Khei 7 âu ki, tơ̆ dêh char Bình Định, Khŭl bơ̆jang kơ Phŏ Thủ tướng Trần Lưu Quang bơ̆jang kơtă păng trực tuyến hăm 19 dêh char, pơlei tơm tơring găh Tu tŏk bŏk, tơ ter đak dơ sĭ tơring tŏk bŏk păng tơring Tây Nguyên găh tơdrong bơ̆jang kiơ̆ dôm tơdrong jang tơm Teh đak.

Jăl jang 2021-2025, Trung ương pơjao akŏp jên tơmơ̆t jang hơtŏk tơiung hloh 39 rơbâu ti hlak jên ăn kơ dôm tơring găh Tu tŏk bŏk, tơ ter đak dơ sĭ tơring Tŏk bŏk păng Tây Nguyên vă bơ̆jang kiơ̆ 3 tơdrong jang tơm Teh đak. Hrei ‘nâu, 17/19 tơring hlôi bơ̆jang kiơ̆ tơ lĕch jên jang tơring vă bơ̆jang dôm tơdrong jang tơm Teh đak. Lơ̆m noh, pơlei tơm Đà Nẵng hlôi bơ̆jang tơlĕch jên hloh 93% jên jang tơring. Dôm dêh char Nghệ An, Quảng Nam, Bình Định, Khánh Hòa, Lâm Đồng găh grŭp dơ̆ng hơdrol găh kơ sô̆ tơlĕch jên jang hloh 30%.

Pơma tơ̆ Hop akŏm, Phŏ Thủ tướng Trần Lưu Quang tơroi rơđăh, tơdrong tơm Teh đak lăng truh tơdrong bơngơ̆t ăn kon pơlei tơ̆ tơring tơrang, tơring kon pơlei kon kông păng ŭnh hnam mơmat tat ‘noh jĭ 1 trong jang tơgŭm tôch kơ ‘lơ̆ng. Pơtêng hăm sơnăm 2022, dôm anih jang păng tơring hlôi đei lơ hơmet pơ ‘lơ̆ng găh trong jang tơgŭm. Mă lei tơ̆ 1,2 tơring, tơdrong tơlĕch jên jang ăn pơ đĭ 3 tơdrong jang tơm teh đak lăp iŏk đei dang 8%. Lơ̆m tơdrong mơmat tat găh khei ‘năr, kŭm nhen trong jang oei 1,2 tơhlăk tơhlĭn, Phŏ Thủ tướng Trần Lưu Quang athei dôm tơring hơtŏk ‘lơ̆ng hơnăp jang, hơdrin, kơchăng păng mă kơ tang hloh lơ̆m tơlĕch jang dôm tơdrong jang tơm teh đak: “Găh Trung ương nhôn pŭ hơnăp jang hơdrol pămg gô hơnơ̆ng hơmet ming, pơtho hrĕnh hloh dôm tơdrong mă iĕm oei tơhlăk tơhlĭn. Găh iĕm, ĭnh athei jang tơnăp, hơdrin kơchăng păng mă kơ tang hloh lơ̆m tơlĕch jang dôm tơdrong jang, tơdrong kiơ tơhlăk apĭnh trung ương păng apĭnh dôm anih tơm anih jang. Ĭnh kŭm athei dôm anih tơm anih jang, pêng anih jang pơgơ̆r tơgoăt ‘lơ̆ng hloh dôm tơring păng tơtom răp mơ̆ng dôm nơ̆r tơgop oei tơhlăk.”

