Dôm bơngai tang măt drơ̆ng nơ̆r ‘lơ̆ng hăm trong jang tơgŭm pơlong lăng klăih song hơnăp jang ăn apŭng lơ̆m vei lăng, pơgơ̆r bơ̆jang kiơ̆ dôm tơdrong jang tơm teh đak kiơ̆ trong jang: “Jơnŭm pơgơ̆r kon pơlei apŭng gơh tơchơ̆t hơmet ming trong jang klăih song jên tơmơ̆t jên jang teh đak, jên jang hơnơ̆ng đơ̆ng dôm tơdrong jang tơm teh đak lơ̆m tơlĕch jang tơmơ̆t jên jang teh đak păh lăp khei ‘năr, tơlĕch jang jên tơmơ̆t jang rim sơnăm, jên vă thu mong jên jang rim sơnăm hlôi đei kơdră gơh kĭ pơjao”. Bơngai tang măt Mai Văn Hải, khŭl Thanh Hóa akhan:

"Trong jang âu gô tơmơ̆t yua hloi trong jang tơgŭm hơdrô̆ ăn tơdrong hơmet pơ ‘lơ̆ng mơmat tat, tơhlăk tơhlĭn lơ̆m sơnăm 2024 sơnăm 2025. Hloh kơ ‘noh dơ̆ng, tơchơ̆t đơ̆ng Kuôk hô̆i tŏk bŏk pơma dơnuh vă hơmet pơ ‘lơ̆ng mơ mat tat, tơhlăk tơhlĭn, tŭn hrĕnh bơ̆jang kiơ̆ 3 Tơdrong jang tơm teh đak sơnăm 2021-2025 vă rim tơring kơchăng jên jang đơ̆ng dôm tơdrong jang tơm teh đak hơmet ăn đơ̆ng jên jang tơdrong jang jing jên tơmơ̆t jên jang. Tơdăh bơ̆jang kiơ̆ đei ‘noh tơdrong tơlĕch jên jang đơ̆ng dôm tơdrong jang tơm teh đak mă gơh vei sơđơ̆ng đei tơdrong hơgăt tơlĕch ăn.”

Kŭm hăm klăih song hơnăp jang ‘noh jĭ klăih song kon jên jang. Mă đơ̆ng oei 1,2 tơdrong bơngơ̆t găh tơdrong iŏk yua jên jang đơ̆ng apŭng, mă lei lơ bơngai tang măt lăng ‘lơ̆ng trong jang klăih song hơnăp jang, pơjao tơlĕch jên jang hơnơ̆ng đơ̆ng tơdrong tơchơ̆t ‘noh jĭ: Kuôk hô̆i tơchơ̆t klăih song; Thủ tướng pơjao tơlĕch jên jang Trung ương ăn tơring kiơ̆ akŏp jên jang; Jơnŭm pơgơ̆r kon pơlei dêh char klăih song tơlĕch jên jang hơnơ̆ng truh tơdrong jang. Tơdrong kăl hloh Jơnŭm pơgơ̆r kon pơlei dêh char tơchơ̆t kăih song hơnăp jang ăn Jơnŭm pơgơ̆r kon pơlei apŭng tơchơ̆t.

Ƀơm truh tơdrong jang vei lăng mŭk tơmam đei đơ̆ng tơdrong jang tơgŭm pơm tơlĕch dôm bơngai tang măt athei tơchĕng hơlen iŏk hơlen lăng hơdrol kơ pơjao ăn tơpôl, tơ ‘ngla jang hơdai păng hơtŏk loi dơ̆ng hơlen lăng đơ̆ng kơdră kơpal, pơklep hơnăp jang anih jang ƀơm truh.

Bơngai tang măt Nguyễn Thị Sửu, Khŭl Thừa Thiên Huế ‘meh vă, tơdrong pơ drơ̆ng kiơ̆ tơdrong Tơchơ̆t găh 1,2 trong jang tơgŭm hơdrô̆ bơ̆jang kiơ̆ dôm tơdrong jang tơm teh đak gô jing tơdrong ƀlep khôi luơ̆t tơgŭm dôm tơring hơmet pơ ‘lơ̆ng mơmat tat, tơ hlăk tơhlĭn, pơm rơ hơi dôm hơnih kơ chĭl vă yak truh jang đang tơdrong hơgăt, hơnăp jang hơtŏk tơiung mŭk drăm tơ pôl kơ sơnăm 2024 pơma hơdrô̆ păng kơ pơ đĭ jăl jang pơma atŭm:

“Vă đĭ đăng dôm tơdrong jang tơm teh đak adoi pơjao ăn kơ xăh pơm tơ ‘ngla tơmơ̆t jên jang, dôm tơdrong jang tih gô klăih song hơnăp jang ăn dêh char dăh mă apŭng. Tơdrong klăih song hơnăp jang athei rơđăh, tơ păt, jang tơnăp ‘noh ƀơ̆t doh Jơnŭm pơgơ̆r kon pơlei dêh char, jơnŭm pơgơ̆r kon pơlei apŭng, jơnŭm pơgơ̆r kon pơlei xăh mă jang đei ‘lơ̆ng hơnăp jang đơ̆ng kơdih. Kiơ̆ đơ̆ng noh, khŭl kơdră Anih vei lăng kon pơlei xăh ‘noh jĭ anih jang tơm mă tơlĕch jang ƀlep hơnăp jang păng ưh kơ hơdrom băl hơnăp jang păng hơtŏk ‘lơ̆ng đei hơnăp jang đơ̆ng rim kơdră.”

Hăm 3 tơdrong jang tơm teh đak, lơ bơngai tang măt hơmĕng tơdrong Tơchơ̆t đei pơdrơ̆ng kiơ̆ gô đei lơ tơplih, pơm trong jang tơgŭm rơ hơi vă tơring groi kông hơtŏk đei tơmam ‘lơ̆ng hlôi đei, jang tŏk. Bơngai tang măt Tạ Văn Hạ, Khŭl Quảng Nam akhan:

“Hăm 8 trong jang tơgŭm pơlong lăng âu ‘noh ĭnh akhan gô pơm đei hơyak ‘lơ̆ng lơ̆m tơdrong tŭn hrĕnh bơ̆jang kiơ̆ 3 tơdrong jang tơm teh đak. ‘Nâu jĭ tơdrong ĭnh akhan kăl kơ set hơlen pơm liơ mưh rơih, hlôi krao ‘noh pơlong lăng ‘noh athei đei tang măt, gơh ‘noh jĭ tơring tơrang, pơlei tơm, tơring groi kông...., đĭ đăng dôm tơdrong ‘noh mưh bơ̆n pơtôch đei ‘noh trong jang tơgŭm ‘noh sư athei đei akŏm tôm đei dôm tơdrong jang păng tơring.”

Dôm bơngai tang măt kŭm hơmĕng, tơdrong Tơchơ̆t găh 1,2 trong jang tơgŭm hơdrô̆ bơ̆jang kiơ̆ dôm tơdrong jang tơm teh đak đei Kuôk hô̆i pơdrơ̆ng kiơ̆, Khŭl kơdră teh đak păng anih jang kơpal gô jăh tơlĕch dôm tơdrong tơchơ̆t, hla ar pơtho vă luơ̆t tơtĕnh hơtŏk đei yua, yak mơ̆t lơ̆m tơdrong arih sa.