VOV4.Bahnar - Lơ̆m khei ‘năr âu ki mă loi ‘noh jĭ lơ̆m năr lêh 30/4 păng 1/5 ‘nao âu, tơ drong jang tơ mang lăng joh ayŏ kơ sŏ soang kơ dôm hơ drĕch kon kông kơ tă anih tôch kơ hơ iă hlôi sơng đei lơ tơ moi tơ mang lăng. Tơ̆ Dak Lak, tơ drong jang âu tŏk bŏk tơ ƀôh trong năm đei iŏk yua ăn tơ pôl kon kông jang tơ mang lăng kơ tă tơ̆ pơ lei.

Dôm tơ drong jang joh ayŏ kơ dŏ soang kơ dôm hơ drĕch kon kông kơ tă anih tơ̆ pơ lei tơm Buôn Ma Thuột năr pơ dơh lêh sơ năm ‘nâu ‘noh đei: tơ drong reh tĭng nĭng, tôn chĭng chêng, tanh brai vai khăn, hơ ri hơ soang hơ drĕch kon kông Tây Nguyên, et tơ drô ge, sa tơ mam joăt joe păng dôm tơ drong lêh kră sơ̆ kơ bơ ngai Ê Đê. ‘Nhŏng Lê Ngọc Tân, tơ moi truh đơ̆ng pơ lei tơm Hà Nội, vang pơm lêh hmach pran jăng grăng hơ kâu joăt joe kơ bơ ngai Ê Đê tơ̆ plei Tơng Jú, xăh Ea Kao, tơ roi:

 ‘Măng mă blŭng ĭnh vang pơm lêh hmach pran jăng grăng hơ kâu ƀôh tôch kơ chơt păng kŭm đei ƀôh Têt kon kông tơ̆ âu tôch kơ pơ ‘lơ̆ng. Đei lơ tơ drong hlĭch đơ̆ng hơ băn ao hrŭk kơ kon pơ lei kon kông tơ̆ âu, đơ̆ng bơ ngai drŏ nglo dăh mă drŏ kăn, dăh mă bơ̆n chĭng chêng, tơ mam tôn reh đei ming pơ dă ‘lơ̆ng, đei dôm anih tôch kơ pha hăm tơ̆ anih tơm Hà Nội dăh mă hơ drĕch Yuăn ‘noh. Đei lơ tơ drong ‘măng mă blŭng, mă lei kŭm ‘meh ‘noh jĭ đei lơ ‘măng gơh năm tơ̆ âu dơ̆ng vă vang pơm lêh kơ kon pơ lei kon kông hrôih ƀiơ̆ păng đei vang pơm lêh âu gơh tôm ƀiơ̆.

Hơ soang păng tôn chĭng chêng

Yă H Yam Buôn Krông, kơ dră grŭp tơ mang lăng tơ pôl plei Tơng Jú, xăh Ea Kao tơ băt, kŭm hăm pơm tơ ƀôh dơ̆ng lêh hmach pran jăng grăng hơ kâu joăt joe, lơ̆m năr pơ dơh lêh sơ năm ‘nâu, tơ̆ anih tơ mang lăng t pôl plei Tơng Jú oei pơ gơ̆r tơ drong pơ long pai pơm tơ mam sa ‘măn ăn đe dro kăn xăh Ea Kao vang pơ long. Đe mŏ oh tơ̆ rim pơ lei pơ jing 1 khŭl pơ long, hơ met ăn bơ̆n por hăm tơ mam sa joăt joe kơ hơ drĕch nhôn. Kŭm hăm tang măt khŭl drŏ kăn, đe tơ moi năm tơ mang lăng tơ̆ anih tơ mang lăng gô sa păng châm điêm tơ mam sa đơ̆ng dôm khŭl. ‘Nâu jĭ tơ drong jang vă hơ tŏk tơ iung tơ mang lăng tơ pôl tơ̆ tơ ring.

 Kŭm đei lơ khŭl tơ moi đơ̆ng dôm dêh char kŭm vih tơ̆ âu đe sư sa dôm tơ mam sa kơ kon pơ lei kon kông đang kơ ‘noh lăng đe tôn chĭng chêng, đang kơ ‘noh đe sư tơ chă hơ len lăng găh tơ drong joh ayŏ kơ dŏ soang kơ hơ drĕch kon kông tơ̆ âu. Nhôn kŭm klăih song ăn 1 ‘nu 1 tơ drong jang, pơ tih gia hnam pơ tăm ‘nhot, hnam rong nhŭng, hnam rong iĕr, đang kơ ‘noh hnam pai tơ drô ge.

Et tơ drô ge

Tơ̆ 1,2 anih nai nhen tơ̆ Anih ‘măn răk tơ mam drăm so Dak Lak, plei Ako Dhông, tơ moi đei chă hơ len lăng tơ drong jang tanh bơ̆n kơ đum kơ đŏng, pơm tơ mam tôn reh đơ̆ng pơ le, ‘lao păng et tơ drô ge kơ bơ ngai Ê Đê. ‘Nhŏng Hảng A Chu, bơ ngai H’mông, tơ̆ apŭng Đắk Glong, dêh char Dak Nông, vang et tơ drô ge so kơ hrĕng sơ năm tơ băt:

Tơ drong joăt đơ̆ng kon pơ lei tơ̆ âu pha hăm hơ drĕch nhôn păng ĭnh kŭm sa roi băt dơ̆ng găh lơ tơ drong. Mă hơ dăh ‘noh găh tơ drô ge, sư pha hăm hơ drĕch nhôn, dăh mă nhen tơ mam sa ‘noh kŭm pha hloi, sư pha ngăl. Đei dôm tơ mam mă ĭnh năm tơ̆ âu ‘noh kŭm apĭnh đei lơ, tôch kơ lơ tơ drong.

Tanh bơ̆n reo kơ đum kơ đŏng păng pơm tơ mam tôn reh

Đơ̆ng rŏng 1 khei ‘năr đunh đei ƀơm ưh kơ ‘lơ̆ng đơ̆ng jĭ Covid-19, dôm anih tơ mang lăng tơ pôl tơ̆ pơ lei tơm Buôn Ma Thuột hlôi pơ̆ih ‘măng hơ lơ̆k dơ̆ng hăm lơ tơ drong jang hơ iă. Lơ̆m noh, tơ mang lăng joh ayŏ kơ dôm hơ drĕch kon kông kơ tă anih ling lang jing tơ drong ‘lơ̆ng hơ iă hơ drô̆ kơ pơ lei tơm, đei pơm ‘nao, jang ‘lơ̆ng dơ̆ng đơ̆ng rŏng rim sơ năm, vă mưh ‘măng truh tơ̆ âu, tơ mam  đei dơ̆ng tơ drong lăng hơ iă. Păng kon pơ lei chhôk ‘nă tơ klep hăm dôm tơ drong joh ayŏ kơ dŏ soang kon kông kơ dih tơ ƀôh hăm tơ moi tơ mang lăng tơ drong ‘lơ̆ng pơ lei pơ la.

H’Xíu H’Mốc: Chih

Thuem: Tơ blơ̆