‘Nao âu Anih tơm vei lăng găh choh jang sa păng Hơtŏk tơiung tơring tơrang hlôi pơgơ̆r Hop akŏm trực tuyến lơ̆m teh đak pơtôch 3 sơnăm bơ̆jang kiơ̆ Tơdrong jang tơm teh đak pơjing tơring tơrang ‘nao (jăl jang 2021-2025). Kiơ̆ tơroi tơbăt, truh dang ei lơ̆m teh đak đei 6.022 xăh jang đang tơring tơrang ‘nao, 263 anih jang kơ apŭng jang đang ‘lơ̆ng tơring tơrang ‘nao. Lơ̆m teh đak đei 19 dêh char, pơlei tơm găh Trung ương đei đĭ đăng kơ sô̆ xăh jang đang tơring tơrang ‘nao. Yă Đinh Thị Ngoại (bơngai Barhnar) oei tơ̆ plei Lơk, xăh Nghĩa An, apŭng K’Bang, dêh char Gia Lai tơbăt:

 “Kon pơei plei Lơk hlôi hơdrin vang jang kiơ̆ tơdrong jang, tơgoăt tơgoăl hăm băl, ming man trong ƀê tŏng ‘lơ̆ng, trong tơring tơrang. Đơ̆ng rŏng kơ iŏk yua khoa hŏk ki thuơ̆t lơ̆m jang sa ‘noh iŏk yua hlôi păi ƀiơ̆, pơlei rơgoh ‘yâu ƀiơ̆, mŭk drăm hơtŏk iung ƀiơ̆ pơtêng hăm hơdrol.”

Jang kiơ̆ athei đơ̆ng Khŭl chĕp kơ̆l pơgơ̆r Anih jang dêh char dêh char Gia Lai găh hơtŏk loi dơ̆ng tơdrong chĕp kơ̆l đơ̆ng dôm kơdră đảng găh pơ jing pơlei tơring tơrang ‘nao lơ̆m kon pơlei kon kông, 5 sơnăm âu ki, jên jang teh đak păng tơpôl vang tơgop vă jê̆ 1.500 ti hlak jên vă pơjing tơring tơrang ‘nao lơ̆m tơring kon pơlei kon kông dêh char  Gia Lai.

Jăl jang đơ̆ng sơnăm 2021 truh 2023, akŏp jên hơvơn bơ̆jang tơdrong jang pơjing tơring tơrang ‘nao lơ̆m teh đak dang 1.752.000 ti hlak jên. Hơdrol ‘noh, mă đơ̆ng lơ̆m teh đak athei kơ rŭn tang găn jĭ COVID 19, mă lei tơdrong jang oei jang đang tơdrong hơgăt Khŭl kơdră teh đak pơjao. Mă đơ̆ng thoi noh ră, kiơ̆ kơ ƀok Ngô Trường Sơn, Chánh văn phòng vei lăng tơring tơrang ‘nao Trung ương lơ̆m kơplăh bơ̆jang kiơ̆ oei đei lơ mơmat tat, tam mă ‘lơ̆ng.

 “Tơdrong ‘lơ̆ng iŏk đei păng tơdrong jang pơvei kơjăp iŏk yua đơ̆ng 1,2 xăh đơ̆ng rŏng jang đei oei tam mă gan ‘lơ̆ng, mă loi ‘noh jĭ tơdrong hơgăt cham char, iŏk yua, sơđơ̆ng tơpôl... Tơdrong ‘lơ̆ng dôm tơdrong jang anih jang kăl đơ̆ng rŏng kơ jang đei tơ̆ 1,2 tơring hlôi đei ƀôh kơ nê̆ yua đơ̆ng tam mă đei bơngơ̆t truh, vei lăng hơnơ̆ng.”

Tơ̆ hop akŏm lơ̆m teh đak pơtôch 3 sơnăm jang kiơ̆ Tơdrong jang tơm teh đak pơjing tơring tơrang ‘nao, bơngai tang măt rim tơring hlôi đei lơ nơ̆r tơgop, tơlĕch trong jang. Mă hơdăh nhen găh vei rơgoh cham char, ƀok Nguyễn Ngọc Phúc, Phŏ Kơdră Anih vei lăng kon pơlei dêh char Lâm Đồng akhan, kăl kơđei 1 trong jang pơih lơ̆m iŏk akŏm râm rĕk tơring tơrang.

