VOV4.Bahnar - Hăm dôm tơ drong jang Tơ̆k hơ dăh trong pơ lei pơ la, đoàn viên hơ druh tơ dăm tơ̆ Dak Lak tŏk bŏk tơ gop hơ tŏk ‘lơ̆ng đon băt kơ chăng lơ̆m tơ drong vang tơ gŭm ming man dôm trong pơ lei, kueng ƀôt “ Hơ dăh - jơk - rơ goh - ‘lơ̆ng”. ‘Nâu jĭ tơ drong jang hơ dăh ‘lơ̆ng đơ̆ng sơ năm mơ lôh vang hơ dai hăm tơ ring pơ jing tơ ring tơ rang ‘nao.

Hơ nơ̆ng đơ̆ng 6 jơ kơ sơ̆ rim năr, dôm kơ ƀŏng ŭnh kơ đeng điên đei pơ̆ih rŏk trong glung tih tơ̆ thôn 1 xăh Ea Tiêu, apŭng Cư Kuin, dêh char Dak Lak. Ƀok Lê Đắc Cừ, kon pơ lei arih tơ̆ trong âu tơ roi, iŏk đơ̆ng đei trong ŭnh điên tơ̆k hơ dăh, tơ drong sơ đơ̆ng lơ̆m tơ ring âu đei tơ plih ‘lơ̆ng, kon pơ lei kŭm chhôk hơ iă, gơ măng lĕch tơ̆ trong năm chă ngôi dăh mă năm pơ tâp hơ kâu jăn. Tơ drong ‘mêm băl dơ̆ng kueng ƀôt roi kơ jăp dơ̆ng.

Ŭnh điên tơ̆k hơ dăh trong pơ lei đei sơ năm mơ lôh apŭng Cư Kuin chô̆ tơ̆ thôn 1, xăh Ea Tiêu, apŭng Cư Kuin

 Hơ drol sơ̆ trong ‘nâu tam mă đei ŭnh điên ‘noh pơ ma atŭm ưh kơ gan sơ đơ̆ng, tơ tông klĕ lơ. Mă lei đơ̆ng đei ŭnh điên ‘noh kon pơ lei ƀôh hiôk. Trong ling lang nơ năm hiôk păng sơ đơ̆ng ‘lơ̆ng ƀiơ̆, rim bơ ngai tôch kơ chhôk ‘nă lơ̆m tơ drong chơt hiôk ‘noh đei ŭnh điên trong tơ̆k hơ dăh.

Trong jang trong ŭnh điên tơ̆k hơ dăh kơ jung hloh 1,2km, đei kơ jă 25 triệu hlak jên yua đơ̆ng Anih jang đoan apŭng Cư Kuin tơ gŭm jên răt tơ mam, đoàn viên xăh Ea Tiêu păng kon pơ lei tơ ring tơ gop năr jang chô̆ pơ lăp, đei tơ lĕch jang đơ̆ng khei 3 sơ năm ‘nâu. Ƀok Mai Văn Hùng, Bí thư chi bộ thôn 1, xăh Ea Tiêu tơ băt, lăp đơ̆ng ƀơ̆t ‘nao chô̆ trong ŭnh điên, kon pơ lei lơ̆m thôn hlôi chhôk hơ iă vang jang pơm rơ goh trong pơ lei, rông ƀôt, chong pơ ‘ngoăih râm rĕk vă trong jing rơ goh ‘lơ̆ng ƀiơ̆. Kŭm hăm ‘noh,  thôn kŭm ăn khŭl vei lăng vă răp hơ len, vei lăng trong ŭnh điên vă iŏk yua jơ nei, đunh đai.

Ƀơ̆t pơm trong ŭnh điên đang ‘noh ĭnh kŭm hôp kon pơ lei tơ̆ âu păng Khŭl vei lăng kơ dih tơ lĕch jang pơ jing grŭp vei lăng trong ŭnh điên, thu iŏk jên ŭnh điên vă vei sơ đơ̆ng hai. Hơ drô̆ tơ gop jên ŭnh điên ‘noh vă đĭ đăng kon pơ lei lăp đon tơ gŭm, vă khan ‘noh jĭ ƀơ̆t đei trong ŭnh điên ‘nao âu păng hơ dăh ưh khan hơ drô̆ hăm kueng ƀôt âu mă ăn pơ đĭ dôm bơ ngai đa năm vih vơ̆t tơ̆ âu.

