VOV4.Bahnar - Xăh Lộc Bắc, apŭng Bảo Lâm, dêh char Lâm Đồng đei hloh 1.500 ŭnh hnam, 4.858 măt bơ ngai, lơ̆m noh bơ ngai kon kông đei vă jê̆ 73%. Gơ nang đơ̆ng plih pran lơ̆m trong tơ chĕng trong jang, hơ nhăk khoa hŏk ki thuơ̆t hơ gei lơ̆m jang sa, kŭm hăm tơ drong bơ ngơ̆t truh, tơ gŭm, tơ mơ̆t jên jang đơ̆ng Đảng păng teh đak găh rim tơ drong kơ na tơ drong arih sa mŭk drăm kơ kon pơ lei tơ ring ‘nâu hlôi tơ plih rim năr.

            Năm tơ̆ xăh Lộc Bắc, apŭng Bảo Lâm, dêh char Lâm Đồng lơ̆m mĭnh năr blŭng sơ năm ‘nao, ƀơ̆t tơ ring ‘nâu tŏk bŏk pơm kiơ̆ oei sa sơ đơ̆ng hmă hăm jĭ hơ buh Covid-19, nhôn hlôi măh hơ mrêng tơ̆ hơ năp tơ drong tơ plih đơ̆ng 1 tơ ring đei lơ bơ ngai K’ho âu. Dôm tŏ hnam gia, tơ năr ‘lao sơ̆ dang ei hlôi đei tơ plih hăm dôm hnam man kơ jăp ‘lơ̆ng, trong man, hnam trưng hŏk, hnam pơ gang xăh man ‘lơ̆ng... ăn ƀôh tơ drong arih sa kơ kon pơ lei hlôi phĭ tơ nŏ, tôm măh.

            Ƀok K’Làng, oei tơ̆ thôn 3, xăh Lộc Bắc chhôk hơ iă tơ roi, sơ năm ‘nâu, mă đơ̆ng ƀơm ưh kơ ‘lơ̆ng đơ̆ng jĭ Covid-19 mă lei kơ jă cheh phe oei tŏk lơ, hnam hơ yơ kŭm iŏk đei 2,3 jĭt truh 2,3 hrĕng trê̆u hlak jên kơ na pơ gơ̆r hiôk chơt sơ năm ‘nao đei tôm măh ƀiơ̆. Đei đăi jơ nei âu ‘noh gơ nang đơ̆ng tơ mơ̆t yua khoa hŏk ki thuơ̆t lơ̆m choh jang sa. Ƀok K’Làng tơ roi:

            “Kŭm gơ nang đơ̆ng Đảng păng teh đak bơ ngơ̆t truh tơ mơ̆t jên jang, tơ gŭm pơ tăm ‘long cheh phe, hla che, pơ tho trong jang sa kơ na tơ drong arih sa kơ kon pơ lei hlôi hơ tŏk tơ iung tôch kơ lơ pơ têng hăm hơ drol. Trong nơ năm, hnam trưng hŏk, hnam pơ gang kŭm đei ming man ‘nao ‘lơ̆ng, tơ drong năm vih vơ̆t, hŏk pơ hrăm đơ̆ng kon mon hiôk ngăl. Tơ drong arih sa hơ tŏk tơ iung  kơ na kon pơ lei tôch chhôk hơ iă”.

            Lộc Bắc jĭ xăh pơ tăm ‘long kăp gĭt đunh năr ngăl, lơ̆m noh cheh phe ‘noh lơ hăm hloh 941 hek tar, ‘long điều 164 hek tar, tiu 22 hek ter păng kơ hrĕng hek tar ‘long sa plei rim kơ loăi. Găh lơ dôm hơ găt ‘long âu tă hlôi tơ plih dôm kơ loăi hơ drĕch ‘nao, tơ mơ̆t khoa hŏk ki thuơ̆t hơ gei lơ̆m choh pơ tăm, tơ jur jên tơ mơ̆t jang mă lei hơ tŏk đei iŏk yua lơ̆m 1 hơ găt teh. Lăp jô̆ hơ drô̆ ‘long cheh phe, tơ dăh sơ năm 2017 đei iŏk yua 2,7 tấn 1 hek tar ‘noh truh sơ năm 2020 đei 3 tấn 1 hek ter păng truh sơ năm 2021 đei 3,3 tấn 1 hek tar. Mŭk drăm tơ plih ‘lơ̆ng, iŏk yua tŏk lơ kơ na tơ drong arih sa kơ kon pơ lei tơ ring ‘nâu hlôi phĭ tơ nŏ păng hiôk chơt ƀiơ̆ tôch kơ lơ pơ têng hăm hơ drol. Ƀok K’Pép, Bí thư chi bộ thôn 5, xăh Lộc Bắc chhôk hơ iă tơ roi:

