘lơ̆ng rŏ Biển Hồ, kră pơlei Hmrick chơt hơiă tơroi, ‘nâu jĭ 1 lơ̆m dôm tŏ trong đei pơm đơ̆ng tơdrong pơjing tơring tơrang ‘nao, đei teh đak tơgŭm jên man, oei kon pơlei ‘nŏh tơgop kŏng jang. Trong pơlei rơgŏh ‘lơ̆ng ưh lăp tơgŭm ăn plei Ia Nueng roi ‘lơ̆ng đĕch, mă kon pơlei chă chơ chuĕn tơmam tôch hiôk dơ̆ng. Dang ei, lơ̆m plei hnam yơ kŭm đei hnam chă pơyơng ngăl, ưh pă đei rong hơchăng kon tơrong hơla hnam kơjung nhen adrol sơ̆ bơih.

Kră pơlei hơnơ̆ng tơtă ăn kon sâu pơm kiơ̆ ‘lơ̆ng dôm trong jang đơ̆ng Đảng păng teh đak: “Xăh biển Hồ adrin pơjing tơring tơrang ‘nao đei ƀôh nhen dôm tơdrong hơgăt hlôi đei tơlĕch. Lơ̆m sơnăm 2024 ‘nâu, nhôn vă adrin krao hơvơn kon pơlei, pơtho ăn kon pơlei hlôh vao vang bơ̆ jang pơjing xăh tơring tơrang ‘nao đei ƀôh. Mih ma duch nă lơ̆m pơlei athei adrin kŭm hăm khul kơdră pơgơ̆r tơring, pơlei pơla, roi tơƀôh ăn mih ma duch nă băt hơdăh vă kon pơlei mât 1 jơhngâm, kŭm hăm khul kơdră tơring jang trŏ dôm tơdrong hơgăt đei tơlĕch”.

Tơtil plei Ia Nueng, ‘nŏh jĭ plei Phung kŭm đei lơ tơdrong tơplih tôch ‘lơ̆ng. Ưh lăp trong bê tông ‘nao, hnam hŏk hôp tơpôl đei man kơjăp, mă tơdrong juăt, joh ayŏ kơ dŏ xoang đơ̆ng kon pơlei roi đunh roi tŏk ‘lơ̆ng. Ƀok Đưk, ƀok pơgơ̆r plei Phung tơroi, drŏ kăn lơ̆m pơlei hlôi pơjing đei HTX tanh brai vai khăn, dar dĕh pơm juăt hăm tơdrong tĕch mơdro dôm tơmam đơ̆ng tanh sĭt, hơdai hăm pơvih pơvăn. Lơ̆m pơlei kŭm đei khul tôn chĭng hăm 43 ‘nu bơngai, jĭ khul ngôi pơchơt tôch hơiă đơ̆ng đe druh dăm.

Ƀok Đưk tơroi, sơnăm 2024, kon pơlei tơ̆ plei Phung hơnơ̆ng adrin jang pơkĕh dôm tơdrong hơgăt oei pơlôh pơlônh: “’Nao âu plei Phung ‘nao đei chih tơbăt jĭ tơring tơrang ‘nao, tơdrong ‘nâu pơm ăn mih ma duch nă tôch hơiă yoa đei Đảng, teh đak tơgŭm, dang ei mih ma duch nă lơ̆m pơlei adrin răt ƀao hiêm y tê̆. Kiơ̆ đơ̆ng nơ̆r roi tơƀôh mih ma duch nă băt hơdăh tơdrong đei yoa, yoa mưh jĭ jăn, năm khăm hơmet jĭ sư da ƀiơ̆ hiong huach jên ƀiơ̆. Mă 2 dơ̆ng rim unh hnam lơ̆m pơlei kŭm adrin hơmet pơ ‘lơ̆ng cham char arih xa, pơih xă trong, vei lăng rơgŏh pơlei pơla, adrin jang xa, atŏk tơiung mŭk drăm lơ̆m unh hnam, đơ̆ng rŏng kơ ‘nŏh dơ̆ng jĭ tơdrong chih hơnăn hăm điên tư nhôn vă adrin tơgŭm vă đĭ đăng kon pơlei pơm đang hơnăn định danh điên tư ngăl”.

Kiơ̆ yă Đinh Thị Hoa- Phŏ Kơdră vei lăng kon pơlei xăh Biển Hồ truh dang ei xăh đĭ jang đei 16/19 tơdrong hơgăt tơring tơrang ‘nao đei ƀôh. Kiơ̆ kơ ‘nŏh, đĭ đăng trong tơ̆ pơlei pơla, kơjung truh 20km đei man hăm bê tông ngăl, hlŏh 17km trong năm tơ̆ mir, kơdơ chŭn đei man kơjăp ‘lơ̆ng. Dôm tơdrong ƀơm truh joh ayŏ kơ dŏ xoang nhen rông, hnam hŏk hôp tơpôl đei man kơjăp ‘lơ̆ng. Tơ̆ rim pơlei, mih maduch nă roi vă juăt hăm tơdrong choh jang xa kiơ̆ tơdrong hơgăt ‘lơ̆ng, hlŏh 90% tĕh choh jang xa jang choh jang hăm kơmăy, tơruih kơ dih păng gơ̆h ‘mơ ‘met. Dôm tơdrong ƀơm truh tơdrong arih xa nhen sŏ yoa đak rơgŏh, khăm hơmet jĭ, đei anih ngôi pơchơt đĭ đei ngăl bơih. Mă lei, yoa oei chĕp vei hloi 1,2 tơdrong juăt ưh ‘lơ̆ng kơna 1,2 tơdrong hơgăt nhen 3% kơsô̆ bơngai lôch đei sŏh hŭt hơ kâu, dăh mă tơdrong hơgăt chih hơnăn định danh điên tư, pơgơ̆r choh jang xa, athei hơnơ̆ng adrin jang pơkĕh lơ̆m dôm sơnăm đơ̆ng rŏng dơ̆ng.

“Sơnăm ‘nâu jang xa iŏk yoa jô̆ păh lăp kiơ̆ kơ̆l bơngai ‘nŏh 57,6 triu 1 ‘nu 1 sơnăm lơ hlŏh kơsô̆ tơlĕch bơih. Mă 2 anih jang, trong nơnăm lơ̆m xăh hlôi đei man ‘lơ̆ng, trong ƀê tông đei man truh 97%, păng oei adrin jang pơkĕh lơ̆m sơnăm 2023. Tơdrong arih xa kơ kon pơlei ‘nŏh tŏk roi ‘lơ̆ng, jang xa đei iŏk yoa roi lơ. Tơdrong pơjing tơring tơrang ‘nao đei ƀôh hơnhăk ba lơ tơdrong đei yoa, trŏ hăm trong jang Kon pơlei băt, kon pơlei jang păng kon pơlei xa yoa”.

Hăm tơdrong mât mĭnh ƀơ̆r đon, mĭnh jơhngâm hơmet pơ ‘lơ̆ng dôm tơdrong pơmat tat, khul kơdră pơgơ̆r păng kon pơlei xăh Biển Hồ, plt Pleiku oei hơnơ̆ng pơjing tơring tơrang ‘nao đei ƀôh roi đunh roi tŏk ‘lơ̆ng rŏ tơ̆ groi kông Gia Lai.