Hrei ‘nâu, tơring kon pơlei kon kông păng tơring groi kông hlôi păng tŏk bŏk jing tơring dơnuh hin hloh lơ̆m teh đak. Mă hơdăh ‘noh, jô̆ păh lăp đơ̆ng ŭnh hnam bơngai kon kông tơ̆ lơ tơring lăp dang 40-50% jô̆ păh lăp iŏk yua lơ̆m tơring; kơsô̆ kon pơlei kon kông đei 14,7% , mă lei kơsô̆ ŭnh hnam dơnuh hin đei vă 60% akŏp kơsô̆ ŭnh hnam dơnuh hin lơ̆m teh đak. Hăm tơdrong tơm “ Pơm tơjê̆ răh găh tơdrong arih sa, iŏk yua đơ̆ng tơring kon pơlei kon kông păng tơring groi kông pơtêng hăm jô̆ păh lăp atŭm kơ lơ̆m teh đak; truh sơnăm 2025 tơjur 50% kơsô̆ xăh, pơlei mơ mat tat hloh; truh sơnăm 2030 ưh pă đei xăh, pơlei, âp mơmat tat hloh”, Kuôk hô̆i hlôi kĭ ăn akŏm jên hloh 137 rơbâu ti hlak jên vă jang kiơ̆ Tơdrong jang tơm kơ teh đak hơtŏk tơiung mŭk drăm - tơôl tơring kon pơlei kon kông păng tơring groi kông jăl jang 2021 – 2030, hăm 10 tơdrong jang, 14 tơdrong jang iĕ păng 36 tơdrong jang tơmơ̆t jên jang, tơgŭm hơdăh lơ̆m jăl jang 1 đơ̆ng dang ei truh đĭ sơnăm 2025.

Tơdrong ‘nao lơ̆m bơ̆jang pơgơ̆r pơm tơlĕch đơ̆ng tơdrong jang ‘noh jĭ tơplih yua kơ tơgŭm kơtă, tơgŭm đei tơdrong hiôk ăn kon pơlei, Tơdrong jang akŏm tơchĕng hơlen păng pơih să dôm tơdrong jang hơtŏk tơiung pơm tơlĕch kiơ̆ kơjă, pơjing tơring tơmam vă iŏk jang tơmam ‘lơ̆ng kiơ̆ trong tơplih ming ‘long pơtăm, kon tơrong đei iŏk yua, pơm tơdrong jang, hơtŏk iŏk yua ăn ŭnh hnam kon pơlei, tơjur dơnuh hin kơjăp. Hơdai hăm tŭn pran jơhngơ̆m tơiung tơdrong jang sa lơ̆m kon pơlei kon kông kiơ̆ lơ̆m tơdrong ‘lơ̆ng, tơdrong pran păng tơmam đei đơ̆ng hơdrol tơ̆ tơring. Kiơ̆ TS Hà Việt Quân, Grŭp pơjing tơdrong jang akŏm păng tơdrong jang tơm kơ teh đak hơtŏk tơiung mŭk drăm tơpôl tơring kon pơlei kon kông păng tơring groi kông jăl jang 2021- 2030:

Gơh tơroi ‘noh jĭ ‘măng mă blŭng lơ̆m jơhnơr arih tơdrong jang vei lăng hơdrĕch kon kông hlôi lăng ƀôh Đảng păng teh đak akŏm jơhngơ̆m tơmơ̆t jên jang ăn tơring ‘nâu, vă pơm đei tơdrong tơplih 1 trong akŏm. Mưh lei, tơdrong kiơ gĭt kăl lơ̆m iŏk yua kon jên âu, ƀơm truh tơdrong tơroi athei tơplih trong gơh yua lơ̆m hơtŏk tơiung mŭk drăm tơpôl tơring kon pơlei kon kông, ‘noh jĭ ‘măng mă blŭng bơ̆n lăng tơring ‘nâu ‘noh jĭ tơring hơtŏk tơiung vă đei trong jang tơgŭm tơmơ̆t jên jang, mă ưh kơ pơdăr tơ̆ tơdrong jang tơgŭm nhen jăl jang hơdrol.

Hăm tơdrong tơm hơtŏk ‘lơ̆ng păng tơplih hơmet ming bơngai jang, tơdrong jang kŭm hơnhăk tơdrong tơm hơtŏk tơiung pơtho pơhrăm tơdrong jang păng tơchă ăn tơdrong jang ăn bơngai jang tơring kon pơlei kon kông păng tơring groi kông vă vei sơđơ̆ng păng hơtŏk tơiung mŭk drăm ưh kơ đei choh jang sa. Tơdrong jang kŭm hlôi đei pơm hơdrô̆ tơdrong jang hăm hơtŏk tơiung pơtho pơhrăm, hơtŏk tơiung tơdrong jang pơgang tơ̆ tơ ring kon kông păng tơring groi kông, lơ̆m noh akŏm lơ̆m dôm tơdrong tơm nhen: Hơtŏk ‘lơ̆ng đon hlôh vao, hơnăp jang găh tơdrong jang sut ưh kơ gơh chư, hơnơ̆ng pơvei păng hơtŏk ‘lơ̆ng đei yua tơdrong jang sut ưh kơ gơh chư; Tơgŭm tơmam drăm, kơmăy kơmŏk joh ayŏ ăn tơring kon pơlei kon kông păng tơring groi kông vă hơtŏk ‘lơ̆ng tơdrong iŏk yua găh joh ayŏ ăn kon pơlei, tơklep hăm hơtŏk tơiung tơmang lăng tơpôl... Ƀok Vũ Dương Châu, sơ̆ pơm Kơdră Anih vei lăng hơdrĕch kon kông, Anih jang Trung ương MTTQ Việt Nam pơma hơdăh:

