Tro ti tơƀôh trong ƀê tŏng bliu, năm klĕch dôm pơlei pơla, kră pơlei K’Keo, oei tơ̆ plei Hàng Làng, xăh Gung Ré, apŭng Di Linh (Lâm Đồng) chơt hơiă tơbăt, um ai tơring tơrang kơ xăh hlôi tơplih tôch kơ lơ pơtêng hăm hơdrol. Gơnang đơ̆ng trong nơnăm vih vơ̆t hiôk, tơmam đơ̆ng choh jang sa ưh kơ đei bơngai mơdro pơgơ̆ kơjă, pơm kơđeh trong hơtăih đơ̆ng pơlei pơla hăm anih kơdrơ̆m... kơna tơdrong arih sa tơmam drăm păng jơhngơ̆m đon kơ kon pơlei đei hơtŏk ‘lơ̆ng tôch kơ lơ pơtêng hăm hơdrol sơ̆.

Đei đăi jơnei âu ‘noh gơnang đơ̆ng tơdrong bơngơ̆t truh tơmơ̆t jên jang đơ̆ng Đảng păng teh đak găh rim tơdrong, lơ̆m noh đei tơdrong jang tơm teh đak găh pơjing tơring tơrang ‘nao.“Băt đei, hlôh vao đei ‘nâu jĭ tơdrong jang păng tơdrong đei yua đơ̆ng kon pơlei kơna kon pơlei tôch kơ lăp đon jang kiơ̆. Khei ‘năr âu ki, kon pơlei hlôi plang song ‘long, teh păng tơgop jơhngơ̆m bơngai mŭk tơmam vă hơdai hăm teh đak pơjing tơring tơrang ‘nao. Teh đak ‘noh tơgŭm păng kon pơlei ‘noh tơgop vă pơih să trong năm tơ̆ dôm hơnih choh jang sa, ming man trong nơnăm tơring tơrang. Pơm liơ pơjing pơlei pơla đei trong năm vih vơ̆t, pơm tơdrong hiôk hơtŏk tơiung mŭk drăm, tơgŭm ăn um ai tơring tơrang roi ‘năr roi ‘lơ̆ng hloh.”

Ưh khan lăp tơ̆ plei Hàng Làng, xăh Gung Ré, mă tơdrong jang pơjing tơring tơrang ‘nao hlôi hơnhăk ăn đei yua ‘lơ̆ng ăn jơ̆p rim pơlei pơla kơ apŭng Di Linh, dêh char Lâm Đồng. Tơ̆ plei Duệ, xăh Đinh Lạc, đơ̆ng rŏng đei drơ̆ng ăn ‘noh jĭ plei oei sa ‘lơ̆ng, kon pơlei tơring ‘nâu hlôi hơdrin hloh lơ̆m vang tơgŭm hăm khŭl kơdră tơring pơjing păng bơ̆jang kiơ̆ dôm tơdrong hơgăt tơring tơrang ‘nao.

Kiơ̆ kơ ƀok M’Hiu Nguyên, Bí thư Chi bộ plei Duệ, kŭm yua kơ kon pơlei ƀôh đei kơjă kăp gĭt ‘lơ̆ng tơ pă đơ̆ng tơdrong pơjing tơring tơrang ‘nao hơnhăk ăn kơdih, ăn pơlei pơla kơdih kơna bu bu kŭm vang jang kiơ̆ ‘lơ̆ng. Lơ̆m noh, tơdrong jang Năr drâu tơring tơrang ‘nao hlôi păng tŏk bŏk đei lang să pran kơtang, tơgŭm um ai kơ pơlei pơla đei ƀôh ‘lơ̆ng kơ anih kơdrơ̆m tơm: đei ŭnh điên trong tơ̆k hơdăh, đei gre iŏk akŏm râm rĕk, trong pơlei să păng ling lang ‘yâu, rơgoh ‘lơ̆ng.

Ƀok M’Hiu Nguyên, tơroi: “Hrei ‘nâu tơ̆ plei Duệ hlôi păng tŏk bŏk jang kiơ̆ tôch kơ ‘lơ̆ng păng đei yua. Kang ƀô̆ păng kon pơlei tă kơ vang tơgŭm jang kiơ̆ Năr drâu tơring tơrang ‘nao. Mă hơdăh, trong pơlei ling lang rơgoh, ‘yâu, ‘lơ̆ng, râm rĕk đei iŏk akŏm, ŭnh kơ đeng tơ̆k hơdăh jum dăr pơlei, vă đĭ đăng dôm trong lơ̆m pơlei tă kơ đei pơm hơrăng hăm ƀê tŏng ngăl....um ai tơring tơrang hlôi đei tơplih ‘nao. Pơma atŭm tơdrong arih sa kơ kon pơlei ‘noh hlôi roi ‘năr roi đei hơtŏk tơiung hloh.”

