Tŏk bŏk dôm pơgar cheh phe jing ƀlĭk ƀlăk, hnam kơ jung đe ƀok Nông Văn Minh, oei tơ̆ plei Quảng Hòa, thôn Tam Điền, xăh Ea Tam, apŭng Krông Năng ‘lơ̆ng yua đơ̆ng kơmâu ƀrê đơ̆ng pơ bŭng hnam. Ƀok chhôk hơiă tơroi: hnam ‘nâu ‘nao đei pơm hơmet ming dơ̆ng đĭ 2,3 hrĕng triệu hlak jên. Rim lăm lơ̆m hnam đei pơm kiơ̆ tơdrong joăt kră sơ̆ kơ bơngai Nùng ngăl. Ŭnh hnam ƀok đơ̆ng Cao Bằng năm mơ̆t tơ̆ Dak Lak oei sa đơ̆ng sơnăm 1987. Tơ̆ tơring pơlei pơla ‘nao, tŏ ‘mi kial, teh lăp hăm lơ kơloăi ‘long pơtăm, hơdrin mơmat jang sa kơna mŭk drăm roi ‘năr roi đei ƀôh: Mơ̆t năm truh tơ̆ âu jang sa kŭm đei ƀôh ƀiơ̆ tơ̆ pơlei, ĭnh kŭm pơtăm đei ‘long đunh sơnăm. Ƀôh ŭnh hnam păng pơđĭ kueng ƀôt ‘nâu kŭm pơdrŏng đei ƀôh lơ ƀiơ̆. Kơdih kâu ĭnh kŭm vei răk tơdrong joăt oei sa kơ bơngai Nùng An, ăn kon sâu ‘noh athei yơ̆l môk dăh mă hrŭk hơbăn ao kră sơ̆. Oei tơ̆ hnam kơ jung âu ‘noh rơhơi, rơngơp ƀiơ̆, tơdrong joăt oei sa nhôn ‘noh ưh kơ hŭt ôh. Kŭm ‘meh dôm jơhnơr đơ̆ng rŏng âu kŭm vei đei dôm tơdrong ‘noh.

Hơtăih kơ hnam ƀok Minh 2,3 hlak mir cheh phe ‘noh hnam 2 tơ̆ng tôch kơ ‘lơ̆ng kơ ‘nhŏng Hoàng Đình Tân, Bí thư chi bộ thôn Tam Điền. Sư tơbăt: ŭnh hnam đei 1 pôm hnam kơ jung kră sơ̆ ‘nao pơm hơmet ming lê̆ kơ mĕ ƀă oei, oei sư man dơ̆ng 1 pôm hnam vă jê̆ 2 ti hlak jên vă oei hơdrô̆.

Kiơ̆ kơ ‘nhŏng Tân, plei Quảng Hòa hrei ‘nâu đei vă jê̆ 60 ŭnh hnam ‘noh đei hloh 50 tŏ hnam kơ jung kră sơ̆. Ŭnh hnam hơ yơ kŭm đei 2,3 hek tar teh, pơtăm cheh phe păng lơ kơ loăi ‘long đei kăp gĭt nhen sầu riêng, mắc ca, ƀơ. Mŭk drăm hơtŏk tơiung, tơdrong arih sa hiôk jơnap, kon pơlei hơdrin vang tơgop pơ jing tơring tơrang ‘nao. Mă kăl ‘noh, mă đơ̆ng hơtăih kơ pơlei đĭ đunh bơih ră mă lei kon pơlei oei chĕp vei tơdrong joh ayŏ kră sơ̆ kơ bơngai Nùng: Oei vei đei tơdrong hơiă joh ayŏ hơdrĕch hơdrŭng lơ̆m tơdrong et pơkong đang kơ ‘noh tơdrong pơdong ƀŭ bơngai hiong. Tơdrong joh ayŏ kơ sŏ soang ‘noh oei đei tơdrong hơiă, nhen lày cỏ ‘nâu, đang kơ ‘noh ƀĕng chư̆ng, ƀĕng gai. Dang ei dôm khŭl mơ lôh , đang kơ ‘noh đe kon sâu ‘noh pơma atŭm kŭm gơh pơma nơ̆r kon kông nhôn. Lơ̆m kueng ƀôt ‘noh kŭm vei răk lơ hnam kơ jung, pơđĭ lơ̆m thôn dang ei lăp đei 2 tŏ hnam man đĕch, uơ oei dơ̆ng ‘noh đĭ đăng tă kơ hnam kơ jung ngăl.

Yă La Bế Thủy Trang, Phŏ kơdră Anih vei lăng kon pơlei xăh Ea Tam, tơbăt, lơ̆m xăh dang ei đei 19 hơdrĕch hơdrŭng vang arih sa, lơ̆m noh bơngai Tày – Nùng đei vă jê̆ 90%. Khei ‘năr âu ki, xăh ling lang lăng kăl hơtŏk tơiung mŭk drăm - tơpôl yak hơdai hăm vei răk, tơƀăk mong tơdrong oei sa ‘lơ̆ng hơiă kơ dôm hơdrĕch hơdrŭng. Mă loi ‘noh, plei Quảng Hòa oei chĕp vei dôm hnam kơ jung, tơdrong jang tanh brai chàm kơ bơngai Nùng păng tŏk bŏk tơ iung ming joh ayŏ hơri hèo phườn, oei krao ‘noh hơri pơyong. ‘Nâu jĭ tơdrong joh ayŏ kră sơ̆ ‘lơ̆ng hơiă, pơm tơdrong hơiă vă tơring yak truh hơtŏk tơiung tơmang lăng tơpôl: ‘Ngoăih kơ tơdrong vei răk păng tơƀăk mong joh ayŏ kon kông ‘noh kon pơlei oei lơ̆m plei Quảng Hòa ‘noh kŭm vang hơdai băl hơdrin hơtŏk tơiung mŭk drăm, sut pơngot tơjur dơnuh hin. Vă đĭ đăng ‘noh lơ̆m plei Quảng Hòa ‘noh kon pơlei hnam oei ‘lơ̆ng, sơđơ̆ng ngăl bơih, đei lơ ŭnh hnam ‘noh kŭm đei mŭk drăm hơtŏk tơiung tôch kơ ‘lơ̆ng, ŭnh hnam dơnuh hin ‘noh pă tŏ sĕt bơih.

Dôm hnam kơ jung tơ hngơl tơhngônh tŏk bŏk pơgar cheh phe jing lơ̆ng tơ̆ plei  Quảng Hòa, xăh Ea Tam, apŭng Krông Năng, dêh char Dak Lak. Đơ̆ng rŏng hloh 35 sơnăm ưh kơ sơđơ̆ng, dôm hnam ‘noh oei nhen đêl so, đei bơngai Nùng lăng ‘noh “ tơmam gĭt” hơnơ̆ng vei răk păng hơtŏk tơiung tơ̆ pơlei pơla hle.