            “Găh iŏk yua đơ̆ng ƀơ̆t jang kiơ̆ tơ drong jang tơm pơ jing tơ ring tơ rang ‘nao, truh dang ei tơ drong arih sa hlôi tơ plih ‘nao bơ̆ih. Đĭ đăng hnam pơm pơ gia hlôi đei sŭt, tơ jur răh ŭnh hnam dơ nuh hin păng tŏk răh ŭnh hnam đei ƀôh kiơ̆ rim sơ năm, đei ŭnh hnam oei răt gre ô tô ‘nao, kon mon đei hŏk pơ hrăm truh trong. Chhôk hơ iă hloh ‘noh jĭ kon pơ lei hlôi đei pơ tho ki thuơ̆t choh pơ tăm, băt trong jang sa kơ na iŏk yua roi tŏk. Jĭ pơ lŏ năm tơ̆ hnam pơ gang xăh khăm hơ met jĭ, mơ mat tat gleh hrat ‘noh vang hơ dai băl tơ gŭm, ling lang pơ lung băl vei rơ goh pơ lei pơ la, ưh pă đei tơ drong pơ ngot dơ nuh hin dơ̆ng bơ̆ih. Tơ drong arih sa roi tŏk đei ƀôh kơ na kon pơ lei vang hơ drin rim tơ drong jang yua đơ̆ng tơ ring tơ lĕch jang, lơ̆m noh đei tơ drong jang pơ jing tơ ring tơ rang ‘nao”.

            Ƀok K’Núi, Kơ dră Anih vei lăng kon pơ lei xăh Lộc Bắc pơ ma hơ dăh, truh hơ tuch sơ năm 2021 xăh hlôi jang đang pơ đĭ 19/19 tơ drong hơ găt pơ jing tơ ring tơ rang ‘nao. Tơ tăm hloh ‘noh jĭ tơ drong hơ găt hơ tŏk lơ iŏk yua, tơ jur dơ nuh hin mă lei xăh kŭm jang đang ‘lơ̆ng. Kơ jă pơm tơ lĕch lơ̆m 1 hơ găt teh choh pơ tăm đei hloh 110 triệu hlak jên 1 hek tar 1 sơ năm, iŏk yua jô̆ păh lăp kơ̆l bơ ngai đei vă jê̆ 42 triệu hlak jên păng kơ sô̆ ŭnh hnam dơ nuh hin lăp oei pă 4,2%. Truh âu kơnh, xăh gô hơ nơ̆ng krao hơ vơn kon pơ lei tơ mơ̆t yua khoa hŏk ki thuơ̆t lơ̆m jang sa vă hơ tŏk ‘lơ̆ng tơ mam, hơ tŏk iŏk yua.

            “Sơ̆ tơ drong arih sa kơ kon pơ lei tơ̆ xăh Lộc Bắc tôch mơ mat tat yua tam mă băt tơ mơ̆t yua khoa hŏk ki thuơ̆t lơ̆m jang sa. Dôm sơ năm tơ jê̆ âu tơ mơ̆t đei ki thuơ̆t lơ̆m jang sa, ‘long pơ tăm plei lơ, iŏk yua lơ hloh kơ na tơ drong arih sa mŭk drăm kơ kon pơ lei hlôi sơ đơ̆ng păng hơ tŏk tơ iung bơ̆ih. Truh âu kơnh tơ ring krao hơ vơn kon pơ lei kơ tă tơ mơ̆t yua khoa hŏk hơ gei hloh găh choh jang sa. Tơ drong tơm ‘noh athei vei mă đei tơ drong hơ găt iŏk yua ( kon pơ lei hlôi iŏk đei 42 triệu 1 sơ năm), vei sơ đơ̆ng ‘lơ̆ng tơ drong arih sa kơ jăp, yak truh pơ jing tơ ring tơ rang ‘nao ‘lơ̆ng rŏ”.

            Nhôn tơ klăh ti Lộc Bắc ƀơ̆t ‘năr hơ heo tơ ngiĕt tơ̆ kơ sơ̆ blŭng sơ năm lơ̆m trong pơm hăm nhươ̆, 2 păh trong ‘noh dôm hnam tih ‘lơ̆ng ‘nao man tŏk bŏk kơ mâu jơk glơch bri kông păng dôm pơ gar cheh phe, ‘long sa plei jing ‘lơ̆ng, pơ kă hơ nhăk truh dôm pơ yan jang đei iŏk yua lơ... Tơ drong arih sa kơ kon pơ lei K’ho pă jor gô ưh kơ pơ dơh hơ tŏk tơ iung jô̆ đơ̆ng pơ yan puih mak ‘nâu.

            Quang Sáng: Chih

            Thuem: Tơ blơ̆