Di Linh jĭ apŭng đei kon pơlei oei sa ‘noh jĭ bơngai kon kông đei kơ sô̆ lơ, hloh 40%, lơ̆m noh găh lơ ‘noh bơngai K’ho. Truh dang ei, lơ̆m apŭng hlôi đei 18/18 xăh đang ‘lơ̆ng tơring tơrang ‘nao, 2 xăh jang đang tơring tơrang ‘nao ‘lơ̆ng păng 1 xăh jang đang tơring tơrang ‘nao ‘lơ̆ng rŏ. Ƀok Vũ Đức Nhuần, Phŏ kơdră Anih vei lăng kon pơlei apŭng Di Linh tơbăt, vă hơnơ̆ng tơlĕch jang đei yua tơdrong jang pơjing tơring tơrang ‘nao lơ̆m jăl jang 2021-2025, Khŭl chĕp kơ̆l pơgơ̆r Anih jang Đảng apŭng Di Linh hlôi pơjing tơdrong jang 04 bơ̆jang kiơ̆ tơdrong jang Năr drâu pơjing tơring tơrang ‘nao tơ̆ jơ̆p pơlei pơla. Hloh vă jê̆ 1 sơnăm tơlĕch jang kiơ̆, tơdrong jang hlôi pơm đei tơdrong păr ang pran kơtang lơ̆m rim răih kon pơlei păng kang ƀô̆ đảng viên. Lơ̆m noh, hơnăp jang đơ̆ng kon pơlei lơ̆m tơdrong jang pơjing tơring tơrang ‘nao hlôi roi ‘năr roi đei sơkơ̆t hơdăh păng hơtŏk đei iŏk yua.

‘Nâu đei lăng jĭ tơdrong tơm vă apŭng iŏk đei dôm tơdrong hơgăt kăl păng tôm yak truh đei drơ̆ng ăn ‘noh jĭ apŭng tơring tơrang ‘nao lơ̆m sơnăm 2024. Ƀok Vũ Đức Nhuần, tơroi:“Tơdrong jang 04 ‘năr 18 khei 01 sơnăm 2023 đơ̆ng Khŭl chĕp kơ̆l pơgơ̆r Anih jang đảng apŭng ‘noh jĭ 1 tơdrong jang tôm tơdrong găh pơjing tơring tơrang ‘nao. Pơjao tơdrong hơgăt ăn kơ rim xăh, rim pơlei vă pơjing dôm tơdrong hơgăt găh tơring tơrang ‘nao. Lơ̆m khei ‘năr âu ki ‘noh mưh năr drâu, năr pơh ‘noh Kơdră, Bí thư apŭng, kơdră chĕp kơ̆l Anih vei lăng kon pơlei apŭng ‘noh nhôn athei klaih song đei dôm xăh vă pơtho tơbăt, đang kơ ‘noh hơdai hăm kon pơlei bơ̆jang kiơ̆ dôm tơdrong tơm nhen kôch hơmet hơbong thong đak, pơtho kon pơlei tơplih kơ sô̆.... Hlôi pơm đei tơdrong păr ang tih lơ̆m kon pơlei găh hơnăp jang đơ̆ng kơdih lơ̆m pơjing tơring tơrang ‘nao.”

Ưh khan lăp hơdrin jang đang ‘lơ̆ng tơring tơrang ‘nao lơ̆m sơnăm 2024, apŭng Di Linh oei tơlĕch ăn tơdrong hơgăt lơ̆m sơnăm 2025 gô bơ̆jang kiơ̆ dôm tơdrong hơgăt apŭng tơring tơrang ‘nao ‘lơ̆ng, hăm tŏ sĕt hloh 8 xăh jang đang tơring tơrang ‘nao ‘lơ̆ng păng 5 xăh jang đang tơring tơrang ‘nao ‘lơ̆ng rŏ. Kiơ̆ lơ̆m hơtŏk jơhngơ̆m pran tơgoăt tơgoăl hơdrĕch hơdrŭng, iŏk kon pơlei pơm khŭl jang tơm, păng jing tơ ‘ngla lơ̆m bơ̆jang kiơ̆ tơdrong jang pơjing tơring tơrrang ‘nao, lui ngeh akhan apŭng Di Linh gô jăh iŏk đei dôm tơdrong hơgăt hlôi tơlĕch ăn, tơgop pơjing groi kông Di Linh roi ‘năr roi pơ drŏng ‘lơ̆ng.