Mĭnh ƀar tơ drong jang yua kơ ƀŏng ŭnh điên hle, ŭnh điên măt ‘năr vă chô̆

Kiơ̆ kơ mŏ Đặng Thị Vân, Bí thư Anih jang đoan apŭng Cư Kuin, dôm tơ drong jang hơ druh tơ dăm “ Tơ̆k hơ dăh trong pơ lei” đei pơ gơ̆r khŭl tơ lĕch jang đơ̆ng sơ năm 2017 tơ̆ lơ trong tơ̆ dôm pơ lei pơ la lơ̆m apŭng. Ưh khan lăp gơ nang lơ̆m jên đơ̆ng anih đoan kơ pal asong ăn, lơ anih jang đoan tơ ring hlôi hơ drin krao hơ vơn dôm jên tơ pôl vă tơ lĕch jang. Gơ nang đơ̆ng noh, lơ̆m dôm sơ năm âu ki, dôm jĭt kilomet trong tơ̆ dôm thôn, pơ lei hlôi đei tơ̆k hơ dăh, pơm tơ drong hiôk ăn kon pơ lei năm vih vơ̆t tơ̆ gơ măng. Hơ dai hăm tơ gop pơm dă ƀiơ̆ kơ gre tơ̆m pơ̆k preh băl, vei sơ đơ̆ng tơ̆ tơ ring.

Hơ nơ̆ng đơ̆ng sơ năm 2017 truh dang ei, tơ drong jang tơ̆k hơ dăh trong pơ lei âu ‘noh vă tơ gŭm ăn kon pơ lei hiôk lơ̆m tơ drong vang chă nơ năm tơ̆ trong lơ̆m gơ măng. Kŭm nhen lĕ ‘nâu jing 1 tơ drong jang sơ kơ̆t hơ dăh đei tơ drong ‘lơ̆ng hơ iă đơ̆ng đoàn viên, hơ druh tơ dăm lơ̆m tơ drong vang pơ jing tơ ring tơ rang ‘nao.

Tơ drong jang ŭnh điên tơ̆k hơ dăh hlôi tơ gop pơm tơ plih um ai trong nơ năm, pơ yua ăn ‘meh vă năm vih vơ̆t đơ̆ng kon pơ lei roi ‘năr roi ‘lơ̆ng hloh

Đơ̆ng sơ năm 2014, tơ drong jang tơ̆k hơ dăh trong pơ lei pơ la hlôi đei sơ năm mơ lôh Dak Lak jang hơ dai hăm anih jang ŭnh điên bơ̆ jang kiơ̆ tơ̆ lơ tơ ring lơ̆m dêh char. Lơ̆m noh yak truh dôm pơ lei pơ la tơ ring hơ tăih hơ tŏ, tơ ring mơ mat tat, tơ ring sơ lam. Dôm sơ năm tơ jê̆ âu, kŭm hăm yua dôm kơ loăi kơ ƀŏng ŭnh kơ đeng joăt joe chô̆ kơ tă lơ̆m trong tơ ley ŭnh điên kơ kon pơ lei, tơ̆ 1,2 tơ drong jang, đoàn viên hơ druh tơ dăm hlôi yua dôm kơ loăi kơ ƀŏng ŭnh điên hle, kơ ƀŏng ŭnh kơ đeng hơ yuh măt ‘năr vă pơ lăp, vei sơ đơ̆ng ‘lơ̆ng, ‘mơ ‘met. Tơ drong jang hlôi tơ gop pơm tơ plih um ai trong nơ năm, pơ yua ăn ‘meh vă năm vih vơ̆t đơ̆ng kon pơ lei roi ‘năr roi ‘lơ̆ng hloh.

H’Xíu H’Mốc: Chih

Thuem: Tơ blơ̆