‘Nâu jĭ ‘măng mă blŭng mŏ Nguyễn Thị Ngọc Lan kŭm hăm 1,2 ‘nu tơmoi đơ̆ng pơlei tơm Hồ Chí Minh năm “ Tŏk tơ̆ kông chă răp lăng hơmơ̆l” tơ̆ apŭng Lắk, dêh char Dak Lak. Trong tơ sĕr, tŏk tơ ngơ̆, mă lei đei bri jơk ‘lơ̆ng, xem asi, đak glung ro hơ hŏr dơ̆ng kơ na tơdrong chơt chă lăng hlôi tơgŭm mŏ hăm đĭ đăng khŭl tŏk hlôi tơ̆ loĕl Kông Yang Lắk, mĭnh lơ̆m dôm loĕl kông ‘lơ̆ng rŏ hloh kơ dôm Kông Yang Sin. Mŏ Nguyễn Thị Ngọc Lan tơroi, ‘măng năm tôch kơ hơiă:

 Yua kơ ăn hmă ‘noh ưh kơ đei lai yơ tơchĕng ĭnh gô tŏk đei hlôi kông kơ jung thoi âu, mă lei khŏm hơdrin. Năm tŏk bŏk trong ‘noh kŭm lap, mă lei chă pơ lung kơ dih akhan lĕch pă 1 jơ dơ̆ng ‘noh tŏk truh. Tŏk truh tơ̆ âu ‘noh ƀôh ‘năr tôch kơ ‘lơ̆ng hiôk, tơ̆ hơ la to ưh kơ đei lai yơ ƀôh đei dôm tơdrong hơiă âu. Lu nhôn oei tơ̆ pơlei tơm ưh kơ đei ƀyơh ƀôh ‘long, hla lơ  nhen thoi ‘nâu.

 Tŏk tơ̆ kông chă răp lăng hơmơ̆l ‘noh jĭ lơ̆m 2 tơdrong hơiă đơ̆ng Y Xim Ndu, tơdăm bơngai Mnông oei tơ̆ plei Yuk La1, xăh Đắk liêng, apŭng Lắk, dêh char Dak Lak, jô̆ đơ̆ng sư tơiung pơjing tơdrong jang sa lơ̆m tơdrong jang tơmang lăng. Tơdrong ‘lơ̆ng nai đơ̆ng Y Xim ‘noh tơdrong năm lăng tơdrong arih sa, joh ayŏ dôm pơlei pơla jum dăr dơnâu đak Lắk. Y Xim Ndu tơbăt, sư akŏm đĭ jơhngơ̆m ăn 2 tour năm chă lăng cham char bri brăh păng pơlei pơla. Mă đơ̆ng đei khei ‘năr pŭ ƀơm ưh kơ ‘lơ̆ng kơtang yua đơ̆ng jĭ hơbuh mă lei truh dang ei, kŏng ti jang găh tơmang lăng Chư Yang Sin yua đơ̆ng sư pơjing, hlôi đei kơsô̆ tơmoi năm chă ngôi tơmang lăng sơđơ̆ng:

 Ĭnh hơtŏk tơiung kiơ̆ trong tơmang lăng cham char bri brăh hơdai hăm vei lăng cham char păng vei răk tơdrong joh ayŏ kơ kon pơlei kon kông. Tơ̆ hơnăp âu kơnh tơdăh hơtŏk tơiung ‘lơ̆ng ‘noh ĭnh gô lăng truh tơmoi teh đak đe tơ̆ Việt Nam. Tơdrong mă ĭnh ‘meh vă ‘noh jĭ tơdrong jang đơ̆ng ĭnh gô pơm đei đon lui, tưk tơiung ăn kơ đe buăl mơ lôh găh tơiung pơjing tơdrong jang sa, mă loi ‘noh jĭ đe buăl mơlôh bơngai kon kông lei lăi nhen ĭnh, gô hlôi đei tơdrong gĭt kăl, tơdrong ‘lơ̆ng đơ̆ng tơdrong jang mŭk drăm tơklep hăm tơdrong vei răk păng tơƀăk mong tơdrong ‘lơ̆ng hơiă joh ayŏ hơdrĕch hơdrŭng nhôn.

