Sơnăm ‘nao âu, um ai tơring tơrang tơ̆ thôn 2, xăh Ea H’Mlay, apŭng hơtăih hơtŏ Mdrắk hlôi đei lơ tơplih ‘lơ̆ng. Dôm trong glung lơ̆m pơlei hlôi đei pơm hăm ƀêtŏng ‘lơ̆ng truh 90%. Trong glung lơ̆m pơlei đei ŭnh điên tơ̆k hơdăh, hiôk ăn kơ kon pơlei năm vih vơ̆t, chơ tơmam đơ̆ng choh jang sa đei năm jơ̆p tơring. Yă Nguyễn Thị Bích, Bí thư chi bộ thôn 2, xăh Ea H’Mlay, apŭng Mdrắk, dêh char Dak Lak tơbăt, jĭ tơring oei lơ mơmat tat, kon pơlei oei hơtăih băl kơ na vă đĭ đăng dôm tơmam, jên jang pơjing tơring tơrang ‘nao oei athei hơvơn tơpôl tơgop  đơ̆ng găh ‘ngoăih kŭm nhen đơ̆ng tơdrong tơgŭm đơ̆ng teh đak. Nhen tơdrong jang ŭnh điên tŏk hơdăh kơ jung hloh 1km chô̆ tơ̆ trong lơ̆m pơlei năm tơ̆ anih kơ drơ̆m xăh, yă Bích akhan, ‘noh jĭ tơdrong jang yua đơ̆ng đoàn viên hơdruh tơdăm chô̆ pơm vă tơgŭm kon pơlei:  Gơnang đơ̆ng đei tơdrong jang tơ̆k hơdăh trong pơlei âu đơ̆ng Anih jang đoan dêh char, anih jang đoan apŭng bơngơ̆t truh, tơgŭm. Đơ̆ng noh truh dang ei kon pơlei tôch kơ chhôk ‘nă, tơdrong sơđơ̆ng ‘lơ̆ng ƀiơ̆ bơih. Dang ei kon pơlei chă năm vih vơ̆t tơ̆ gơmăng kŭm ưh pă hli dơ̆ng bơih, jô̆ hloi đe hơioh năm vih vơ̆t, hŏk hôp, bơ̆ jang dôm tơdrong jang ‘noh kŭm tôch kơ chơt hơiă, ‘nă hal.

Xăh sơlam Ia Lốp ‘noh jĭ xăh mơmat tat kơ apŭng Ea Sup, dêh char Dak Lak, hăm 1 puăt kơ sô̆ kon pơlei ‘noh bơngai kon kông păng 70% kon pơlei ‘noh jĭ ŭnh hnam dơnuh hin. Lơ̆m lơ sơnăm âu ki, hơnơ̆ng đei dôm khŭl hơdruh tơdăm năm jang tơgŭm dôm dêh char truh tơgŭm kon pơlei. Nhen lơ̆m sơnăm 2022, dôm khŭl năm jang tơgŭm pơyan pơdơh hŏk dêh char Bình Dương, khŭl năm jang tơgŭm Khŭl thây pơgang mơ lôh dêh char Bình Dương, Anih jang đoan dêh char Lâm Đồng păng Anih jang đoan dêh char Dak Lak hlôi tơlĕch lơ tơdrong jang năm tơgŭm, pơjao asong dôm tơdrong jang hơdruh tơdăm, hnam ‘mêm mơnat tơ̆ dôm pơlei. Kiơ̆ kơ ƀok Lang Văn Sơn, Phŏ Bí thư Anih jang Đảng dêh char, Kơdră chĕp kơ̆l Jơnŭm pơgơ̆r kon pơlei xăh Ia Lốp, tơdrong tơgŭm đơ̆ng lơ jên hlôi tơgop tơgŭm xăh vei sơđơ̆ng ‘lơ̆ng, hơdrin pơjing tơring tơrang ‘nao păng truh dang ei hlôi iŏk đei 12/19 tơdrong hơgăt:  Dôm khŭl năm jang tơgŭm vih ‘noh kŭm tơgŭm tôch kơ lơ ăn kon pơlei xăh, mă loi ‘noh dôm tơdrong jang tơpôl, pơgơ̆r lơ tơdrong jang khăm, hơmet jĭ, asong tơmam, pơjing tơdrong jang ŭnh điên tơ̆k hơdăh, tơgŭm dôm ŭnh hnam teh đak tơgŭm năr jang tôch kơ ‘lơ̆ng hơiă. Mă mônh ‘noh tơƀôh hơnăp jang pôm nơ̆r ƀơ̆r đon kŭm nhen iung jang hơdrol đơ̆ng đoan. Mă 2 dơ̆ng ‘noh gô tơgŭm kon pơlei đei trong hơdăh, ‘lơ̆ng rơgoh, tơjur lơ tơdrong ƀơm truh sơđơ̆ng tơpôl.

