Pơgơ̆r lơ̆m 3 năr, đơ̆ng ‘năr 29/11 truh 1/12/2023 tơ̆ pơlei tơm Kon Tum, dêh char Kon Tum, Năr Joh ayŏ, Tơplŏng kơdâu păng Tơmang lăng dôm hơdrĕch kon kông tơring Tây Nguyên ‘măng mă I, sơnăm 2023 vă pôk pơ ư dôm kơjă kăp gĭt joha yŏ ‘lơ̆ng hơiă kơ dôm hơdrĕch kon kông tơring Tây Nguyên, hơdai hăm roi tơƀôh, pơtrŭt tơmang lăng. Năr lêh yua đơ̆ng Anih tơm vei lăng găh Joh ayŏ, Tơplŏng kơdâu păng Tơmang lăng jang hơdai hăm 1,2 Anih tơm, anih jang Trung ương păng 5 dêh char tơring Tây Nguyên, ‘noh đei: Kon Tum, Gia Lai, Dak Lak, Dak Nông păng Lâm Đồng pơgơ̆r. Vang akŏm năr lêh đei dang 1.000 ‘nu nghệ nhân, bơngai hơri hơsoang, bơngai pơlong păng bơngai tang măt dôm hơdrĕch kon kông tŏk bŏk arih sa lơ̆m tơring kơ 5 dêh char Tây Nguyên.

Iung pơma tơ̆ lêh pơgơ̆r blŭng păng pơgơ̆r năr lêh, tang măt Đảng, teh đak, Đại tướng Tô Lâm, bơngai jang lơ̆m Anih tơm Chĭnh trĭ, Kơdră Anih tơm vei lăng Kŏng an pơma hơdăh: Đảng păng teh đak bơ̆n ling lang bơngơ̆t truh hơtŏk tơiung tôm tơdrong păng kơjăp tơring Tây Nguyên. Iŏk đơ̆ng tơplih ‘nao truh dang ei hlôi tơlĕch ăn lơ tơdrong tơchơ̆t găh tơdrong ‘nâu. ‘Năr 6/10/2022 Anih tơm Chĭnh trĭ jăl XIII hlôi tơlĕch ăn tơdrong Tơchơ̆t kơsô̆ 23 găh hơtŏk tơiung mŭk drăm - tơpôl păng vei sơđơ̆ng tơring Tây Nguyên truh sơnăm 2030, lăng truh sơnăm 2045, lơ̆m noh băt hơdăh “Pơjing tơdrong joh ayŏ Tây Nguyên hơgei, ƀĕnh tơdrong hơiă joh ayŏ kon kông, drơ̆ng 1 nơ̆r lơ̆m lơ tơdrong, pơyom dôm kơjă kăp gĭt joh ayŏ pha ra băl đơ̆ng dôm hơdrĕch kon kông, lăng ‘nâu jĭ tơdrong ‘lơ̆ng ăn hơtŏk tơiung păng mơ̆t jang hơdai hăm apŭng plĕnh teh đơ̆ng tơring”:

“Hơnơ̆ng pơm hơdăh ‘lơ̆ng Tơdrong tơchơ̆t XIII đơ̆ng Đảng păng tơdrong jang hơtŏk tơiung joh ayŏ truh sơnăm 2030, Năr lêh joh ayŏ, tơplŏng kơdâu păng tơmang lăng dôm hơdrĕch kon kông tơring Tây Nguyên ‘măng mă I sơnăm 2023 gô tơpă jing hơnih akŏm, păr ang, jĭ ‘măng vă kon pơlei dôm hơdrĕch kon kông Tây Nguyên tơƀơ̆p, pơma dơnuh tơdrong hlôh vao, tơgop roi tơƀôh um rup, kon bơngai, tơdrong ‘lơ̆ng hơiă păng joh ayŏ dôm hơdrĕch kon kông ‘lơ̆ng rŏ kơ tơring teh Tây Nguyên truh hăm bôl buăl lơ̆m teh đak păng apŭng plĕnh teh, pơih să tơdrong hiôk sơng iŏk tơmơ̆t jên jang, sơng đei hơtŏk tơiung tơmang lăng tơring Tây Nguyên pơma atŭm, dêh char Kon Tum pơma hơdrô̆.”

