Apŭng Xín Mần, dêh char Hà Giang truh khei ‘năr âu hlôi jang đang đei hloh 80% tơdrong hơgăt găh tơgŭm hnam oei ăn ŭnh hnam bơngai kon kông, tơring groi kông. Ưh khan lăp thoi noh đĕch ôh, tơring oei hơdrin lơ̆m tơdrong tơchă dôm tơdrong jang sa ăn kon pơlei hơtŏk tơiung mŭk drăm. Khŭl kơdră hlôi ưh kơ ‘nhoen măng năr tơchă bơngai jang hơdai, hơtŏk plei lơ ăn ‘long pơtăm. Dôm ‘măng hop akŏm pơma dơnuh pơgơ̆r hơnơ̆ng. Dôm kang ƀô̆ nhen Kơdră anih vei lăng găh bơngai jang, lĭnh jĭ rơka păng tơpôl apŭng Xín Mần Đặng Thu Chang athei tơroi tơbăt trong tơlĕch jang kiơ̆, tơdrong tơlĕch jên păng pơkăp 1 giĕng 1 ‘măng:

Apŭng jang tôch kơ tang. Dôm xăh athei vei sơđơ̆ng păng đei tơroi tơbăt, athei đei nơ̆r pơkăp, hơgăt hơnăp jang đơ̆ng bơngai chĕp kơ̆l pŭ hơnăp jang lơ̆m đĭ đăng dôm tơdrong jang kiơ̆ Tơdrong jang tơm teh đak. Lơ̆m noh ƀôh hơdăh hơnăp jang đơ̆ng kơdih lơ̆m kơplăh jang, ưh kơ vei sơđơ̆ng dôm tơdrong hơgăt ‘noh iŏk hơlen lăng kơdih hơtuch sơnăm kŭm nhen đei apĭnh găh tơdrong jang kang ƀô̆.

Đơ̆ng yan âu dăr hơlen 3 tơdrong jang tơm teh đak tơ̆ dôm tơring, Phŏ Kơdră Khŭl vei lăng hơdrĕch kon kông kơ Kuôk hô̆i Trần Thị Hoa Ry tơroi tơdrong tơm pơm ăn hơnhăk truh tơdrong đei tơring jang ‘lơ̆ng mă lei kŭm đei dôm tơring ưh kơ bơ̆jang kiơ̆ đei:

Dôm tơring hơyơ đei kơdră đảng, khŭl kơdră tơring bơngơ̆t truh ‘noh pơgơ̆r jang tôch kơ pran kơtang, hơmet ăn kang ƀô̆ jang gơh. Păng đơ̆ng hơmet ăn kang ƀô̆ pơm lăp tôm tơdrong kĕ jang thoi noh, kơna lơ̆m dôm tơdrong jang pơgơ̆r, vei lăng, jang hơdai ‘lơ̆ng păng jang tơgŭm tơlĕch ăn dôm hla ar găh gơh kĭ đơ̆ng tôch kơ hrôih. Ĭnh ƀôh đe sư ưh khan lăp gô truh dôm tơdrong mơmat tat, tơhlăk tơhlĭn mă hơmet pơ ‘lơ̆ng đĕch ôh mă kơdih đơ̆ng kơdră kơpal hlôi đei tơdrong kơchăng pơjing grŭp bơ̆jang, ƀơ̆t lăp chĕp ti tơƀôh tơdrong jang ăn kơ kang ƀô̆ tơ̆ tơring.

Hơlơ̆k dơ̆ng hăm tơdrong tơroi kơ apŭng dơnuh hin tơring groi kông tơmo Xín Mần, Hà Giang. Tơdrong hơtŏk hơnăp jang tơm, pơcheh hơgei đơ̆ng kon pơlei, tơdrong pơm jŭk yŭk trong hơlâu đơ̆ng kang ƀô̆, đảng viên păng tơdrong mơ̆t jang đơ̆ng pơđĭ khŭl jang chĭnh trĭ ‘noh jĭ tơdrong tơm gĭt kăl vă tơchơ̆t đei yua dôm tơdrong jang tơm teh đak. Kiơ̆ kơ ƀok Kơdră Anih vei lăng kon pơlei dêh char Hà Giang Nguyễn Văn Sơn, ‘nâu kŭm jing tơdrong tơm vă Hà Giang jing 1 lơ̆m 3 tơring kơ lơ̆m teh đak iung jang hơdrol apĭnh đei bơ̆jang kiơ̆ trong jang pơlong lăng klăih song hơdăh hơnăp jang, pơjao ăn jang:

Dêh char ưh kơ gơh jang tơplih ăn apŭng, apŭng ưh kơ gơh jang tơplih ăn kơ xăh păng hơ drơ̆k dơ̆ng, trung ương ưh kơ gơh jang tơplih ăn kơ dêh char ôh. Kơdih tơ̆ dêh char hrei ‘nâu kŭm hli kơ glăi, ƀơ̆t lăp oei atŭm atŭm, kơna ‘nhŏng oh tơ̆ apŭng kŭm hli kơ glăi kŭm atŭm atŭm ‘noh pơjao ăn kơ xăh kŭm atŭm atŭm. Thoi noh pơjing tơdrong jang tơgŭm hơdrô̆ đơ̆ng Kuôk hô̆i, đang kơ ‘noh Khŭl kơdră teh đak mă hơdăh rim tơdrong, klăih song tơring. Ƀơ̆t doh, kang ƀô̆ jang ưh kơ hli kơglăi mă kang ƀô̆ gô đei kơchăng vă bơ̆ jang kiơ̆.

