Lơ̆m pơbŭng hnam ‘nao ‘lơ̆ng liĕm, mŏ Hiao, pơlei Bông Phun, tơring Chư Á, Pơlei tơm Pleiku ưh kơ kĕ ôn jơhngơ̆m đon chơt hơ iă. Mŏ tơroi, sơ̆ ŭnh hnam hơrih sa lơ̆m pơbŭng hnam pơgia, pơyan ‘mi kial jei tôch tơtăm. Gơnơm tơdrong lăng ba đơ̆ng khul kơdră păng kon jên jang Tơdrong jang tơjur dơnuh kơjăp ‘lơ̆ng, mŏ hlôi đei hnam ‘nao, sơđơ̆ng hơrik sa păng hơdrin yak hloh dơnuh hin:"Ŭnh hnam bơ̆n dơnuh, mơmat dêh. Hnam so pơm đunh bơih, ‘mi hnăt hnot, tep ưh kơsŭk. Dang ei đei teh đak tơgŭm ăn pơm hnam ‘nao, ba sơđơ̆ng jơhngơ̆m hơrih sa jang sa, đei hnam ‘nao bơih."

Atŭm hăm ŭnh hnam mŏ Hiao, đơ̆ng sơnăm 2021 truh dang ei, Khul kơdră Đảng tơring Chư Á hlôi chĕp pơgơ̆r pơrô̆ Kơdră chĕp pơgơ̆r tơring păng Măt trân hơnih jang tơpôl tơgĕch dôm kon jên hu đơ̆ng rim tơdrong jang, tơdrong vă jang. Rim kon jên tơgŭm djru đơ̆ng tơdrong jang tơjur dơnuh, hơnih mong jên “Kơyuơ bơngai dơnuh”, hlôi tơgŭm tơ iung pơjing hnam oei ăn 33 ŭnh hnam dơnuh păng pôk ăn 64 tŏ rơmo yŏng ăn rim ŭnh hnam vă jê̆ dơnuh păng 12 ŭnh hnam yak hloh vă jê̆ dơnuh, tơjur ŭnh hnam dơnuh lơ̆m tơring lê̆ pă 39 ŭnh hnam (tơmơ̆t 1,58%). Ƀok Trương Văn Minh, Kơ iĕng Kơdră chĕp pơgơ̆r Đảng, Kơdră chĕp pơgơ̆r Hơnih vei lăng kon pơlei tơring Chư Á, tơbăt:" Khei năr ou ki, Đang ƀô̆ păng Khul kơdră chĕp pơgơ̆r tơring akŏm chĕp pơgơ̆r kon pơlei iung jang kơtang tơdrong jang tơjur dơnuh đơ̆ng dang ei truh đĭ sơnăm 2025. Mă kăl, bơ̆ jang pơtho pơhrăm ăn bơngai jang tơring choh jang sa, mă kăl ‘noh tơring kon kông, tơgŭm ăn kon pơlei đei tơdrong jang sơđơ̆ng, yak hloh dơnuh kơjăp ‘lơ̆ng. Hơdrin truh sơnăm 2025, tơring gô pă đei ŭnh hnam dơnuh bơih."

Đơ̆ng sơnăm 2021 truh dang ei pơlei tơm Pleiku hlôi tơgŭm djru tơ iung pơjing păng ming hơmet 64 pơbŭng hnam ăn ŭnh hnam dơnuh, hăm akŏp kon jên hloh 3 ti hlak jên. Vă jê̆ 100 ŭnh hnam dơnuh păng vă jê̆ dơnuh hlôi đei tŏk iŏk kon jên vă atŏk tơ iung choh jang sa, hăm kon jên hloh 4 ti 600 triu hlak jên. Hrei ou, pơlei tơm oei pă 149 ŭnh hnam dơnuh, hơtŏ hăm 0,24%. Ŭnh hnam dơnuh lơ̆m kon pơlei kon kông hlôi tơjur kơtang đơ̆ng 2,94%, lê̆ pă 1,29%. Kiơ̆ yok dôm tơdrong đei jơnei, Hơnih Đảng pơlei tơm Pleiku gô hơnơ̆ng pơrô̆ rim tơring tơlĕch jang lơ trong jang, rơih rim trong jang tơgŭm djru jơnei, trŏ lăp hăm rim bơngai. Yă Nguyễn Thị Thúy Diễm, Kơ iĕng Kơdră chĕp pơgơ̆r Đảng, Kơdră chĕp pơgơ̆r Hơnih vei lăng kon pơlei tơring Diên Phú, Pơlei tơm Pleiku, tơbăt:"Nhôn hơnơ̆ng tơ iung pơjing trong pơprŏ jang tơgŭm djru ŭnh hnam dơnuh jăl ‘nao 2025; pơm hơtŏk jang sa iŏk đei ăn kon pơlei, atŏk kơtang iŏk đei jơnei xut xa pơngot rơvĕt tơjur dơnuh khei năr ou ki păng jang ‘lơ̆ng hloh dơ̆ng lơ̆m khei năr ou kơnh."

Ƀok Nguyễn Thanh Bình, Kơ iĕng Kơdră chĕp pơgơ̆r Hơnih jang Mặt trận Tổ quốc Việt Nam Pơlei tơm Pleiku tơbăt, khei năr ou kơnh Măt trân iung jang hơdoi hăm khul Đảng, Kơdră chĕp pơgơ̆r pơlei tơm Pleiku lơ̆m jang kiơ̆ trong jang tơgŭm djru kon kông păng tơjur dơnuh kơjăp ‘lơ̆ng:"Khei năr ou kơnh, Hơnih bơ̆ jang MTTQ Việt Nam pơlei tơm păng rim hơnih jang gô hơnơ̆ng iung jang hơdoi, atŏk kơtang pơrô̆ pơrôp kon pơlei jang kiơ̆ ‘lơ̆ng ‘măng hơvơn păng tơdrong jang pơting dih băl ‘mêm kơ eng teh đak tơklep hăm rim tơdrong jang tơjur dơnuh kơjăp ‘lơ̆ng, pơm hơtŏk ‘lơ̆ng tơdrong hơrih sa kơ kon pơlei tơ̆ rim pơlei pơla kon kông."

Dôm tơdrong iŏk đei jơnei lơ̆m bơ̆ jang tơjur dơnuh kơjăp ‘lơ̆ng tơ̆ pơlei tơm Pleiku, dêh char Gia Lai đei ƀôh hơnăp jang chĕp pơgơ̆r tôm tong, kơtang đơ̆ng khul Đảng hlôi pơjing đei jơhngơ̆m pran tơgum kon pơlei, mă kăl kon pơlei kon kông hơdrin yak hloh dơnuh hin, lăng truh tơdrong hơrih sa sơđơ̆ng păng atŏk tơ iung kơ jăp ‘lơ̆ng.