Kiơ̆ kơ Anih tơm tĕch nơ̆r sơkơ̆t păng tơmơ̆t jên jang, hrei ‘nâu dôm tơdrong jang tơm teh đak oei mơmat tat, tơhlăk tơhlĭn lơ̆m tơdrong jang vei lăng, pơgơ̆r jang, bơ̆jang kiơ̆. Mă hơdăh dôm tơdrong jang đei kĭ ăn, hơgăt jên iŏk hơdrol đơ̆ng rŏng khei ‘năr tơlĕch jang jên păh lăp khei ‘năr jên jang teh đak jăl jang  2021-2025 đơ̆ng dôm tơring, yua thoi noh tơdrong hơmet ăn jên iŏk hơdrol vă bơ̆jang kiơ̆ dôm tơdrong jang kiơ̆ kơ sô̆ hơgăt ‘noh tôch kơ hơnat vei sơđơ̆ng ‘lơ̆ng. Jên tơdrong jang đei pơjao kiơ̆ rim sơnăm păng klăih song kiơ̆ tơdrong hơdăh pơm ăn tơring mơmat tat lơ̆m tơdrong băt hơdăh tơdrong jang tơm kơ jăl jang păng tơplih jên đơ̆ng dôm tơdrong lơ̆m tơdrong jang vă pơm lăp hăm tơdrong hiôk yan âu. Kơdră tơm, Kơdră vei lăng Anih jang Khŭl kơdră teh đak Trần Văn Sơn tơbăt: “Pêng tơdrong jang tơm teh đak, hrei ‘nâu Khŭl kơdră teh đak pơjing 26 khŭl rim bơngai jang lơ̆m Khŭl kơdră teh đak chĕp kơ̆l kơtă jur tơ̆ rim dêh char. Âu ki Khŭl kơdră teh đak tơlĕch tơchơ̆t 1 khei jur kơ tă vă hơmet pơ ‘lơ̆ng mơmat tat. Yua kơ hrei ‘nâu jur tơ̆ tơring ƀôh akhan mơmat tat tơhlăk tơhlĭn dêh ‘noh athei akŏm hơmet pơ ‘lơ̆ng, mă athei hơmet pơ ‘lơ̆ng đơ̆ng yan âu dôm tơring.”

Vă hơnơ̆ng tŭn hrĕnh tơdrong jang tơlĕch jên bơ̆jang dôm tơdrong jang tơm teh đak păng bơ̆jang kiơ̆ đei yua tơdrong Tơchơ̆t kơ sô̆ 100 đơ̆ng ‘măng hop akŏm mă 5 Kuôk hô̆i jăl 15, Thủ tướng Teh đak athei, dôm anih tơm, anih jang tơring kiơ̆ hơnăp jang đei pơjao jăh tơ tĕnh jang hơdai hăm Anih tơm vei lăng jên hu păng dôm anih tơm, anih jang tơ ‘ngla tơdrong jang vă tơroi tơbăt kơ sô̆ jên tơdrong jang sơnăm 2024 păng 2025 ăn kơ dôm anih tơm, anih jang Trung ương păng tơring kiơ̆ tơdrong hơgăt tơ̆ Tơchơ̆t kơ sô̆ 38 sơnăm 2023 đơ̆ng Khŭl kơdră teh đak.

Anih jang vei lăng hơdrĕch kon kông hăt hot pơgơ̆r, jang hơdai hăm dôm anih tơm, anih jang tơ ‘ngla tơdrong jang dăr hơlen đĭ đăng Tơdrong jang tơm teh đak hơtŏk tơiung mŭk drăm - tơpôl tơring kon pơlei kon kông păng tơring groi kông jăl jang I; Pơjing hla ar hô sơ athei hơmet ming tơdrong Tơchơ̆t kĭ ăn Tơdrong jang kiơ̆ ƀlep tơdrong hơgăt, tơ rih, hla ar đơ̆ng khôi luơ̆t găh tơmơ̆t jên jang teh đak, roi tơbăt ăn Thủ tướng teh đak păng vang gơih kơ Anih tơm tơlĕch nơ̆r sơkơ̆t păng tơmơ̆t jên jang lơ̆m khei 8 sơnăm 2023. 

Anih tơm vei lăng jên hu tơ tĕnh pơgơ̆r, jang hơdai hăm dôm anih tơm, anih jang ƀơm truh jang đang tơdrong hơmet ming, tơmơ̆t dơ̆ng dôm tơdrong tơchơ̆t găh jên tơdrong jang bơ̆jang kiơ̆ dôm tơdrong jang tơm teh đak.