Mĭnh lơ̆m dôm tơdrong jang ‘lơ̆ng lơ̆m tơdrong jang “Hơdruh tơdăm vang tơgŭm pơjing tơring tơrang ‘nao” đơ̆ng hơdruh tơdăm Gia Lai tơlĕch jang sơnăm 2023 ‘noh jĭ tơdrong jang trong hơdruh tơdăm  “Hơdăh - Jơk - Rơgoh - ‘Lơ̆ng” tơ̆ plei Thơh Ga B, xăh Chư Don, apŭng Chư Pưh. Trong kơjung vă jê̆ 1 km đei chô̆ 20 tŏ kơ ƀŏng ŭnh kơ đeng măt ‘năr păng pơtăm 200 tơnơm ‘long hăm akŏp kơjă hloh 60 triệu hlak jên. Trong hơdruh tơdăm “Hơdăh -Jơk - Rơgoh - ‘Lơ̆ng” đei tơmơ̆t yua hlôi tơgop lơ̆m tơplih um ai tơring tơrang păng vei sơđơ̆ng tơpôl, sơđơ̆ng trong nơnăm tơ̆ plei Thơh Ga B. ‘Nhŏng Lê Quốc Việt – Bí thư Đoàn xăh Chư Don, apŭng Chư Pưh tơbăt:

“Jang kiơ̆ tơdrong jang sơnăm mơlôh pơjing tơring tơrang ‘nao tơ̆ plei Thơh Ga B, Đoàn xăh krao hơvơn đoàn viên hơdruh tơdăm jang kiơ̆ dôm tơdrong jang nhen pơtăm ‘long jih trong, chô̆ ŭnh kơ đeng măt ‘năr, pơtăm ‘long lơ̆m dôm dur pơgar ‘nao vă pơjing dôm dur pơgar jơk. Krao hơvơn kon pơlei chong hơmet ‘nhĕt trong tơ̆ hơnăp hnam kơdih vă pơm hơnih jơk rơgoh ‘lơ̆ng. Tơ̆ hơnăp kơnh đoàn xăh hơnơ̆ng krao hơvơn kon pơlei păng đoàn viên hơdruh tơdăm pơkăp pơm kiơ̆ dôm tơdrong vă pơvei trong hơdruh tơdăm hơdăh, jơk, rơgoh ‘lơ̆ng”.

Sơnăm 2023, hăm hơnăn “Sơnăm tơplih kơ sô̆ dôm tơdrong jang đơ̆ng Đoàn”, dôm anih jang đoàn lơ̆m dêh char Gia Lai hlôi tŭn pran tơroi tơbăt, tơgŭm kon pơlei vang tơplih kơ sô̆ hăm lơ trong jang hơdăh ‘lơ̆ng nhen: Tơƀôh muh măt păng roi tơƀôh mã QR găh pơjing tơdrong jang sa, tơdrong jang; tơlĕch jang dôm tơdrong jang kơsô̆ hơnăn teh, tơring, thư viện kơ sô̆ păng dôm tơdrong kueng kơ phô̆ điện tử, hơnih kơchơ ưh kơ yua jên măt.... Hrei ‘nâu, lơ̆m dêh char đei 1.233 grŭp tơplih kơ sô̆ tơpôl yua đơ̆ng kang ƀô̆ đoàn pơm tơm. Tơplih kơsô̆ dôm tơdrong jang đơ̆ng Đoàn hlôi tơgop pơm hơdăh tơdrong bơ̆jang kiơ̆ dôm hơnăp jang kiơ̆ Tơchơ̆t kơsô̆ 924 đơ̆ng Thủ tướng Teh đak găh “Kĭ ăn tơdrong jang tơplih kơsô̆ lơ̆m pơjing tơring tơrang ‘nao, yak truh tơring tơrang ‘nao hơgei jăl jang 2021 – 2025”. Mŏ Nguyễn Hoài Phương – Bí thư anih jang đoàn apŭng Chư Păh tơbăt:

"Vă bơ̆jang kiơ̆ tơdrong jang sơnăm 2023, tơdrong tơplih kơ sô̆ dôm hơnăn tơring kŭm hơnhăk ăn dôm tơdrong tôch kơ ‘lơ̆ng ăn kơ kon pơlei lơ̆m apŭng. Đe buăl đoàn viên, hơdruh tơdăm, hơioh lơ̆m kơplăh năm ngôi tơ̆ dôm hơnih ‘lơ̆ng tôch kơ ƀônh chă hơlen lăng păng băt hơdăh dôm tơdrong kơtơ̆ng ang tơ̆ hơnih ‘noh păng kŭm đei tơdrong drơ̆ng lăp tơgŭm đơ̆ng kon pơlei kŭm nhen đe buăl đoàn viên hơdruh tơdăm lơ̆m apŭng.”

Bơ̆jang kiơ̆ dôm tơdrong jang vă tơgŭm, tơgop pơjing tơring tơrang ‘nao, lơ̆m sơnăm 2023, Đoàn hơdruh tơdăm dêh char Gia Lai hlôi tơlĕch jang pơjing 3 tơdrong jang hơdruh tơdăm kơ dêh char, 74 tơdrong jang kơ apŭng, 615 tơdrong jang kơ tơring păng 653 tơdrong jang hơdruh tơdăm vang jang “Pơjing cham char hơdăh - jơk - rơgoh - ‘lơ̆ng, sơđơ̆ng”; hơdai hăm pơm păng hơmet ming 17 tŏ trong tơ̆k hơdăh trong pơlei; pơtăm ‘nao hloh 996 rơbâu tơm ‘long....… ‘Nhŏng Đỗ Đức Thanh – Phŏ Bí thư Anih jang đoàn dêh char Gia Lai hơlen lăng, tơdrong vang tơgŭm đơ̆ng hơdruh tơdăm Gia Lai hlôi tơgop kŭm hăm dôm tơring bơ̆jang kiơ̆ tơdrong jang pơjing tơring tơrang ‘nao iŏk đei jơnei ‘lơ̆ng:

 “Jăl jang 2021 – 2025 nhôn hơnơ̆ng tơmơ̆t yua tơplih kơsô̆ păng dôm tơdrong hơgei khoa hŏk ki thuơ̆t lơ̆m vang jang pơjing tơring tơrang ‘nao. Hơdai hăm ‘noh, tơdrong jang hơdai hăm rim kơdră rim anih jang vă pơm đei dôm tơdrong jang tơgŭm, dôm kon jên, tơmam vă tơgŭm đe buăl đoàn viên, hơdruh tơdăm ‘noh jĭ tơdrong mă anih jang tôch kơ bơngơ̆t truh. ‘Ngoăih kơ ‘noh bơ̆jang kiơ̆ trong jang đơ̆ng trung ương Đoàn nhôn yak truh pơjing pơlei pơla kăl kơ hơrih. Yak truh pơjing 3 tơdrong jang păng lơ̆m sơnăm 2024 nhôn pơjing tơ̆ xăh An Trung, apŭng Kông Chro. Kiơ̆ tơdrong pơgơ̆r đơ̆ng kơdră đảng, nhôn hơnơ̆ng tơgŭm ăn dôm tơring, akŏm jên tơmam tơgŭm dôm tơring jang đang tơring tơrang ‘nao”.