Ŭnh hnam yă Ngô Thị Khải, kon pơlei plei Phú Mỹ, xăh Đình Tổ, thị xã Thuận Thành, dêh char Bắc Ninh jĭ 1 lơ̆m dôm ŭnh hnam đei rơih pơm pơ long tơlĕch jang tơdrong jang klăih song râm rĕk kơ tă hloi tơ̆ hơnih kiơ̆ tơdrong hơgăt pơjing tơring tơrang ‘nao ‘lơ̆ng. Tơ̆ ŭnh hnam, râm rĕk đei klăih song lơ̆m 3 kơ thŭng kơdih - kơthŭng mong dôm kơ loăi gơh pơm ming dơ̆ng, ‘noh đei get chai, kơchai như̆ơ, hla ar,… kơthŭng mong râm rĕk ‘mê̆ ‘mach păng kơthŭng mong râm rĕk rơgoh. Hơdrô̆ dôm kơ loăi râk rĕk rơgoh ŭnh hnam gô chă hơmet kơ dih hăm tơmam sinh học EMO vă pơm lu sư jing phŏng săy ăn kơ ‘long pơtăm. Yă Ngô Thị Khải tơroi, tơdrong jang âu đei kon pơlei tơgŭm yua kơ tơgop vei lăng hơnih kon pơlei oei ling lang rơgoh ‘lơ̆ng, tơ jur hloi kơ sô̆ râm rĕk lĕch tơ̆ cham char:

“Ĭnh ‘noh jĭ 1 ‘nu Đảng viên ling lang năm hơdrol găh tơdrong jang vei lăng cham char. Mă loi ‘noh jĭ lơ̆m ŭnh hnam, ‘nhŏng oh, bơngai lơ̆m ŭnh hnam bơ̆jang kiơ̆ klăih song kơ loăi râm rĕk tơ̆ ŭnh hnam. Tơ̆ lơ̆m ŭnh hnam nhôn ĭnh klăih song kơ loăi râm rĕk pơm pêng kơ loăi. Dôm kơ chơ̆t ‘mê̆ ‘mach nhen ‘nhot, pia, por đak rơgoh ĭnh lê̆ hơdrô̆ 1 hơnih păng ĭnh gô yua vă pơm tơmam EMO vă yua đak phŏng ‘noh tơruih ăn kơ ‘nhot dăh mă iŏk lơ ‘noh ĭnh xăy ăn pơ ƀa hloi.”

Xăh Đình Tổ, thị xã Thuận Thành, dêh char Bắc Ninh hlôi jang đang pơ jing tơring tơrang ‘nao ‘lơ̆ng rŏ lơ̆m sơnăm 2021. Hơmet pơ ‘lơ̆ng dôm tơdrong ‘mê̆ ‘mach yua đơ̆ng râm rĕk hŭt đơ̆ng ŭnh hnam vei rong kon tơrong, dôm tơring jang sa ‘noh jĭ trong jang tơm xăh Đình Tổ bơ̆jang kiơ̆ vă hơmet pơ ‘lơ̆ng tơdrong ‘mê̆ ‘mach cham char đei ƀôh lơ̆m tơring. Mă lei, kiơ̆ tơdrong hơgăt lơ̆m jăl jang 2021 - 2025, tơdrong hơgăt kơ sô̆ 17 găh cham char păng sơđơ̆ng rơgoh tơmam sa đei lơ ‘meh vă lơ hloh păng hơnat kơ bơ̆jang kiơ̆. Mă lei mơmat tat âu tŏk bŏk đei tơring akŏm hơmet pơ ‘lơ̆ng. Ƀok Nguyễn Văn Thành, Kơdră Anih vei lăng kon pơlei xăh Đình Tổ tơroi:

“Hrei ‘nâu, nhôn mơmat tat hloh ‘noh jĭ hơmet rơgoh đak ‘mê̆ ‘mach akŏm lơ̆m hơnih kon pơlei oei. Ƀlă kơ ‘noh dơ̆ng ‘noh jĭ mơmat tat găh tơdrong hơgăt ‘lơ̆ng cham char. Hrei ‘nâu kiơ̆ tơdrong hơgăt ‘nao, athei đei hloh 65% kơ sô̆ ŭnh hnam đei yua đak rơ goh kiơ̆ dôm hơnih pơtruh akŏm. Kiơ̆ tơdrong so ‘noh lăp kăl kơ dôm ŭnh hnam yua đak rơgoh.”

