Tơ chă hơ drĕch ‘long pơ tăm kon tơ rong vă hơ tŏk iŏk yua, hloh 4 sơ năm hơ drol, đảng viên mơ lôh Ly Seo Lử oei tơ̆ plei sơ lam Lũng Pô, xăh A Mú Sung, apŭng Bát Xát hlôi răt 100 tơ nơm pơ ŏ nô brŏk pơ tăm tơ̆ teh pơ gar  krang kơ ŭnh hnam. ‘Nhŏng kŭm krao hơ vơn kon pơ lei lơ̆m pơ lei vang pơ tăm vă pơm jing tơ ring tơ mam. ‘Nhŏng Lý Seo Lử, plei Lũng Pô, xăh A Mú Sung, apŭng Bát Xát tơ roi:

Pơ tăm ‘long prit ‘noh đa đei hơ drông sa, ‘long ƀum ƀlang pơ tăm lơ sơ năm ‘noh pơm kơ teh kơ nê̆ kơ na ĭnh tơ plih jing pơ tăm ‘long sa plei, tơ̆ âu ‘noh ‘long pơ ŏ. Blŭng a ‘long oei iĕ ba athei vei lăng, mă đơ̆ng sơ năm mă 3 ‘long ăn iŏk yua kŭm tôch kơ lơ.

Ƀok Ma Seo Lằng, Bí thư Chi bộ plei Lũng Pô, xăh A Mú Sung tơ băt, akŏp teh pơ ŏ tơ̆ pơ lei ‘noh 4 hek tar. Lơ̆m noh đei lơ hơ găt teh pơ tơm ăn iŏk yua plei sơ năm mă mônh, mă 2 păng pơ ŏ gô jing ‘long pơ tăm tơm vă hơ tŏk tơ iung mŭk drăm kơ pơ lei.

Đei tơ drong bơ ngơ̆t truh đơ̆ng xăh gô hơ nhăk ‘long pơ ŏ Lũng Pô lơ̆m OCOP kơ xăh A Mú Sung. Ĭnh akhan ‘nâu kŭm jing 1 ‘long sut pơ ngot tơ jur dơ nuh hin kơ jăp tơ̆ plei Lũng Pô.

Kŭm hăm ‘meh vă pơm đei dôm hơ yak ‘lơ̆ng lơ̆m hơ tŏk tơ iung mŭk drăm tơ̆ tơ ring, 2 sơ năm hơ drol, ‘nhŏng Chảo Láo Tả, Phŏ kơ dră Khŭl vei lăng kon pơ lei jang chun mir xăh Dền Sáng jĭ 1 lơ̆m 10 ŭnh hnam kon pơ lei jang hơdrol vang jang tơ drong jang pơ tăm gui yuăn. Truh dang ei, hơ drơng gui yuăn tơ gŭm ŭnh hnam ‘nhŏng Tả đei dơ̆ng iŏk yua.

Năm hơ drol păng pơ tăm pơ long lăng 40 tơm. Yak blŭng ăn iŏk yua vă jê̆ 10 triệu hlak jên. Kŭm tôch kơ ‘meh vă kon pơ lei lơ̆m xăh păng tơ̆ dôm xăh nai tơ dăh tŏ ‘mi kial lăp ‘noh ‘long âu gô jing 1 ‘long tơm vă sut pơ ngot tơ jur dơ nuh hin, hơ tŏk tơ iung kơ jăp.

‘Nhŏng Tẩn Láo Tả, plei Nậm Giàng, xăh Dền Sáng, apŭng Bát Xát kŭm ‘meh vă hŏk pơ hrăm tơ drong jang âu vă pơ yan pơ tăm ‘nao hơ tŏk kơ sô̆ tơm dui yuăn, hơ tŏk iŏk yua ăn ŭnh hnam.

Ŭnh hnam nhôn ‘noh ‘măng ‘noh kŭm chih măt pơ tăm mă lei pơ tăm tŏ sĕt đĕch. ‘Măng âu kŭm ‘meh năm lăng năng dôm ŭnh hnam pơ tăm lơ ‘noh bluh jing đơ̆ng ‘long thoi yơ đang kơ ‘noh ĭnh kŭm ‘meh vă găh ŭnh hnam pơ tăm dơ̆ng dang 3 – 400 tơ nơm dơ̆ng vă hơ tŏk tơ iung dơ̆ng iŏk yua ŭnh hnam.

