Lơ̆m hnam ‘nao man ‘lơ̆ng, mŏ Nguyễn Thị Lệ Thu oei tơ̆ Kueng kơphô̆ 4, phường Tân Hoà, pơlei tơm Buôn Ma Thuột, dêh char Đắk Lắk tơbăt, sư ‘noh mĕ oei hơdrô̆ rong 3 ‘nu kon oei ‘lơ̆p, lơ sơnăm athei gơnang đơ̆ng păih mĕ sư. Hnam ‘nao să vă jê̆ 40 mét vuông hlôi tơgŭm 4 ‘nu mĕ kon sư đei 1 pôm hnam tơnŏ tơpă: “Hơdrol ki oei oăi hnam tơ̆r mĕ ĭnh, ‘mi hngăt jơ̆p hơnih, tŏ ‘noh hŭl hang păng ‘mui teh hoh dôm mĕ kon nhôn oei mơmat dêh. Anih tơm Kŏng an pơjao ăn hnam, 4 ‘nu mĕ kon nhôn đei hnam pĕng tŏ, pĕng ‘mi kơna chhôk dêh, ưh kơ bơngơ̆t kơ hngăt dăh mă tŏ ‘mui teh hoh bơih. Kơdih kâu ĭnh ưh kơ đei jên iŏk kiơ ‘noh hơpo kŭm ưh kơ pơ̆n tơchĕng man đei hnam thoi ‘nâu.”

Ŭnh hnam mŏ H’Nuân Knul jĭ mĭnh lơ̆m dôm ŭnh hnam dơnuh hin hloh plei Tiêu, xăh Ea Tiêu, apŭng Cư Kuin, dêh char Đắk Lắk. Mŏ tơbăt, ŭnh hnam 6 ‘nu mă lei ưh kơ đei teh choh jang sa, tơdrong hơrih sa lăp chang gô lơ̆m năr jang thuê đơ̆ng klo kăn măr sư. Yua kơ tơdrong mŭk drăm ŭnh hnam tôch kơ mơmat tat kơna mŏ oei oăi lơ̆m hnam pơgia hiăh hiot. H’Nuân hlôi tơchĕng akhan, ŭnh hnam sư gô ưh kơ đei lai yơ kĕ đei 1 pôm hnam hoei hơ hngăt hoei kơ tŏ, mă lei dang ei, sư ‘noh đei hloi 1 pôm hnam man: “Hơdrol sơ̆, klo kăn nhi răt hnam tơ̆r brŏk pơm hăm kơjă 3 triệu hlak jên, mă lei dang ei tơ̆r păng kem bŭk đĭ bơih. Đang kơ ‘noh păih kŏng an truh man ăn hnam ‘nao ‘lơ̆ng, 6 ‘nu oei lơ̆m hnam ‘nao chơt dêh, ưh pă bơngơ̆t dơ̆ng bơih. Dang ei klo kăn nhi lăp bơngơ̆t kơ jang vă rong kon hơ ‘lơ̆p hŏk pơhrăm.”

Kiơ̆ kơ ƀok Hồ Viết Hùng – Phŏ Kơdră Anih vei lăng kon pơlei xăh Ea Tiêu, apŭng Cư Kuin, Tơdrong jang đơ̆ng Anih tơm vei lăng Kŏng an tơ̆ xăh đei 22 ŭnh hnam mơmat tat găh hnam oei đei pơjao hnam ‘mêm mơnat. Akŏp jên pơm 1 ti 760 triệu hlak jên. Dang ei dôm ŭnh hnam adoi hlôi iŏk pơjao hnam păng mơ̆t oei. Tơdrong tơgŭm hnam oei ưh khan lăp tơgŭm dôm ŭnh hnam hơrih hiôk, jang sa ‘lơ̆ng, mă oei tơgŭm tơring jang đang tơdrong hơgăt hnam oei lơ̆m pơjing tơring tơrang ‘nao. Ƀok Hồ Viết Hùng roi tơbăt: “Hrei ‘nâu kơsô̆ sut hnam pơgia lơ̆m xăh vei sơđơ̆ng pơting hăm tơdrong hơgăt, tơgop lơ̆m tơdrong jang pơjing tơring tơrang ‘nao kơ xăh. Ƀơ̆t đei tơgŭm hnam, kon pơlei tôch kơ chhôk ‘nă, sơđơ̆ng tơdrong hơrih hơtŏk tơiung jang sa mŭk drăm ŭnh hnam, tơgop pơjing păng tơiung xăh pran kơjăp.”