Kŭm tơiung pơjing tơdrong jang sa tơ̆ groi kông Dak Lak, mă lei Chu Thị Lan, oei tơ̆ xăh Ea Kly, apŭng Krông Pach, ‘noh jơnei hăm tơdrong jang ngêh ngăi kơ nhen ưh kơ đei tơdrong pran, ‘noh jĭ vei lăng jơhngơ̆m pran. Tơmam hla che đơ̆ng hla ‘long păng tơmam ngă Lanchans yua đơ̆ng sư hơtŏk tơiung hlôi đei tĕch pơlong păng ƀơ̆t vang pơlong hlôi iŏk đei jơnei mă mônh tơ̆ ‘măng pơlong tơiung tơdrong jang sa tơplih ‘nao hơgei dêh char Dak Lak. Kiơ̆ kơ mŏ Chu Thị Lan, ‘măng pơlong tơiung tơdrong jang sa yua đơ̆ng dêh char pơgơ̆r ‘noh jĭ ‘măng gĭt kăl vă sư pơm roi ‘lơ̆ng tơmam ngă kŭm hăm đon tơchĕng tĕch mơdro. Kiơ̆ đơ̆ng noh pơm kơ đeh đei tơdrong jang hơnhăk tơmam truh tơmoi răt:

 Tơdrong jang pơgơ̆r dôm ‘măng pơhrăm tôch kơ đei yua vă kơ ĭnh gơh hơmet roi ‘lơ̆ng, tơmơ̆t lơ̆m tơdrong jang tĕch mơdro sa đơ̆ng ĭnh. Kiơ̆ đơ̆ng ‘măng pơlong âu ĭnh đei tơdrong hiôk tơ ƀơ̆p đei lơ bơngai tơmơ̆t jên jang. Mă tơpă ‘noh tơdrong ƀơm truh jơhngơ̆m pran âu kŭm đei lơ bơngai tơmơ̆t jên jang đe sư bơngơ̆t truh păng pŭn ai ‘noh lơ̆m ‘măng pơlong âu kŭm đei lơ bơngai tơmơ̆t jên jang bơngơ̆t truh păng ‘meh đei jang hơdai tơ̆ hơnăp kơnh.

Kŭm hăm tơdrong chă jơnei đơ̆ng dôm trong hơdrô̆ pha ra nhen đơ̆ng ‘nhŏng Y Xim Ndu păng mŏ Chu Thị Lan, tơpôl tơiung tơdrong jang sa tơ̆ Dak Lak oei tơgoăt lơ̆m dôm khŭl grŭp vă hơtŏk tơdrong pran, jang đei dôm tơdrong tơm tih hloh. Kiơ̆ kơ ƀok Phạm Hoài Nguyên Anh, Kơdră kâu lak ƀô̆ tơmơ̆t jên jang păng tơiung tơdrong jang sa ( Khŭl bơngai mơdro sa mơlôh dêh char Dak Lak), ƀơ̆t tơklep hăm băl, dôm starup hlôi tơchă ƀôh lơ tơdrong hiôk hloh ăn kơ dôm tơdrong jang tơiung tơdrong jang sa đơ̆ng bơ̆n:

 Vă ‘lơ̆ng tơpă păng đei yua hloh ‘noh păih kâu lăk ƀô̆ tơmơ̆t jên jang păng tơiung tơdrong jang sa bơngai mơdro sa mơ lôh gô 1 kiơ̆ 1, vă khan 1 ‘nu kiơ̆ 1 ‘nu. Dang ei ‘noh kŭm tŏk bŏk tơgoăt đei 1 kơ sô̆ tơmam đơ̆ng đe buăl ‘nhen ka lăng, sầu riêng, đak ƀâu phu. Dôm buăl ‘noh tŏk bŏk jing bơngai jang kơ kâu lak ƀô̆ Tơmơ̆t jên jang păng tơiung tơdrong jang sa bơngai mơdro sa mơlôh, găh khŭl jang kơ Kâu lak ƀô̆ tơmơ̆t jên jang păng Tơiung tơdrong jang sa Trung ương Khŭl mơdro sa mơ lôh Việt Nam. Kâu lak ƀô̆ đei bơ̆ jang nhen tơgoăt, vang tơgŭm, hŏk pơhrăm păng mơdro sa. ‘Ngoăih kơ ‘noh, đei anih bơ̆jang, đei hơnih tơ oei bơ̆jang đĕch, đei tơmam vă ăn kơ đe buăl tơiung tơdrong jang sa gơh truh tơ̆ noh vă bơ̆jang dôm tơdrong jang tĕch mơdro rim năr.

Yak hloh dôm long nol đơ̆ng jĭ hơbuh, tơdrong jang tơiung tơdrong jang sa tơ̆ Dak Lak oei đei dôm tơdrong ‘lơ̆ng đơ̆ng tơpôl tơiung tơdrong jang sa tơ̆ tơring. Ưh kơ rok kiơ̆ trong iĕ dăh mă kơ sô̆ lơ, lơ bơngai mơlôh hlôi rơih iŏk năm kiơ̆ dôm trong hơdrô̆ păng lăng băt đei dôm tơdrong jang hơmĕng. Rim kơdră, rim khŭl mơdro sa tơ̆ dêh char kŭm hơnơ̆ng đei dôm tơdrong jang pơm hơtŏk tơiung ăn dôm bơngai tơiung tơdrong jang sa, tơgŭm tơdrong jang tơiung tơdrong jang sa tơ̆ dêh char roi ‘năr roi lơ păng ‘lơ̆ng.