Hơdah nhen hăm yă H'Blim tơ̆ pơlei Mơ Nú, xah Chư Á. Pơkăp unh hnam hin dơnuh hăm tơdrong hơrih tơnap tap, sơnăm 2023 unh hnam yă đei jơnŭm pơgơ̆r tơring tơgŭm ăm minh pôm rơmo yŏng chông kon.

Hăm tơdrong rong vei tơnăp, truh dang ei rơmo hlôi chông kon đei minh pôm rơmo kon, đơ̆ng noh hơtŏk iŏk yua ăn unh hnam khei năr hơnô̆ hơnăp kơnh:  “Tơdrong hơrih inh hnam hơdrol ki tơnap tap dêh, kơlih ưh đei mir na noh ưh kĕ hơtŏk mŭk drăm. Khei năr tơjê̆ âu, gơnơm đei tơdrong tơgŭm đơ̆ng jơnŭm pơgơ̆r tơring, tơgŭm unh hnam rơmo yŏng, đơ̆ng rŏng kơ khei năr vei rong noh rơmo vơ̆ păng tenh kuăng đei chông kon, păng mŭk drăm unh hnam inh brư̆ brư̆ đei hơtŏk hloh”

Gah tơchơ̆t tơgŭm, pơlei tơm Pleiku hlôi asong theh Ƀao hiêm hơmet jĭ jăn ăn 100% unh hnam hin dơnuh păng tơjê̆ hin dơnuh. Kon hơ-ioh kơ dôm unh hnam âu oei đei tơjur jên hŏk. Yă Trần Thị Út, Phŏ Kơdră Anih jang vei lăng kon pơlei phương Chi Lăng, pơlei tơm Pleiku ăn tơbăt, kang ƀô̆ phương hlôi pơtho kon pơlei tơplih hơdrĕch 'long pơtăm trŏ ƀlep, pơih dôm lăm pơhrăm păng pơm trong hiôk gah tŏk iŏk jên jang: “Jơnŭm pơgơ̆r tơring hlôi păng tŏk bŏk akŏm dôm tơdrong jang tơgŭm hơtŏk mŭk drăm, hơtŏk pơ-'lơ̆ng tơdrong pơtho pơhrăm, vei lăng jơhngơ̆m jăn păng hơmet anih jang tơdrong pơyua ăn 3 pơlei kon kông. Tơring hlôi hơvơn dôm anih jang 'mêm bơnat tơgŭm 7 tŏ hnam, kon pơlei hơtŏk  pơ-'lơ̆ng tơdrong hơrih. Tơgŭm hơdrĕch 'long pơtăm păng kon tơrong mă trŏ ƀlep hăm tơdrong hơrih tơ̆ tơring kơ 3 pơlei vă hơtŏk iŏk yua păng sơđơ̆ng tơdrong hơrih ăn kon pơlei”

Pơlei tơm  Pleiku hlôi tơgŭm ăn dôm bơngai mă teh đak tơchơ̆t tơgŭm tŏk iŏk jê̆ 11 tih hlj hăm jên cheh tŏ sĕt. Jên mong tơgŭm bơngai hin dơnuh adoi tơgŭm ming man păng hơmet 95 tŏ hnam đei kơjă hloh 4,7 tih hlj. Dôm trong pơkăp jang đei tơlĕch jang hăm jên asong hloh 770 triu hlj... Ƀok Nguyễn Triều Quang, Phŏ Kơdră Anih mong jên Tơgŭm tơpôl pơm jang tơ̆ Gia Lai sơkơ̆t hơdah gô pơtoi akŏm dôm kơsô̆ jên, mă kăl noh tơdrong pơkăp asong tơdrong jang ăn kon pơlei: “Anih jang adoi hăt hot vang tơgŭm hăm anih jang Thanh uy, Jơnŭm vei lăng kon pơlei, Anih jang vei lăng kon pơlei asong jên mong ăn tơring vă asong tŏk iŏk ăn dôm bơngai kăl yua lơ̆m tơring. Jô̆ truh dang ei kơsô̆ hre tŏk iŏk kơ dôm tơdrong tơchơ̆t jang đei 402 tih hlj, lơ̆m noh jên mong kơ dêh char păng pơlei tơm noh 51 tih hlj, jơnei pơkăp lơ̆m pơm kiơ̆ tơchơ̆t jên mong asong jang”

Pleiku hlôi pơjing minh tơdrong jang kơdih vă hơtŏk pran tơdrong jang tơjur hin dưnuh kơjăp sơđơ̆ng, hơtŏk tơdrong hơrih ăn kon pơlei, mă kăl noh tơ̆ dôm pơlei pơla kon kông đơ̆ng sơnăm 2021 - 2025. Tơdrong hơvơn pơđĭ anih jang chĭnh trĭ vang jang, kơchăng chih akŏm tơdrong jang tơjur hin dơnuh đunh khei năr păng iŏk yua tơnăp jên mong đơ̆ng dôm tơdrong tơchơ̆t jang kơ teh đak gô jing tơdrong tơm ăn tơdrong đei jơnei lơ̆m pơm jang tơjur hin dơnuh kơjăp sơđơ̆ng kơ pơlei tơm.

Ƀok Trịnh Duy Thuân, Ƀĭ thư Thanh uy Pleiku ăn tơbăt: “Đơ̆ng blŭng jăl jang truh dang ei pơlei tơm hlôi akŏm pơgơ̆r tơlĕch tơdrong jang tơjur hin dơnuh kơjăp sơđơ̆ng tơguăt hăm tơchơ̆t jang kơ teh đak hlôi đei jơnei kăp gĭt. Kơsô̆ unh hnam hin dơnuh lơ̆m tơpôl kon pơlei kon kông păng kơsô̆ unh hnam hin dơnuh lăng hơtŭm tơjur tenh kuăng. 'Nâu jĭ tơdrong hơdrin tih tên đơ̆ng dôm jăl jang tơguăt hăm tơdrong pơm kiơ̆ dôm tơchơ̆t jang kơ teh đak”

Hăm dôm tơdrong hơdrin ưh pơdơh pơdei, pơlei tơm Pleiku tŏk bŏk oei tơguăt tơjê̆ hloh hăm tơchơ̆t tơjur hin dơnuh kơjăp sơđơ̆ng. Dôm tơchơ̆t păng tơdrong tơgŭm jang hlôi đei jơnei tơnăp, tơgop hơtŏk tơdrong hơrih ăn kon pơlei, mă kăl noh ăn kon pơlei kon kông.