Tơdrong jang bơ̆ gŏ lâ̆n juăt jue kơ kon pơlei M’Nông tơ̆ xăh Yang Tao, apŭng Lăk, dêh char Đăk Lăk đơ̆ng đunh hlôi đei lơ bơngai băt truh. Mă lei, kiơ̆ khei năr dăr xơnăm tơdrong jang juăt jue âu nhen lê̆ hiơt hiong. Ƀôh hơdăh noh, ăh tơdrong jang rim xăh minh tơmam drăm đei tơlĕch truh tơring, jơnŭm pơgơ̆r xăh hlôi hơvơn kon pơlei chih măt bang jang hăm tơmam “Gŏ lâ̆n juăt jue kơ bơngai M’ Nông” vă hơtŏk tơdrong erih iŏk yua ăn kon pơlei păng vei răk tơƀăk mong tơdrong jang bơ̆ gŏ lâ̆n kơ tơring. Ƀok Y Wu Sruk, Phŏ Kơdră Anih vei lăng kon pơlei xăh Yang Tao, apŭng Lăk ăn tơbăt: “Nhôn tŏk bŏk vei răk tơdrong jang juăt jue duh ‘meh vă hơtŏk păng tơlĕch tĕch răt lơ̆m tơring. Dang ei nhôn hlôi chih măt lơ̆m tơmam drăm OCOP. Dang ei đei lơ tơmoi truh tơmang tơ̆ apŭng Lăk veh tơ̆ pơlei pơm jang vă hơlen băt, lăng đe ngê̆ nhơ̆n bơ̆ kơtă hloi. Lơ̆m tơring adoi đei đe hơdruh tơdăm xơkơ̆t hơtŏk jang tơmang pơhiơ̆ pơlei pơla. Kiơ̆ tơchơ̆t đơ̆ng Ƀan châ̆p hanh Đảng ƀô̆ apŭng gô pơjing apŭng Lăk jing anih tơm tơmang pơhiơ̆ kơ dêh char Đăk Lăk pơkăp truh xơnăm 2030. Đe ngê̆ nhơ̆n adrin pơm thoi yơ hơ ‘nhăk tơmam juăt jue kơ pơlei bơ̆ gŏ lâ̆n truh tôm tơring nai băt găh tơmam bơ̆ đơ̆ng lâ̆n kơ po”

Dôm tơmam drăm vang akŏm pơkăp tơmam OCOP kơ dêh char.

Tơpă ăn ƀôh, Tơdrong jang rim xăh minh tơmam drăm hlôi pơm trong pran ăn lơ tơdrong jang ‘nao, dôm tơmam drăm ‘nao iung jing tơ̆ jâ̆p tơring. Ƀok Hoàng Mạnh Cường, Kơdră Kŏng ti Kiên Cường, tơ̆ phương Tân Tiến, pơlei tơm Buôn Ma Thuột hăm tơmam “Ka phê ĭch pơja Kiên Cường” hlôi đei xơkơ̆t tơmam drăm OCOP 4 sao tơroi: Vang jang kiơ̆ pơkăp OCOP jing trong hiôk vă dôm anih jang mŭk drăm hơtŏk tơmam drăm ‘lơ̆ng, keh kong găh um ai, tơdrong ‘lơ̆ng, hơtŏk tơdrong tơgar lơ̆m tơring: “Tơpă hăm rim tơ ‘ngla jang, rim anih jang adoi đei tơdrong tơroi kơdih. Tơpă tơdrong tơroi kơ minh tơmam drăm, rim tơ ‘ngla noh phara băl. Kơdih tơdrong tơroi lơ̆m tơmam drăm noh nhen trong hiôk vă hăp tơblang ăn anih jang vei hơlen, tơblang ăn tơring tĕch răt, ăn bơngai răt yua băt hơdăh hloh găh tơmam drăm mă noh. Kơlih minh tơmam drăm dang ei đe ưh đei pơkăl găh tơdrong ‘lơ̆ng, atŭm hăm noh tơmam drăm hăm tơpă đei kơjă kăp gĭt găh tơdrong juăt jue joh ayŏ kơ tơring mă noh ưh. Noh mă lơ tơdrong tơroi âu hăp ưh adrô̆ tơroi hơdăh găh tơmam drăm mă tơ̆ noh tơroi kơ joh ayŏ tơring tơrang pơm tơlĕch hăp”.

