Yă Đinh Thị Ngoại- Kơdră Chi hội drŏ kăn plei Lơk, xăh Nghĩa An, apŭng K’Bang tơbăt, jang kiơ̆ tơdrong jang mĭnh jơhngơ̆m pơjing tơring tơrang ‘nao, 5 sơnăm âu ki, kon pơlei lơ̆m pơlei tơgop kơ hrĕng năr jang păng hloh 1 ti hlak jên, yuih kơ dih dur var vă pơih să trong lơ̆m pơlei, pơm ‘nao 4 tŏ trong năm tơ̆ chŭn na. 5 ŭnh hnam dơnuh hin đei tơgŭm sut hnam hiăh hyot.

Sơnăm 2022, iŏk yua jô̆ păh lăp kơ̆l bơngai đei 41 triệu hlak jên 1 ‘nu, kơ sô̆ ŭnh hnam dơnuh hin jur lơ, lơ̆m pơlei ưh pă đei hnam pơgia. Yă Đinh Thị Ngoại tơbăt: “Lơ̆m tơdrong jang pơjing tơring tơrang ‘nao, kon pơlei plei Lơk hlôi hơdrin vang jang, jang kiơ̆ tơdrong jang, 1 jơhngơ̆m đon hăm băl, ming man trong ƀê tŏng ‘lơ̆ng, trong lơ̆m pơlei. Đơ̆ng rŏng kơ tơ mơ̆t yua khoa hŏk ki thuơ̆t lơ̆m jang sa ‘noh iŏk yua hlôi păi ƀiơ̆, pơlei rơgoh ƀiơ̆, mŭk drăm hơtŏk tơiung ƀiơ̆ pơ têng hăm hơdrol.”

 Plei Lơk jĭ 1 lơ̆m dôm kơ sô̆ 206 pơlei bơngai kon kông tơ̆ dêh char Gia Lai hlôi tơplih rim tơdrong ƀơ̆t tơlĕch jang kiơ̆ tơdrong tơchơ̆t kơ sô̆ 12 đơ̆ng Khŭl chĕp kơ̆l pơgơ̆r Anih jang Đảng dêh char găh hơtŏk loi dơ̆ng tơdrong chĕp kơ̆l đơ̆ng rim kơdră đảng găh pơjing plei tơring tơrang ‘nao lơ̆m kon pơlei kon kông. Kiơ̆ kơ ‘noh, hăm jên jang teh đak păng tơpôl tơgop vă jê̆ 1.500 ti hlak jên, hơ dai hăm tơdrong tơgop hloh 96.500 năr jang, păng kon pơlei plang song hloh 400.000m2 teh. Đơ̆ng rŏng 5 sơnăm, dang ei lơ̆m dêh char đei 110 pơlei bơngai kon kông jang đang ‘lơ̆ng tơring tơrang ‘nao, tơdrong arih sa kơ kon pơlei roi ‘năr roi đei hơtŏk.

Vă hơnơ̆ng hơtŏk iŏk yua dôm jên jang đơ̆ng tơ pôl tơgŭm kon pơlei tơ jur dơnuh hin kơ jăp, tơ̆ Hop akŏm pơ tôch 5 sơnăm bơ̆jang kiơ̆ tơdrong tơchơ̆t 12, ƀok Hồ Văn Niên- Bí thư Anih jang Đảng dêh char Gia Lai athei: “Khŭl jang chĭnh trĭ athei mơ̆t jang kơ tang, hrơ̆ch 1 ‘măng, đei yua, hơnơ̆ng păng tơ pă; hơvơn păng iŏk yua đei jơnei, tơgep dôm kon jên đơ̆ng dôm tơdrong jang; tơgŭm kon pơlei gơh yua dôm jên asong tŏk iŏk. Dôm anih jang kơ dêh char tơ tom băt hơdăh mơmat tat, tơ hlăk tơhlĭn vă pơtho dăh mă tơtom apĭnh kơ dră gơh kĭ ăn set hơlen, hơmet pơ ‘lơ̆ng. Hơdrin, bơ̆jang kiơ̆ kơtang hloh dơ̆ng, vă đei yua đơ̆ng tơdrong tơchơ̆t 12 tơpă truh hăm Kon pơlei”.