Jang kiơ̆ tơdrong jang đoan păng tơdrong jang hơdruh tơdăm, lơ̆m sơnăm âu ki, dêh char Dak Lak hlôi tơlĕch jang vă jê̆ 2.500 tơdrong jang tơ̆ lơ tơring kon pơlei oei, trong jang tơm truh tơring mơmat tat hloh, tơring hơtăih hơtŏ. Mă loi ‘noh, hăm  tơdrong ƀôh tơm ‘noh jĭ sơnăm pơgơ̆r hop akŏm đoan rim sơnăm, sơnăm mơ lôh Dak Lak hlôi tơlĕch jang ming man dôm jĭt kilomet tơdrong jang tơ̆k hơdăh trong pơlei, tơ̆k hơdăh trong sơlam; pơm ‘nao kơ hrĕng kilomet trong nơnăm tơring tơrang, dôm jĭt tŏ hnam ‘mêm mơnat tơ̆ dôm pơlei pơla hăm akŏp kơjă kơ ti hlak jên. Mŏ H Giang Niê, Bí thư Anih jang đoan dêh char Dak lak tơbăt: Nhôn gô vang jang kŭm hăm dôm kơdră anih jang đảng, khŭl kơdră păng kon pơlei vă vang tơgŭm pơjing tơring tơrang ‘nao hăm dôm tơdrong jang hơdruh tơdăm păng hăm jơhngơ̆m mơ lôh, jơhngơ̆m pran đơ̆ng kơ dih lơ̆m tơdrong iŏk jang dôm tơdrong hơnat, tơdrong ‘nao. Dôm tơdrong jang vei lăng sơđơ̆ng tơdrong arih sa gô đei tŭn pran păng dôm tơmam, jên jang lăng găh kon pơlei vă pơm liơ hơdai hăm kon pơlei jăh jang đang tơring tơrang ‘nao.

Kŭm hăm dôm tơdrong jang vei sơđơ̆ng tơdrong arih sa, sơnăm mơ lôh Dak Lak pơma hơdrô̆, sơnăm mơ lôh dôm hơdrĕch hơdrŭng tơring Tây Nguyên pơma atŭm hơnơ̆ng đei lơ tơdrong jang lăng truh dôm tơring mơmat tat, tơring sơlam. Tơ̆ Lâm Đồng, mă khan ưh kơ đei tơring hơdral tơring sơlam mă lei lơ sơnăm âu ki, tơdrong jang tơroi tơbăt, hơtŏk hơnăp jang đơ̆ng jơhnơr mơ lôh lơ̆m tơdrong vei lăng trong sơlam hơtơ̆p jrăng oei đei tơlĕch jang vă pơtho tơdrong joăt joe ăn kơ đoàn viên hơdruh tơdăm. ‘Nhŏng  Ndu Ha Biên, Phŏ bí thư Anih jang đoan dêh char Lâm Đồng tơbăt, lơ̆m lơ sơnăm âu ki, sơnăm mơ lôh dêh char Lâm Đồng hơnơ̆ng jang hơdai hăm dêh char Dak Lak pơgơ̆r tơdrong jang “ Khei pêng tơring sơlam” lăng truh kon pơlei, khŭl linh tŏk bŏk arih sa păng bơ̆jang hơnăp jang tơring sơlam Teh đak:  Anih jang đoan dêh char Lâm Đồng jang hơdai hăm Anih jang đoan dêh char Dak Lak tơlĕch jang kiơ̆ dôm tơdrong jang lăng băt tơdrong ‘lơ̆ng ăn tơring tơ̆ xăh sơlam kơ Dak Lak nhen trong Tơ̆k hơdăh trong sơlam, pơjao hŏk ƀŏng đang kơ ‘noh asong tơmam ăn kon pơlei tơring sơlam. Hơdai hăm ‘noh, krao hơvơn vang tơgŭm, pơlung đe buăl đoàn viên, hơdruh tơdăm tơring sơlam hơdrin tơroi tơbăt, krao hơvơn ăn sơnăm mơ lôh kơ dêh char Dak Lak, dêh char Lâm Đồng kŭm nhen pơđĭ tơring Tây Nguyên găh tơdrong joăt joe đơ̆ng jơhnơr mơlôh păng hơnơ̆ng hơtŏk hơnăp jang đơ̆ng jơhnơr mơ lôh lơ̆m tơdrong vei lăng tơdrong pơm tơm tơring sơlam kơ Teh đak.

Nhen pơyan puih mak kơ plĕnh teh, sơnăm mơlôh tơring Tây Nguyên ‘noh hơnơ̆ng tơdrong jang plang jơhngơ̆m mơ lôh, đon hơdrin, tơnăp đơ̆ng kơ dih, đei dôm tơdrong jang ‘lơ̆ng hơiă truh kon pơlei. Kiơ̆ đơ̆ng noh chih iŏk dôm tơdrong hơiă ‘lơ̆ng lơ̆m jơhngơ̆m khŭl kơdră păng kon pơlei tơ̆ dôm tơring, tơgop pơjing pơlei pơla roi ‘năr roi pơdrơ̆ng ‘lơ̆ng rŏ.