Ka phê pơja Kiên Cường

Kiơ̆ đơ̆ng 4 xơnăm tơlĕch jang rim xăh minh tơmam drăm, truh dang ei, dêh char Đăk Lăk đei 72 tơmam drăm pơkăp OCOP tơ̆ dêh char đơ̆ng 3-4 sao. Đei yua đơ̆ng tơmam drăm OCOP duh pơtoi tŏk lơ, xek axong tơdrong jang ăn lơ bơngai jang tơ̆ tơring pơxĕl hăm jên khei jang lơ. Đơ̆ng tơdrong iung jang âu, Anih vei lăng kon pơlei dêh char Đăk Lăk hlôi kĭ pơkăp “Tơdrong jang tơmam drăm OCOP kơ dêh char truh xơnăm 2025 păng xơkơ̆t truh xơnăm 2030”. Lơ̆m noh tơlĕch tơchơ̆t, tôm xăh lơ̆m dêh char adoi đei tơmam drăm pơkăp OCOP. Truh xơnăm 2025, gô đei 200 tơmam drăm đei pơkăp OCOP, truh xơnăm 2030 jâ̆p dêh char gô đei 300 tơmam pơkăp OCOP. Dôm tơmam drăm athei hơtŏk dar deh tơdrong ‘lơ̆ng, hơtŏk pơkăp tăl păng tơrĕk lơ hloh truh tơring tĕch răt lơ̆m teh đak păng teh đak đe vă hơ ‘nhăk tơdrong pơyua kăp gĭt hloh. Ƀok Nguyễn Hoài Dương, Kơdră Anih Choh jang xa – Hơtŏk tơring pơxĕl, Kơdră Anih axong Tơdrong jang Tơring pơxĕl ‘nao dêh char Đăk Lăk ăn tơbăt: “Vă tơmam pơkăp OCOP trŏ hăm tơdrong pơkăl kơ tơring tĕch răt noh teh đak duh đei dôm trong jang tơgŭm găh kơmăi kơmŏk ‘măn ăn pơm jang dăh mă tơgŭm anih pơm tơlĕch tơmam drăm, tơgŭm pơtho pơm jang. ‘Nâu jing tơdrong kăp gĭt hloh, đang kơ noh tơgŭm hơtŏk tĕch pơdro, tơrĕk hăm tơring tĕch răt, jên axong pơkăp hơnăn, tơgŭm chơ chă pơih xă tơring tĕch tơlĕch lơ̆m păng ‘nguaih kơ teh đak tơbang dôm tơmam drăm âu. Noh jing dôm tơdrong lơ̆m tơdrong jang OCOP dôm xơnăm truh hlôi xơkơ̆t păng hlôi akŏm vă tơgŭm ăn dôm tơ ‘ngla jang vă pơm jang tơnăp hloh”.

Tơdrong jang rim xăh minh tơmam drăm tŏk bŏk jing jơhngơ̆m pran vă hơtŏk, pơm ‘nao mŭk drăm tơring pơxĕl tơ̆ Đăk Lăk. Tơdrong mă âu duh tŏk bŏk pơjing jơhngơ̆m pran tih tên ăn pơjing tơring pơxĕl ‘nao kiơ̆ pơkăp kơjăp xơđơ̆ng đơ̆ng tơdrong xơkơ̆t anih dơ̆ng ăn tơmam choh pơtăm tơ̆ tơring.