Jăl jang 2022 – 2025 dêh char Đắk Lắk hơdrin pơm hloh 5.000 tŏ hnam tơgŭm dôm ŭnh hnam dơnuh hin, vă jê̆ dơnuh hin, ŭnh hnam teh đak tơgŭm, ŭnh hnam kon pơlei mơmat tat găh hnam oei. Tơdrong jang pơm 1.200 tŏ hnam ‘mêm mơnat đơ̆ng Anih tơm vei lăng Kŏng an ‘noh tơgŭm tôch kơ tih, tơgŭm dêh char kĕ jang đang tơdrong hơgăt hlôi tơlĕch ăn. Ƀok Lê Bá Cảnh – Phŏ Kơdră Anih jang Mặt trận Tổ quốc Việt Nam dêh char Đắk Lắk tơbăt, lăp ƀơ̆t sơng iŏk tơdrong jang, Anih jang Mặt trận Tổ quốc rim tơring tơ̆ dêh char hlôi jang hơdai hăm anih jang kŏng an, khŭl kơdră tơring, dăr hơlen, lăng hơlen, chih hơnăn dôm bơngai sa yua ming man pơjao hnam ăn kơ dôm ŭnh hnam kon pơlei. Đĭ đăng 1.200 tŏ hnam hlôi đei pơjao păng dôm ŭnh hnam hlôi mơ̆t oei bơih. Tơ̆ hơnăp kơnh, Anih jang Mặt trận Tổ quốc Việt Nam dêh char Đắk Lắk hơnơ̆ng hơvơn dôm kon jên đơ̆ng tơpôl vă bơ̆jang kiơ̆ trong tơlĕch jang pơm kơ sô̆ hnam uơ oei dơ̆ng pơjao asong ăn dôm ŭnh hnam kon pơlei.

 “Nhôn hơnơ̆ng tơlĕch jang ming man tơgŭm dôm bơngai mơmat tat găh hnam oei păng ‘meh vă dôm anih jang, khŭl grŭp, dôm khŭl jang dăh mă dôm bơngai đei jơhngơ̆m đon ‘mêm mơnat lơ̆m păng ‘ngoăih dêh char hơnơ̆ng jang hơdai hăm dêh char Đắk Lắk tơgŭm kon pơlei lơ̆m dêh char ưh kơ măh hnam oei. Pơm liơ lơ̆m jăl jang 2022 – 2025, vei sơđơ̆ng jang đang đei tơdrong hơgăt pơm hloh 5.000 tŏ hnam, tơgŭm bơngai mơmat tat găh hnam oei jăl jang ‘nâu lơ̆m dêh char.”

Tơdrong jang đơ̆ng Anih tơm vei lăng Kŏng an, man 1.200 tŏ hnam asong ăn dôm ŭnh hnam mơmat tat, ŭnh hnam teh đak tơgŭm, ŭnh hnam kon kon kông tơ̆ dêh char Đắk Lắk, đei tơlĕch jang đơ̆ng khei 3/2024 păng hlôi jang đang lơ̆m hơtuch khei 7/2024. Akŏp jên bơ̆jang kiơ̆ tơdrong jang ‘noh 96 ti hlak jên, lơ̆m noh jên tơgŭm đơ̆ng Anih tơm vei lăng Kŏng an ‘noh 60 ti hlak jên, uơ oei dơ̆ng yua đơ̆ng tơring tơlĕch. Mĭnh pôm hnam xă 36 mét vuông, hăm tơ nar man, pơ bŭng kem, hơnă hơkar pơnhan, đei kơjă 80 triệu hlak jên. Dang ei 1.200 ŭnh hnam hlôi mơ̆t oei hơrih sa, kiơ̆ đơ̆ng noh tơgop tơgŭm dêh char Đắk Lắk sut pơngot, tơ jur dơnuh hin vang tơgŭm mơmat tat hăm kon pơlei kon kông, tơgŭm kon pơlei sơđơ̆ng jang sa, mĭnh ƀơ̆r đon pơjing mŭk drăm, tơring tơrang ‘nao păng vei lăng sơđơ̆ng teh đak. Mĭnh tơdrong jang tih, mă lei hlôi jang đang lăp lơ̆m hloh 4 khei kŭm ăn ƀôh tơdrong tơmơ̆t jên jang tơpăt, jang hơdai đei yua đơ̆ng rim kơdră anih jang.