Bơ̆n kăl kơ akŏm hơmet pơ ‘lơ̆ng dôm tơdrong blĕk kơ đon, mơ mat tat tih đơ̆ng kon pơlei hrei ‘nâu, pơdui đunh lơ sơnăm, lơ̆m 1,2 hơdrĕch kon kông đĕch, nhen tơdrong glăi dư si ke, iŏk ŭnh om hrôih, oei băl hơgăm, mă loi ‘noh jĭ tơjur kơsô̆ ŭnh hnam dơnuh hin, ming man anih jang kăl, anih kơ drơ̆m tơring, pơm anih tơm dui dôm tơring nai, mă loi ‘noh jĭ kăl kơ chĕng hơmet hơnih kon pơlei akŏm kăl kơ đei đơ̆ng 40 ŭnh tơ̆ kơ pal, vă veh ver kơ teh hơ lih đak lŏk jroh. Mă 3 ‘noh jĭ tơmơ̆t jên jang tơgŭm dôm bơngai kon kông hơtŏk tơiung tơmam, tŭn pran pơtho tơdrong jang, pơm tơdrong jang ưh kơ choh jang sa, pơtrŭt dôm anih jang mơdro sa vang jang, tơplih ‘nao trong jang tơgŭm vei lăng bri. Hăm pơtho pơhrăm ‘noh bơ̆n hơnơ̆ng đei hơtŏk tơiung pơtho pơhrăm, hơtŏk ‘lơ̆ng tơdrong kon pơlei hlôh vao, pơtho pơhrăm bơngai jang, vei sơ đơ̆ng ‘lơ̆ng ăn chăl 4.0, vă kon pơlei jang kiơ̆ đei chăl 4.0 âu.

Truh khei ‘năr âu, jên jang đơ̆ng Tơdrong jang hlôi đei klăih song. Rim kơdră rim anih jang rim tơring kăl kơ 1 jơhngơ̆m, tŭn pran tơlĕch jang dôm tơdrong jang đơ̆ng Tơdrong jang, lơ̆m noh pơlong lăng păng tŭn pran tơlĕch jang dôm tơdrong jang hơtŏk tơiung pơm tơlĕch đei yua; jăh jang đang păng tơmơ̆t dôm anih jang lơ̆m iŏk jang, pơm tơdrong hiôk tơplih đon hlôh vao, hơtŏk ‘lơ̆ng tơdrong arih sa, hơtŏk iŏk yua ăn kon pơlei iŏk đơ̆ng sơnăm blŭng tơlĕch jang Tơdrong jang. Nơ̆r tơgop đơ̆ng ƀok Trần Đức Anh, Bí thư Đảng xăh Hương Liên, apŭng Hương Khê, Hà Tĩnh:

Khei ‘năr âu ki, jang kiơ̆ tơdrong jang vei lăng bơngai Chứt, tơdrong arih sa kŭm đei lơ tơplih, mă đơ̆ng thoi noh, tơ̆ hơnăp kơnh, Kơdră Đảng, kơdră tơring kŭm tôch kơ ‘meh vă dêh char, Trung ương jăh đei tơchơ̆t hrôih pơjao teh pơjao bri ăn kon pơlei kon kông vă kon pơlei đei hơnih jang sa.

Hơdai hăm tơdrong hơmet ming anih jang kăl ‘noh hơtŏk tơiung mŭk drăm tơpôl tơ̆ dôm tơring kon kông kăl kơ bơngơ̆t truh tŭn pran pơgơ̆r pơm tơlĕch tơmam kiơ̆ trong kơjăp, vei lăng tơdrong arih sa jơhngơ̆m đon kơ kon pơlei năm hơdai hăm tơgŭm tơiung tơdrong jang sa, tơiung tơdrong tĕch mơdro vă kon pơlei yak hloh pơm pơdrŏng. Jĭ sơnăm blŭng jang kiơ̆ tơdrong tơm teh đak, tơdrong jang tơiung ming hơtŏk tơiung mŭk drăm đơ̆ng rŏng jĭ COVID-19…hơmĕng ‘nâu gô jing trong jang tơgop pơtrŭt hơtŏk tơiung mŭk drăm hai, vei lăng sơđơ̆ng tơdrong arih sa tơpôl hai.