‘Nâu jĭ anih jang dang apŭng mă blŭng kơ dêh char Dak Lak đei chih tơbăt jang đang tơdrong pơjing tơring tơrang ‘nao đơ̆ng 2016- 2020. Plt Buôn Ma Thuột đei 21 anih jang vei lăng, hăm 8 xăh păng 13 phương, kơsô̆ kon pơlei hlŏh 380.000 ‘nu, đei 40 hơdrĕch hơdrung arih xa hơdai. Mưh tơlĕch tơdrong jang pơjing tơring tơrang ‘nao, anih jang tŏk tơ̆ dôm xăh kơđeh ngăl. Mă lei, hăm tơdrong pơvei mât 1 ƀơ̆r đon, adrin yak hlŏh rim tơdrong mơmat tat, pơlong nol, đon adrin đơ̆ng Đảng ƀô̆, khul kơdră pơgơ̆r păng kon pơlei plt Buôn Ma Thuột hlôi jang đei ‘lơ̆ng lơ̆m rim tơdrong.

Sơnăm 2018, plt đei 8/8 xăh đei Kơdră vei lăng kon pơlei dêh char Dak Lak tơchơ̆t jang kĕh tơdrong pơjing tơring tơrang ‘nao, hrôih ƀiơ̆ 2 sơnăm pơtêng hăm tơdrong hơgăt đei tơlĕch. Hlŏh 10 sơnăm bơ̆ jang pơjing tơring tơrang ‘nao, plt Buôn Ma Thuột đei lơ tơdrong tơplih ‘nao ‘lơ̆ng, anih jang, trong nơnăm tơ̆ plt lăp hăm tơdrong hơgăt tơring tơrang ‘nao ngăl, plt Buôn Ma Thuột kŭm jing tơring năm hơdrol kơ dêh char găh atŏk tơiung HTX, grŭp jang hơdoi păng atŏk tơiung dôm tơmam OCOP. Plt Buôn Ma Thuột adrin truh sơnăm 2025, 8/8 xăh jang đei tơdrong hơgăt Tơring tơrang ‘nao ‘lơ̆ng rŏ.