Hơtŏk klăih song ăn hơnăp jang, pơjao đon lui. Tơring gô pơ̆n jang, pơ̆n tơlpih ‘lơ̆ng, pơ̆n pŭ hơnăp jang vă jang đang 3 tơdrong jang tơm teh đak. ‘Noh jĭ nơ̆r pơma hơdăh đơ̆ng Phŏ kơdră Anih tơlĕch nơ̆r sơkơ̆t păng tơmơ̆t jên jang dêh char Quảng Bình Mai Hồng Ngọc:

Mă lei, tơdrong pơlong lăng klăih song hơnăp jang ăn tơ̆ apŭng kŭm kăl băt truh, hơtŏk loi dơ̆ng dăr hơlen, dăr lăng đơ̆ng anih jang pơgơ̆r vei lăng dôm tơdrong jang păng tơtom tơgŭm, pơtho dôm apŭng, xăh, tơmơ̆t jên jang đơ̆ng tơdrong pơjing, kĭ ăn, pơjao trong tơlĕch ăn kon jên vă tơdrong tơlĕch jang kŭm nhen bơ̆jang kiơ̆ iŏk hơlen lăng, kla jên đơ̆ng dôm tơdrong jang.

Hăm jơhngơ̆m đon kơchăng, dăr hơlen athei mă ƀlep, tơpăt, ưh kơ veh ver, tơtom lăng ƀôh dôm tơdrong mơmat tat, tơhlăk tơhlĭn, Kuôk hô̆i hơnơ̆ng yak hơdai hăm Khŭl kơdră teh đak vă tơchă đei dôm trong jang lăp hloh, mă loi ‘noh jĭ ƀơ̆t khei ‘năr bơ̆jang kiơ̆ 3 tơdrong jang tơm kơ teh đak jăl jang 2021-2025 lăp oei pă 2 sơnăm dơ̆ng ‘noh jĭ athei jang đang. ‘Năr 29 khei 11 sơnăm 2023, ‘Măng hop akŏm mă 6 Kuôk hô̆i jăl 15 hlôi pơdrơ̆ng kiơ̆ Tơdrong tơchơ̆t gĭt kăl găh tơdrong ‘nâu. ‘Nâu jĭ ‘măng mă blŭng mĭnh tơdrong jang dăr lăng đơ̆ng Kuôk hô̆i đei bơ̆jang kiơ̆ tŏk bŏk jăl jang, jên hơlen lăng hơdai hăm tơdrong tơlĕch jang kiơ̆. ‘Măng mă blŭng, mĭnh tơdrong dăr hơlen tih akŏm pơđĭ 3 tơdrong jang tơm teh đak gĭt kăl kơ teh đak. Dăr hơlen hăm jơhngơ̆m đon tơpăt ‘noh jĭ pơjing păng tơjră, lơ̆m noh pơjing oei jing vă rim tơdrong roi ‘năr roi ‘lơ̆ng hloh. Kơdră Kuôk hô̆i Vương Đình Huệ hlôi pơma hơdăh thoi noh lơ̆m lơ ‘măng hop akŏm păng tơbăt:

Kuôk hô̆i drơ̆ng ăn vă Khŭl kơdră teh đak jăh pơjing, pơtruh ăn Kuôk hô̆i tơ̆ ‘măng hop akŏm jê̆ hloh hla ar chih ming tơdrong tơchơ̆t găh pơlong lăng 1,2 trong jang tơgŭm hơdrô̆ păng tơdrong klaih song hơnăp jang ăn rim apŭng tơchơ̆t hơnăn tơdrong jang, hơmet ming, klăih song iŏk yua kon jên jang teh đak lơ̆m tơlĕch jang kiơ̆ dôm Tơdrong jang tơm teh đak.

Lơ bơngai tang măt Kuôk hô̆i hơmĕng, tơdrong tơchơ̆t đơ̆ng Kuôk hô̆i đei hơlen lăng dôm tơdrong ưh kơ ‘lơ̆ng lơ̆m kơplăh tơlĕch jang 3 tơdrong jang tơm teh đak. Bơngai tang măt Rơ Châm Hphik, khŭl Gia Lai tơroi:

 Tơdrong tơchơ̆t đei tơdrong kăl păng tơgŭm, tôch kơ lăp hăm jơhngơ̆m đon kon pơlei, gô hơmet pơ ‘lơ̆ng đei dôm tơdrong tơm tŏk bŏk tơhlăk tơhlĭn lơ̆m kơplăh tơlĕch jang 3 tơdrong jang tơm teh đak....

Kŭm hăm tơdrong pơdrơ̆ng kiơ̆ Tơdrong tơchơ̆t dăr hơlen tih găh ‘Tơdrong tơlĕch jang kiơ̆ dôm tơdrong tơchơ̆t đơ̆ng Kuôk hô̆i găh dôm Tơdrong jang tơm teh đak găh pơjing tơring tơrang ‘nao sơnăm 2021-2025; tơjur dơnuh hin kơjăp sơnăm 2021-2025; hơtŏk tơiung mŭk drăm tơpô tơring kon pơlei kon kông păng tơring groi kông sơnăm 2021-2030”, Kuôk hô̆i kŭm hlôi pơjao ăn kơ Khŭl kơdră teh đak pơtruh ăn Kuôk hô̆i lơ̆m ‘măng hop akŏm tơ jê̆ âu hloh 1 Tơdrong tơchơ̆t hơdrô̆ găh klăih song hơnăp jang, pơjao ăn hơnăp jang, tơ jur hla ar hàng chính vă tơtom hơmet pơ ‘lơ̆ng mơmat tat, tơhlăk tơhlĭn, tơgŭm tơdrong tơlĕch jang kiơ̆ dôm Tơdrong jang tơm teh đak iŏk đei jơnei, jang đang ƀlep khei ‘năr pơkăp, pơm đon lui păng tơdrong arih sa hiôk hian ăn kon pơlei.