Mon hơioh drŏ nglo Y Rôlin Niê (10 sơnăm, oei tơ̆ plei Dur 1, xăh Dur Kmăn, apŭng Krông Ana) ngôi gram ƀă sư, ƀơ̆r hiơ hiĕk hơnul. 'Nhŏng Y Viễn H Mok, tơbăt, Y Rôlin jĭ kon mŏ hơkăn sư. Mon hiong mĕ ƀơ̆t ‘nao 18 khei, ƀă hơchăng hŭt năm chă hơkăn plơ̆ng. Ƀơ̆t doh, mă đơ̆ng ‘nao iŏk ŭnh om păng hơrih sa tôch kơ mơmat tat, kơdih sư ‘noh jo jăn dơ̆ng, mă lei mơnat kơ mon ưh kơ đei bu vei lăng kơna klo kăn sư hlôi pơm hla ar iŏk rong mon.

Ƀơ̆t blŭng iŏk rong nge ưh kơ băt trong thoi yơ ‘noh kŭm ƀôh mơmat tat ƀiơ̆. Đei ƀok yă vang rong ‘me, dang ei kon ‘lŏ bơih ĭnh ƀôh  chơt păng hiôk. Dang ei ĭnh ƀôh kon rơneh ĭnh, ‘mêm hloh kơ kon ĭnh, ƀôh mơnat hloh.

Băt găh tơdrong hơrih kơ mon Y Rôlin, đơ̆ng sơnăm 2022, Khŭl drŏ kăn xăh Dur Kmăn hlôi krao hơvơn dôm bơngai đei jơhngơ̆m đon ‘mêm mơnat ‘moi kiơ̆ tơdrong jang “Mĕ hơđơ̆ng” tơgŭm mon 1 khei 500.000 hlak jên. Hăm kơ sô̆ jên âu mon đei dơ̆ng jên răt hla ar hŏk, tơmam yua hŏk pơhrăm, dă ƀiơ̆ mơmat tat ăn ŭnh hnam.

Mĭnh ‘nu nai kŭm iŏk đei tơdrong tơgŭm đơ̆ng tơdrong jang “Mĕ hơđơ̆ng” ‘noh mon H’Hồng Niê, 14 sơnăm, oei tơ̆ plei Akô Siêr, phường Tân Lập, pơlei tơm Buôn Ma Thuột. Mĕ sư lôch đunh kơ âu 4 sơnăm, ƀă chă hơkăn plơ̆ng kơna H’Hồng ƀrŏk oei hăm ƀok yă găh mĕ sư. Ƀok yă hơnơ̆ng jĭ pơ lŏ, iŏk yua ưh kơ sơđơ̆ng. Đơ̆ng sơnăm 2021, hăm tơdrong tơgoăt đơ̆ng Khŭl drŏ kăn phường Tân Lập, mon đei yă Đỗ Thị Thơm - tơ ‘ngla 1 anih mơdro sa tơ̆ pơlei tơm Buôn Ma Thuột “iŏk tơgŭm” truh 18 sơnăm. H’Hồng Niê tơroi:

 Ĭnh iŏk đei tơdrong ‘mêm kơ eng đơ̆ng mĕ Thơm ‘noh ĭnh ƀôh đă ƀiơ̆ đei 1 păh hơ yơ tơdrong kơƀăh kơƀôch ưh kơ đei mĕ. Mĕ tơgŭm ĭnh 1 khei ‘noh 500.000 hlak jên, đunh đunh mĕ kŭm đei năm ngôi dăh mă nhắn tin ăn kơ ĭnh. Ĭnh lăp băt hơdrin hŏk mă hơgei, vă đơ̆ng rŏng âu gơh ‘mong plơ̆ dôm tơdrong kiơ mă mĕ Thơm hlôi bơngơ̆t truh păng ‘mêm kơ eng kơ ĭnh.

Tơ̆ Dak Lak dang ei đei vă jê̆ 2.300 hơioh mơti, lơ̆m noh đei vă jê̆ 700 hơioh mơ ti pơđĭ mĕ ƀă păng đei tơdrong arih sa tôch kơ mơmat tat. Jang kiơ̆ tơdrong jang ‘Mĕ hơđơ̆ng: yua đơ̆ng Trung ương Khŭl hơtŏk tơiung, lơ̆m 2 sơnăm âu ki dêh char Dak Lak hlôi tơgoăt dôm anih jang, rim bơngai, bơngai đei jơhngơ̆m đon ‘mêm mơnat kơ đe păng dôm kơdră khŭl drŏ kăn iŏk tơgŭm ăn vă jê̆ 700 hơioh mơti hăm akŏp kơ sô̆ jên tơgŭm hloh 7 ti 800 triệu hlak jên. Hăm lơ trong jang tơgŭm nhen: pơjao jên măt, pơih kơ sâp hla ‘mơ ‘met jên, asong hŏk ƀŏng, ming man hnam ‘mêm kơ eng, asong gre tang vang, klang tap, hơbăn ao. Ưh khan lăp tơgŭm găh tơmam drăm, khŭl drŏ kăn rim tơring oei klăih song bơngai jang lơ̆m khŭl hơnơ̆ng năm ngôi apĭnh jet gia, răp hơlen lăng tơdrong hŏk pơhrăm đơ̆ng đe mon.

Yă Tô Thị Tâm, Kơdră Khŭl vei lăng drŏ kăn dêh char tơbăt, tơdrong jang đei tơdrong ‘lơ̆ng ‘mêm mơnat gĭt kăl. Kiơ̆ đơ̆ng noh, pơm tơ jur răh ƀiơ̆ tơdrong ơh sơ ‘ngon, jing hơnih gơnang kơjăp vă đe mon pran kơtang yak hloh tơdrong hơrih sa mơmat tat, yak dơ̆ng truh tơ̆ hơnăp kơnh.

Nhôn kŭm ‘meh vă krao hơvơn tơdrong vang tơgŭm mơ̆t jang đơ̆ng pơ đĭ tơpôl, gơh ‘moi kiơ̆ anih mong jên đơ̆ng Khŭl drŏ kăn dêh char dăh mă ‘moi kiơ̆ Anih mong jên tơgŭm hơioh yua đơ̆ng Anih vei lăng găh bơngai jang dêh char vei lăng vă kơtă tơgŭm ăn đe mon. Păng ‘meh akhan dôm khŭl jang, rim bơngai, dôm anih jang mơdro sa, dôm khŭl grŭp lơ̆m păng ‘ngoăih dêh char hlôh vao đei tơdrong tơgŭm ăn hơioh, gô tơgŭm kiơ̆ lơ kênh pha ra băl, kiơ̆ lơ tơdrong jang pha ra băl păng tơgŭm hăm jơhngơ̆m đon păng hăm tơmam drăm.

‘Moi kiơ̆ tơdrong jang “Mĕ hơđơ̆ng”, lơ hơioh mơ ti tơ̆ Dak Lak hlôi đei dơ̆ng tơdrong hơlêm, pơlung, đei hơrih lơ̆m tơdrong ‘mêm kơ eng. Tơdrong pơlung pơđĭ găh tơmam drăm hăm jơhngơ̆m đon hloi gô tơgŭm đe mon đei dơ̆ng tơdrong ‘lơ̆ng yak hloh dôm tơdrong ơh sơ ‘ngon, yak tŏk lơ̆m tơdrong hơrih sa, yak hloh 1 khei ‘năr tơ̆ hơnăp kơnh ‘lơ̆ng hloh.