Jang kiơ̆ trong jang pơjing pơjing pơgar ‘lơ̆ng, ƀok Trần Anh Lang, oei tơ̆ plei Mỹ Sơn, xăh Duy Phú, apŭng Duy Xuyên, dêh char Quảng Nam iung jang hơdrol hơmet pơ ‘lơ̆ng hơnih pơgar kơ ŭnh hnam, să vă jê̆ 2 héc ta vă pơtăm dôm kơ loăi ‘long sa plei kơjă mŭk drăm nhen: krô̆i, kam, kuich, hơƀo... Ƀok Trần Anh Lang tơbăt, hơdrol sơ̆ hơnih pơgar âu găh lơ pơtăm dôm kơ loăi hrâu hrĕk, iŏk yua mŭk drăm tŏ sĕt. Đei khŭl kơdră tơring bơngơ̆t truh, ƀok Lang hlôi pơtơm hơmet ming pơgar ‘lơ̆ng.  Dang ei, pơgar đe ƀok Trần Anh Lang ‘long plei hơ krĭu hơ krau păng hơnhăk ăn iŏk yua lơ. Ƀok Trần Anh Lang oei pơtăm hơlam dôm kơ loăi ‘long kơ đeh năr nhen tơh, tơ yĕn, ‘nhot rơgoh, hơdai hăm rong ka đak ƀlăng vă hơtŏk dơ̆ng iŏk yua.

“Pơjing hơnih pơgar ‘lơ̆ng, mă mônh ăn iŏk yua mŭk drăm ŭnh hnam, hơdai hăm pơtho trong jang sa ăn dôm ŭnh hnam nai. Teh đak tơgŭm ăn kơ nhôn ƀơ̆t pơjing pơgar ‘lơ̆ng ‘noh 5 triệu hlak jên păng pơgar âu hlôi hơnhăk ăn iŏk yua mŭk drăm.”

Ưh khan lăp hơdrô̆ ŭnh hnam ƀok Trần Anh Lang, iŏk đơ̆ng jang kiơ̆ tơdrong jang hơnih kon pơlei oei sa tơring tơrang ‘nao ‘lơ̆ng rŏ, lơ ŭnh hnam kon pơlei tơ̆ xăh Duy Phú, apŭng Duy Xuyên, dêh char Quảng Nam hlôi tơplih trong tơchĕng, trong jang vă pơm đei dôm pơgar ‘long ‘lơ̆ng rơgoh, tơgop pơtrŭt pơm tơlĕch, hơtŏk tơiung mŭk drăm iŏk yua lơ. Yă Trần Thị Dương, Kơdră Anih vei lăng kon pơlei xăh Duy Phú, apŭng Duy Xuyên tơbăt: Truh dang ei lơ̆m xăh hlôi hơmet ‘lơ̆ng, pơjing 70 hơnih pơgar. Tơdrong jang pơgar ‘lơ̆ng đei pơm păng pơtăm ‘long kiơ̆ proh hơmet, ƀrư̆ ƀrư̆ hơnhăk ăn iŏk yua mŭk drăm, hơtŏk iŏk yua ăn kon pơlei jang chŭn mir. Kiơ̆ kơ yă Trần Thị Dương, truh dang ei kơ sô̆ ŭnh hnam dơnuh hin kơ xăh dang ei oei 4,88%, iŏk yua jô̆ păh lăp kơ̆l bơngai đei hloh 47 triệu hlak jên 1 sơnăm.

“Dôm tơdrong jang pơgar ‘lơ̆ng hlôi hơtŏk ‘lơ̆ng đon hlôh vao ăn kon pơlei, kiơ̆ đơ̆ng noh, dôm ŭnh hnam tơ jê̆ hŏk pơhrăm jang kiơ̆ pơm lăp đei teh đơ̆ng pơgar vă pơtăm dôm kơ loăi ‘long hơnhăk ăn iŏk yua, gĭt kăl hloh ‘noh jĭ pơm đei cham char hơrih hiôk ‘lơ̆ng. Khŭl kơdră tơring tơgŭm ‘long hơdrĕch, pơhrăm pơm tơlĕch khoa hŏk ki thuơ̆t ăn kon pơlei, kon pơlei lăp hơmet teh păng vei lăng đĕch.”