Tơ̆ Bát Xát, ‘ngoăih kơ pơ gơ̆r tơ drong jang pơ jing mŭk drăm, sut pơ ngot, tơ jur dơ nuh hin, dôm đảng viên kŭm năm hơ drol lơ̆m tơ drong tơ roi tơ băt krao hơ vơn, tơ gop tơ gŭm ŭnh hnam vă pơ jing tơ ring tơ rang ‘nao. Nhen tơ gŭm ŭnh hnam dơ nuh hin pơm hnam oei, hnam chă pơ yơ̆ng dăh mă tơ gŭm pơ lei pơm trong.... Bí thư Đảng xăh Trịnh Tường: Lầu A Páo hlôi păng tŏk bŏk tơ gop hơ nhăk Tơ drong jang pơ jing tơ ring tơ rang ‘nao tơ̆ tơ ring âu đei tơ drong ‘lơ̆ng rơ đăh rơ đong. Mŏ Tẩn Lở Mẩy oei tơ̆ plei Nà Đoong tơ roi:

Hnam oei so kơ oh tơ̆ kơ pal to sư hiăh hiot đĭ bơih. Đei ‘nhŏng Páo năm lăng ƀôh hnam oh hiah kơ na apĭnh ăn kơ oh hnam ie iĕ. Oh chhôk dêh.

Ƀok Giàng A Sáo păng mŏ Tẩn Lở Mẩy oei tơ̆ plei Nà Đoong lăp jing 2 lơ̆m kơ sô̆ dôm ŭnh hnam dơ nuh hin lơ̆m xăh Trịnh Tường đei tơ gŭm pơm hnam ‘nao. Păng vă jang đei tơ drong ‘noh, Bí thư đảng xăh Lầu A Páo đei tơ gop tôch kơ lơ.

Ĭnh kŭm hăm đe kang ƀô̆ xăh kơ tă năm dăr hơ len hơ dăh dôm ŭnh hnam dơ nuh hin vă đei um rup, hơ kâu tơ pă găh tơ drong arih sa kơ kon pơ lei, đơ̆ng noh gơ nang đơ̆ng tơ drong tơ gŭm đơ̆ng khŭl jang, anih jang mơ dro sa tơ gŭm ming man ‘lơ̆ng hnam oei ăn kơ Kon pơ lei.

Hlôh đei tơ drong mŭk drăm kơ lơ kon pơ lei lơ̆m xăh oei mơ mat, tơ drong ming man đei 1 pôm hnam kơ jăp vă oei, dăh mă pơm đei 1 jăl trong năm vih vơ̆t hiôk gô ưh kơ ƀônh. Bí thư Đảng xăh Lầu A Páo hlôi pơm jŭk yŭk trong hơ lâu, năm hơ drol tơ gop, krao hơ vơn dôm anih jang mơ dro sa tơ gŭm pơ jing tơ ring tơ rang ‘nao. ‘Nhŏng Lý Xá Xe, Phŏ kơ dră Anih krao hơ vơn xăh Trịnh Tường, apŭng Bát Xát hơ len lăng:

Hăm dôm ŭnh hnam mơ mat tat găh mŭk drăm, ‘noh đŏng chĭ Páo hlôi krao hơ vơn bơ ngai đei jơ hngơ̆m đon ‘mêm mơ nat, anih jang, anih mơ dro sa lơ̆m tơ ring păng ‘ngoăih tơ ring tơ gŭm dôm ŭnh hnam ming man hnam oei kơ jăp, iŏk đei hơ găt ‘lơ̆ng kơ tơ ring tơ rang ‘nao.

Hơ tŏk hơ năp jang năm hơ drol, dôm  đảng viên kơ Đảng bộ Bát Xát tơ pă jing dôm bơ ngai pơ gơ̆r pơ trŭt jang kiơ̆ tơ plih trong jang mŭk drăm tơ̆ tơ ring. 4.440 đảng viên lơ̆m Đảng bộ gô jing khŭl jang tơm vă jang kiơ̆ tơ drong tơm tih kơ apŭng lơ̆m sơ năm 2022 păng ăn pơ đĭ jăl jang.