“Vă khan ‘noh jĭ gô jô̆ kơ sô̆ râm rĕk rim sơnăm lơ̆m anih kơdrơ̆m ih păng ăn chă rơih bơngai iŏk jang. Bơ̆n lăp jang hơnăp jang iŏk jên đơ̆ng kon pơlei păng kla ăn anih mơdro sa iŏk jang. Thoi noh, vei sơđơ̆ng tơdrong iŏk akŏm ‘yâu rơgoh. Nhôn akhan tơdrong ‘nâu kăl kơ jang. Hrei ‘nâu nhôn tŏk bŏk tơlĕch jang 1 apŭng đĕch ‘noh jĭ Đức Trọng vă jang tơdrong jang ‘nâu. Tơdăh jơnei nhôn ‘meh tơlĕch jang jơ̆p lơ̆m dêh char.”

Kơdră Anih tơm vei lăng găh choh jang sa păng hơtŏk tơiung tơring tơrang Lê Minh Hoan pơma hơdăh: Tơdrong jang tơm kơ teh đak pơjing tơring tơrang ‘nao ưh khan lăp jing ming man anih jang kăl, mă oei jing hơtŏk ‘lơ̆ng tơdrong arih sa păng jơhngơ̆m đon ăn kon pơlei tơring tơrang.

 “Đĭ đăng kơjă kăp gĭt bơ̆n tŏk bŏk jang đei hơnih ‘lơ̆ng hơnih tam ‘lơ̆ng. Mă lei bơ̆n athei tơchĕng ‘nao tŏ sĕt, tơchĕng jrŭ kơjă kăp gĭt, mưh bơ̆n băt đei tơdrong jrŭ kơjă kăp gĭt ‘noh bơ̆n gô jing lei lăi nhen ƀok Kơdră vei lăng anih mong jên Nhật hơnhăk tơmam tĕch tơ̆ Hà Nội. Đe pơma 1 nơ̆r ƀơ̆t băt chhôk hơiă yua kơ tơdrong hưch hanh ‘noh băt kơchăng kơ dih jang. Yua kơ bơ̆n jang, bơ̆n hơnhăk ăn tơdrong hiôk hian ăn kon pơlei bơ̆n, hơnhăk ăn tơdrong hơrih ăn kon pơlei. Vă đơ̆ng rŏng âu tơpôl gô vang jang hăm bơ̆n vei lăng tơring....”

Hrei ‘nâu, lơ̆m teh đak tŏk bŏk tơlĕch 3 Tơdrong jang tơm teh đak, lơ̆m noh đei tơdrong jang pơjing tơring ‘nao. Mă lei, tơdrong tơlĕch jên jang trung ương sơnăm 2022 păng jăl jang 2021-2025 oei hiơ̆. Kơdră Kuôk hô̆i Vương Đình Huệ athei pơm rơđăh hơnăp jang đơ̆ng dôm anih tơm, anih jang lơ̆m tơdrong hiơ̆ tơlĕch jên jang ăn 3 tơdrong jang tơm teh đak hơnhăk truh brăh brư:

"Dăr hơlen âu athei tơl đei nơ̆r apĭnh. Yua kơ kiơ mă hiơ̆? Yua kơ kiơ mă tơhlăk tơhlĭn, dôm hơnih găn tơ̆ yơ? păng tơdrong hơmet pơ ‘lơ̆ng thoi yơ. Pêng tơdrong jang oei đei dôm hrĕng tŏ tơdrong tơlĕch ăn Tơdrong tơchơ̆t 28, đơ̆ng rŏng ‘noh hơmet 27, dang ei hơnăp jang đơ̆ng dôm anih tơm, anih jang thoi yơ mă lê̆ đei ƀôh tơdrong ‘noh. Yua kơ kiơ mă tơlĕch jên hiơ̆? Jên tơdrong jang oei hiơ̆ hloh kơ jên tơmơ̆t jang lei ‘noh pơm liơ? lê̆ thoi âu brăh brư tôch kơ dêh.”

Khŭl dăr hơlen kơ Anih chĕp kơ̆l pơgơ̆r Kuôk hô̆i apĭnh đei trong jang pơjao tơlĕch trong vă jang kiơ̆ jên tơdrong jang dăh mă roi tơbăt jên tơdrong jang jên jang trung ương bơ̆jang dôm tơdrong jang tơm teh đak jăl jang 2024 - 2025 vă dôm tơring kơchăng lơ̆m tơdrong jang klăih song jên.