‘Ngoăih kơ tơgŭm 1 ŭnh hnam 5 triệu hlak jên tơlĕch jang tơdrong jang pơgar ‘lơ̆ng, apŭng Duy Xuyên, dêh char Quảng Nam tŭn pran tơdrong jang tơroi tơbăt, krao hơvơn kon pơlei hơtŏk ‘lơ̆ng đon hlôh vao vei lăng rơgoh cham char. Hơdai hăm ‘noh, pơtho tơƀôh, hơnhăk dôm hơdrĕch ‘long pơtăm ‘nao đei plei lơ lơ̆m pơm tơlĕch vă hơtŏk kơ jă tơmam đơ̆ng choh jang sa, hơtŏk tơring tơrang choh jang sa, tơring tơrang kiơ̆ trong tơmang lăng cham char bri brăh păng lăng vă kơ băt. Ƀok Đặng Hữu Phúc, Phŏ Kơdră Anih vei lăng kon pơlei apŭng Duy Xuyên, dêh char Quảng Nam tơbăt: Dôm sơnăm âu ki, anih jang găh choh jang sa păng khŭl kơdră tơring tơgŭm kon pơlei hloh 1 ti  hlak jên vă tơmơ̆t jên jang hơtŏk tơiung tơdrong jang pơgar ‘lơ̆ng. Kiơ̆ đơ̆ng noh, hlôi pơm tơplih đơ̆ng hlôh vao truh bơ̆jang đơ̆ng rim kon pơlei lơ̆m hơtŏk tơiung mŭk drăm pơgar, pơm hơnih ‘lơ̆ng tơring tơrang ƀĕnh tơdrong hơ rih.

“Găh iŏk yua hăm dôm pơgar ‘lơ̆ng, ‘ngoăih kơ pơm hơnih cham char lăng ‘lơ̆ng, rơgoh, ‘yâu, hơdai hăm tơgŭm kon pơlei iŏk yua đơ̆ng ‘long pơgar ‘noh, tơplih ‘lơ̆ng tơdrong arih sa mŭk drăm kơ ŭnh hnam. Đơ̆ng kon jên hơgăt kơ teh đak pơjing tơring tơrang ‘nao, lơ̆m noh đei tơgŭm 1,2 tơdrong jang ăn kơ dôm ŭnh hnam kon pơlei vă hơmet pơ ‘lơ̆ng pơgar hrâu hrĕk pơjing hơnih cham char ‘lơ̆ng, pơm tơdrong jang sa ăn kơ dôm ŭnh hnam kon pơlei. Jên âu hlôi hơtŏk iŏk yua hăm rim pơgar ‘lơ̆ng.”

Dang ei, dêh char Quảng Nam đei 170 hơnih kon pơlei oei tơring tơrang ‘nao ‘lơ̆ng rŏ hăm hloh 250 tơdrong jang pơgar ‘lơ̆ng. Tơ̆ dôm pơgar ‘lơ̆ng, kon pơlei iŏk yua khoa hŏk ki thuơ̆t ‘nao nhen pơlăp kơmăy tơruih đak kơ dih, dăh mă iŏk yua hơdrĕch ‘nao lơ̆m pơm tơlĕch vă iŏk đei mŭk drăm lơ. Jô̆ păh lăp, mĭnh pơgar âu ăn iŏk yua đơ̆ng 150 truh 200 triệu hlak jên 1 sơnăm. Ƀok Hồ Quang Bửu, Phŏ Kơdră Anih vei lăng kon pơlei dêh char Quảng Nam tơbăt; Tơdrong pơjing hơnih kon kon pơlei oei tơring tơrang ‘nao ‘lơ̆ng rŏ, pơjing pơgar ‘lơ̆ng yak blŭng hơnhăk ăn iŏk yua, pơm tơdrong ‘lơ̆ng vă yak truh tơdrong choh jang sa rơgoh, choh jang sa yua mơ̆r, ƀrư ƀrư̆ pơjing hơnih cham char bri ‘long kơjăp ‘lơ̆ng.