Pơlei Krong Hra, tơring Yang ƀăk ‘noh mĭnh lơ̆m dôm pơlei dơnuh kơ apŭng Đak Pơ. Kon pơlei Bahnar bơ̆n tơ̆ ou găh lơ choh jang mir na ƀa hơƀo, jang jang sa iŏk đei ưh kơ gan lơ. Mă lei, đơ̆ng sơnăm 2018, đei kơdră tơring păng rim đảng viên lơ̆m pơlei chă pơtho khan, lơ ŭnh hnam hlôi tơplih pơtăm kơtao ăn mir să. Lăp đơ̆ng rŏng 6 sơnăm, tơdrong hơrih sa kơ kon pơlei hlôi tơplih. ‘Nhŏng Đinh Phới, mĭnh ‘nu kon pơlei choh jang sa oei lơ̆m pơlei Krong Hra tơbăt:"Teh roi năr roi sap kơna kon pơlei đei kơdră tơring chă pơtho ăn pơtăm kơtao vă đei iŏk yua kơjăp. Kon pơlei Bahnar bơ̆n oei tơ̆ ou hrei ‘nou bu bu jei đei mir kơtao, chă koh tĕch mĭnh ƀar sơnăm ‘noh mă pơtăm ming dơ̆ng, jang sa iŏk yua sơđơ̆ng hloyh. Vă teh jing ‘lơ̆ng dơ̆ng kon pơlei jei hŏk pơhrăm kiơ̆ đei găh trong vei lăng, prôi phŏng tuh mơ̆r, mĭnh ƀar hektar kơtao jei koh tĕch đei mĭnh ƀar hrĕng triu hlak jên. Ŭnh hnam bơ̆n jei pơtăm kơtao bơih păng hrei ou jang sa jei hlôi iŏk đei mĭnh ƀar hrĕng triu bơih."

Dôm năr blŭng vang iung jang pơtăm kơtao, ‘nhŏng Phơ̆i atŭm hăm kon pơlei lơ̆m pơlei Krong Hra jei tôch hlêng hlang kơ đon, ưh tim mă băt trong chă jang sa lơ liơ. Mă lei đei đảng viên lơ̆m pơlei chă pơtho ăn, roi năr kon pơlei jei hlôi hlôh vao, vei lăng năng tông kơtao roi nar roi jing ‘lơ̆ng hloh dơ̆ng. Mŏ Đinh Thị Mại, Bơngai chĕp kơ̆l Khul drŏ kăn pơlei Krong Hra tơbăt:"Ba đei pơjao vei lăng năng tông ŭnh hnam dơnuh vă tơgŭm djru kon pơlei yak hloh dơnuh, chă pơjao iung jang rim trong pơkăp vă vang tơ iung pơjing tơring tơrang ‘nao. Ba chă pơrô̆ pơtho khan ăn kon pơlei vei lăng năng tông ‘long pơtăm, kon tơrong mă ƀlep, chă pơrô̆ hơvơn pơmai oh vei lăng năng tông cham char rơgoh ‘lơ̆ng, rim năr chă hyum hơpuih hnam, cham mă rơgoh vă pơlei rơgoh ‘lơ̆ng."

‘Ngoăih kơ ‘noh, hăm trong “kang ƀô̆ đảng viên pơm jŭk yŭk trong hơlou, kon pơlei kơdou kiơ̆ đơ̆ng rŏng", Chi ƀô̆ pơlei Krong Hra jei jing hơnih iung jang hơdrol găh tơdrong hop akŏm ‘lơ̆ng tơ̆ tơring. Ƀok Đinh Văn Việt, Kơ iĕng Kơdră chĕp pơgơ̆r Chi ƀô̆ pơlei Krong Hra tơbăt:"Chi ƀô̆ jang ‘lơ̆ng keh đang tơdrong jang chinh trĭ, hop akŏm ‘lơ̆ng; jang kiơ̆ tơgoăt tơgoăl pôm nơ̆r ƀơ̆r đon păng đei khul kang ƀô̆, đảng viên ‘lơ̆ng. Hơnơ̆ng kiơ̆ yok rok jơ̆ng hơnăp jang pơrô̆ pơrôp kon pơlei iung jang kiơ̆ ‘lơ̆ng rim Tơdrong tơchơ̆t, Nơ̆r athei jang kiơ, Tơdrong tơchơ̆t đơ̆ng Đảng tơmơ̆t lơ̆m tơdrong hơrih sa vă atŏk tơ iung mŭk drăm adoi nhen tơ iung pơjing tơring tơrang ‘nao."

Hrei ou, Đang ƀô̆ tơring Yang Ƀăk đei 13 chi ƀô̆ hăm 205 đang viên, lơ̆m ou đei chi ƀô̆ thôn pơlei. Gơnơm jang ‘lơ̆ng bơ̆ jang chă pơrô̆ hơvơn, pơtho khan păng “nơ̆r pơma tơ-‘ngla jang hloi” đơ̆ng khul kang ƀô̆, đang viên, bơngai đei kon pơlei lui yom, dôm sơnăm tơjê̆ ou, kon pơlei rim pơlei hlôi băt jang kiơ̆ khoa hok lơ̆m choh jang sa, tơplih ‘long pơtăm trŏ lăp hơnhăk đei iŏk yua lơ. Hơtuch sơnăm 2023, ŭnh hnam dơnuh tơring Yang Ƀăk tơjur pă hloh 14%, jang sa iŏk đei jô̆ hơtŏ măt bơngai lơ̆m sơnăm iŏk đei 35 triu 500.000 hlak jên. Yă Phạm Thị Thúy, Ƀĭ thư Đảng tơring Yang Ƀăk pơma hơdăh:"Tơdrong jang kiơ̆ chi ƀô̆ 4 ‘lơ̆ng ‘noh Khul kơdră Đảng tơring hlôi tơlĕch jang hloi đơ̆ng blŭng sơnăm. Mư̆h tơlĕch jang rim tơdtong jang tơ iung pơjing muk drăm tơpôl, vei lăng sơđơ̆ng tơring, tơ iung pơjing khul chinh trĭ, tơ iung pơjing Đảng ‘noh Đảng ƀô̆ tơlĕch jang pơjao ăn rim chi ƀô̆, hơvơn rim kơdră chĕp pơgơ̆r đảng pơlei pơla năm hŏk pơhrăm trong pơgơ̆r hop akŏm, trong pơprŏ ăn dăr lăng hơlen, pơtho ăn tôch hơlen, hơdăh. Truh dang ei rim chi ƀô̆ hlôi chih nơ̆r pơkăp iung jang kiơ̆ hăm khul kơdră Đảng tơring, hơdrin jang kiơ̆ keh đang ‘lơ̆ng chi ƀô̆ 4 ‘lơ̆ng lơ̆m sơnăm ou."