Hơdrol sơ̆, hăm tơdrong hơgăt cham char kơ xăh tơring tơrang ‘nao, lăp kăl kơ kon pơlei đei trong jang hơmet pơ ‘lơ̆ng, iŏk akŏm râm rĕk ‘noh hoei. Mă lei kiơ̆ tơdrong hơgăt xăh tơring tơrang ‘nao jăl jang 2021-2025, tơdrong hơgăt pơgŏ tŏ sĕt hloh 30% ŭnh hnam kon pơlei lơ̆m xăh athei bơ̆jang kiơ̆ klăih song kơ loăi râm rĕk kơ tă hơnih, kơ sô̆ kơ chơ̆t ‘mê̆ ‘mach nhươ̆ đei iŏk akŏm, iŏk yua dơ̆ng, hơmet pơ ‘lơ̆ng kiơ̆ tơdrong hơgăt athei iŏk đei đơ̆ng 50%. ‘Nâu jĭ tơdrong ưh kơ ƀônh hăm tơring tơrang yua kơ hlôh vao đơ̆ng kon pơlei 1,2 hơnih oei tam mă lơ. Yă Hoàng Thanh Bình, Phŏ Kơdră Anih vei lăng kon pơlei xăh Cao Đại, apŭng Vĩnh Tường, dêh char Vĩnh Phúc tơbăt: Vă hơmet pơ ‘lơ̆ng tơdrong hơnat ăn tơdrong hơgăt cham char lơ̆m pơjing tơring tơrang ‘nao, Anih jang Đảng, Anih vei lăng kon pơlei xăh ăn kang ƀô̆ đei joăt jang jur tơ̆ tơring jang hơdai hăm tơring pơtho, hơmet pơ ‘lơ̆ng mơmat tat tơ hlăk tơhlĭn lơ̆m kơ plăh tơlĕch jang kiơ̆. Hơdai hăm pơgơ̆r lơ tơdrong jang hơdăh tơklep hăm ‘măng krao hơvơn “pơjing ŭnh hnam 5 ưh, 3 rơgoh” - iŏk đảng viên păng bơngai chĕp kơ̆l rim khŭl ‘noh jĭ tơdrong tơm lơ̆m tơdrong jang tơroi tơbăt, iung jang hơdrol bơ̆jang kiơ̆:

“Anih jang Đảng, anih vei lăng kon pơlei nhôn kŭm pơjao ăn kơ dôm khŭl drŏ kăn, khŭl kon pơlei jang chŭn mir, đe ƀok yă pơgơ̆r tổ liên gia, đe bơngai Đảng viên lơ̆m chi bộ ‘noh jĭ dôm bơngai pơm jŭk yŭk trong hơlâu lơ̆m tơdrong jang tơroi tơbăt vă kơ nhôn bơ̆jang kiơ̆ pơlong hơdrol. Đơ̆ng rŏng ‘noh nhôn mă pơih să ăn jang. Truh dang ei kon pơlei hlôi băt đei tơdrong joăt klăih song kơ loăi râm rĕk kơ tă hơnih pơm phŏng compot.”

Đei lăng ‘noh jĭ tơdrong hơgăt hiôk ƀiơ̆ ưh kơ kăl lơ jên tơmơ̆t jang đơ̆ng teh đak, mă lei tơdrong hơgăt cham char ‘noh tŏk bŏk jing ƀai toan hơnat hăm lơ tơring. Kiơ̆ kơ ƀok Phùng Xuân Tiến, phŏ chánh Văn phòng vei lăng tơdrong jang Pơjing tơring tơrang ‘nao Vĩnh Phúc, vă hơmet pơ ‘lơ̆ng đei ƀai toan âu, khŭl kơdră athei iung jang hơdrol, ƀơ̆t lăp pơ̆n jang ‘lơ̆ng ‘noh dôm tơdrong hơgăt mă jăh jang đang. Hơdai hăm ‘noh athei hơvơn rim kon jên, tŭn pran tơpôl vang tơgop, tơdrong vang jang đơ̆ng dôm khŭl jang mŭk drăm tơmơ̆t jên jang ăn tơdrong jang vei lăng cham char:

“Tơdrong sơng đei tơdrong vang jang đơ̆ng kon pơlei, anih mơdro sa ‘noh jĭ tôch gĭt kăl. Tơdăh bơ̆n jang ‘lơ̆ng tơdrong jang tơpôl vang tơgop, krao hơvơn tơdrong tơgop đơ̆ng anih mơdro sa, khŭl jang kơdih; Hơvơn đei tơdrong vang jang đơ̆ng kon pơlei ‘noh dôm tơdrong hơgăt găh joh ayŏ, cham char, đak rơ goh... gô đei tơlĕch jang jơnei”.

Tơmơ̆t jên jang, tơlĕch ăn tơdrong hơgăt păng pơtho hơdăh bơ̆jang kiơ̆ tơdrong hơgăt cham char lơ̆m pơjing tơring tơrang ‘nao, ‘nâu gô jing trong jang hơmet pơ ‘lơ̆ng mơmat tat tơgŭm ăn tơdrong hơrih tơ̆ dôm tơring tơrang roi ‘năr roi đei tơplih ‘lơ̆ng.