Đơ̆ng rŏng kơ lêh pơih blŭng tôch kơ hơiă, tơdrong pơchơt hăm tơdrong hơri hơsoang đei hơnăn “Bri kông Tây Nguyên- akŏm lơ tơdrong ‘lơ̆ng hơiă” pơm ăn lơ tơdrong hơiă lơ̆m jơhngơ̆m đon kon pơlei păng tơmoi. Kŭm hăm dang 600 nghệ nhân, bơngai hơri hơsoang, bơngai pơlong dôm hơdrĕch kon kông 5 dêh char roi tơƀôh dôm tơdrong ‘lơ̆ng hơiă joh ayŏ ƀĕnh kơmâu ‘lơ̆ng rŏ Tây Nguyên, lơ̆m lêh pơih blŭng, ‘măng mă blŭng tơpôl đei lăng đe tôn hơgơ̆r “Jơva bri kông Tây Nguyên” yua đơ̆ng 500 ‘nu lĭnh Học viện Cảnh sát kon pơlei tôn păng ƀai hlôm klel đơ̆ng vă jê̆ 100 ‘nu lĭnh Khŭl pơm lêh Kŏng an Kon pơlei, Anih tơm pơgơ̆r Cảnh sát Cơ động. Đơ̆ng xăh Tà Nung, pơlei tơm Đà Lạt, dêh char Lâm Đồng truh tơ̆ dêh char Kon Tum vang akŏm năr lêh, nghệ nhân Ka The, bơngai K’Ho chhôk hơiă tơroi:  

 “Bơnê kơ khŭl pơgơ̆r hlôi pơm hơnih pơchơt âu. ‘Nâu jĭ hơnih akŏm đĭ đăng dôm tơdrong ‘lơ̆ng hơiă joh ayŏ kơ đĭ đăng hơdrĕch hơdrŭng ‘nhŏng oh lơ̆m tơring teh Tây Nguyên âu. ‘Nâu jĭ hơnih akŏm vă kơ tơƀơ̆p, vă kơ pơgơ̆r joh ayŏ vă băt dơ̆ng dôm tơdrong joăt, dôm tơdrong hơiă đơ̆ng rim hơdrĕch kon kông. Nhôn hơnhăk truh tơ̆ âu hơbăn ao hrŭk, dôm ƀai hơri brông kơ bơngai K’Ho, ƀlă kơ ‘noh dôm tơmam sa vă kơ nhôn tơƀơ̆p hơdai hăm đe buăl....”

Năr joh ayŏ, tơplŏng kơdâu păng tơmang lăng dôm hơdrĕch kon kông tơring Tây Nguyên ‘măng mă 1, sơnăm 2023 đei pơgơ̆r tơ̆ dêh char Kon Tum pơgơ̆r hăm lơ tơdrong jang hơiă. Lơ̆m noh tơdrong joh ayŏ joăt joe ‘noh đei 6 tơdrong: pơm tơƀôh tơdrong et soi joăt joe kơ dôm hơdrĕch kon kông; pơdă tơƀôh tơmam joăt joe kơ dôm tơring; pơdă tơƀôh tơmam sa joăt joe; pơ gơ̆r joh ayŏ kơdŏ soang tơpôl păng hrŭk pơrŏ hơbăn ao tanh dôm hơdrĕch kon kông tơring Tây Nguyên; pơdă joh ayŏ kon kông tơring Tây Nguyên lơ̆m tơpôl joh ayŏ dôm hơdrĕch hơdrŭng Việt Nam; pơdă um rup ‘lơ̆ng rŏ dôm hơdrĕch kon kông tơring Tây Nguyên yak hơdai hăm tơdrong hơtŏk tơiung kơ teh đak. Tơdrong tơplŏng kơdâu đei 5 môn pơlong ‘noh: Tŭn ‘long, pơdŭng băl, prăh hră, tŏk hao jrăng pik rơmă păng tơplŏng ƀao ƀô̆. Tơdrong jang tơmang lăng roi tơƀôh truh hăm kon pơlei păng tơmoi lơ hơnih ‘lơ̆ng rŏ kơ dêh char Kon Tum.

‘Ngoăih kơ tơdrong pơm tơiung hơnih tơgoăt joh ayŏ, roi tơƀôh truh tơpôl găh joh ayŏ joăt joe kơ kon pơlei dôm hơdrĕch kon kông Tây Nguyên, Năr joh ayŏ, tơplŏng kơdâu păng tơmang lăng dôm hơdrĕch kon kông tơring Tây Nguyên ‘măng mă I oei jing tơdrong hiôk gĭt kăl ăn tơdrong tơmang lăng  Tây Nguyên pơma atŭm păng dêh char Kon Tum pơma hơdrô̆ “păr tŏk’. Lơ̆m tơpă yan âu, hrei ‘nâu, dôm dêh char Tây Nguyên tă kơ hlôi pơjing dôm hơnih, tơmam, pơvih pơvăn tơmang lăng ngăl bơih, đei tơdrong tơgoăt đơ̆ng dôm hơnih truh tôch kơ hơiă. Kiơ̆ đơ̆ng pơyan lêh, mĭnh ‘măng dơ̆ng dôm kơmâu ‘lơ̆ng rŏ Tây Nguyên đei lơ lap bôl buăl jê̆ hơtăih băt truh, pơm dơ̆ng dôm tơdrong hiôk ‘nao ăn tơmang lăng tơ̆ tơring teh Tây Nguyên hơtŏk tơiung.