Dôm khei hơtuch sơnăm 2022, tơdrong jang sa, pơm tơlĕch tơ̆ plei Đăk Xây, xăh sơlam Đăk Long, apŭng Đăk Glei, dêh char Kon Tum ‘noh sa roi hăt hot. ‘Nao phĕ đang cheh phe, 130 ŭnh hnam kon pơlei lơ̆m pơlei ‘noh rô̆ dơ̆ng ƀum ƀlang vă tom tĕch ăn hnam kơmăy pơm tơlĕch pŭk. Iŏk yua đơ̆ng 2 kơloăi ‘long âu năr hơ tuch sơnăm tơgŭm dôm ŭnh hnam kon pơlei đei jên răt yua tơmam Têt păng tơmam pơyua ăn oei sa ŭnh hnam. Ƀok A Xôn, Bí thư Chi bộ plei Đăk Xây chhôk hơiă tơbăt, jang sa, tơdrong arih sa kơ kon pơlei sơnăm ‘nâu đei tơdrong tơplih ‘lơ̆ng gơnang đơ̆ng pơm kiơ̆ trong pơtho pơjing tơring tơrang ‘nao đơ̆ng khŭl kơdră păng kang ƀô̆ khŭl linh vei lăng tơring sơlam Kơ đông lĭnh Đăk Long:  

“Khŭl kơdră, rim khŭl grŭp kơ xăh tơroi tơbăt, pơtho kon pơlei lơ̆m pơlei dôm tơdrong jang hơdăh vă pơjing tơring tơrang ‘nao. Kơ đông lĭnh vei lăng tơring sơlam Đăk Long ăn kang ƀô̆, khŭl linh năm truh tơ̆ rim ŭnh hnam kon pơlei pơtho tơƀôh trong pơtăm, săy phŏng ăn rim kơ loăi ‘long pơtăm vă iŏk đei jơnei mŭk drăm. Sơnăm ‘nâu kon pơlei tôch kơ chhôk hơiă ƀơ̆t cheh phe păng ƀum ƀlang tă kơ ăn iŏk yua ‘lơ̆ng ngăl. Tơ̆ tơring sơlam mơmat tat mă ‘nao hloh 1 sơnăm tơdrong arih sa tơplih lơ thoi âu ‘noh chhôk ‘nă dêh.”

Đăk Long jĭ xăh sơlam tơtil hăm teh đak buăl Lào găh tơring mơmat tat dêh hloh kơ apŭng Đăk Glei, dêh char Kon Tum. Jang kiơ̆ tơdrong jang tơm kơ teh đak pơjing tơring tơrang ‘nao, yak hloh lơ mơmat tat, truh đĭ sơnăm 2022 xăh jang đei 14/19 tơdrong hơgăt. Ƀok Huỳnh Ngọc Ly, Kơdră Anih vei lăng kon pơlei xăh Đăk Long tơbăt, đei đăi jơnei âu gơnang đơ̆ng khŭl kơdră xăh hlôi hơtŏk đei hơnăp jang tơm đơ̆ng kon pơlei lơ̆m pơjing tơring tơrang ‘nao:

“‘Ngoăih kơ tơdrong jang tơgŭm ăn Kơdră Đảng, kơdră tơring jang kiơ̆ hơnăp jang hơtŏk tơiung mŭk drăm - tơpôl vei sơđơ̆ng teh đak, Kơđông lĭnh oei klăih song đảng viên năm hôp hơdai tơ̆ dôm chi bộ tơ̆ pơlei vă kơ tom băt đon tơchĕng ‘meh vă, đei trong vă jang, đei jang tơgŭm hăm kơdră đảng, kơdră tơring lơ̆m hơtŏk tơiung mŭk drăm. 2 dơ̆ng ‘noh jĭ tơdrong jang kang ƀô̆, khŭl linh ‘noh bơngai kon kông đơ̆ng Kơđông lĭnh pơm ‘nhŏng oh hăm 1,2 ŭnh hnam kon pơlei lơ̆m tơring vă kơ hơtŏk tơiung mŭk drăm ăn ŭnh hnam ‘noh. Dôm bơngai mơ mat tat lơ̆m tơpôl đei Kơđông lĭnh tôch kơ bơngơ̆t truh păng ăn kang ƀô̆ năm pơ tho dôm tơdrong jang hơdăh vă hơtŏk tơiung mŭk drăm.”

Sơnăm 2022 dêh char Kon Tum đei 7 xăh jang đang ‘lơ̆ng tơring tơrang 'nao, lơ̆m noh đei sơlam Sa Loong, apŭng Ngọc Hồi tơtil hăm teh đak buăl Campuchia. Lơ̆m tơdrong jang pơjing tơring tơrang ‘nao, gơnang đơ̆ng hơtŏk đei jơhngơ̆m đon tơgoăt tơgoăl, khŭl kơdră, kon pơlei păng kang ƀô̆ khŭl linh vei lăng tơring sơlam hlôi 1 jơhngơ̆m đon hơmet pơ ‘lơ̆ng lơ tơdrong tơtŏ lơ̆m tơring. Ƀok Nguyễn Hữu Bảng, Kơdră chĕp kơ̆l Anih vei lăng kon pơlei xăh Sa Loong pơma hơdăh, vă xăh jang đei tơring tơrang ‘nao đei tơdrong tơgop jơhngơ̆m tôch kơ tih đơ̆ng kang ƀô̆, khŭl lĭnh Kơđông vei lăng tơring sơlam Sa Loong:

“Vă kơ xăh Sa Loong hơtuch sơnăm 2022 jang đang ‘lơ̆ng tơring tơrang ‘nao, lơ̆m dôm sơnăm âu ki tơdrong jang hơdai đơ̆ng Kơđông lĭnh păng xăh nhôn hơnơ̆ng pơma hăm băl Kơđông lĭnh păng xăh ‘noh jĭ mĭnh păng lơ̆m tơdrong jang hơdai ‘noh tôch kơ ‘lơ̆ng. ‘Meh akhan dôm sơnăm đơ̆ng rŏng dơ̆ng tơdrong jang hơdai âu gô lang să hloh dơ̆ng vă tơdrong hơtŏk tơiung mŭk drăm - tơpôl, vei lăng sơđơ̆ng teh đak lơ̆m xăh đei ‘lơ̆ng hloh.”

Mĭnh jơhngơ̆m đon kŭm hăm khŭl kơdră chĕp kơ̆l, kon pơlei 13 xăh sơlam kơ dêh char Kon Tum pơjing tơrang tơrang ‘nao, Anih tơm pơgơ̆r ƀô̆ đô̆i vei lăng tơring sơlam dêh char Kon Tum ăn dôm jĭt ‘nu kang ƀô̆ năm jang ăn kơ 11 xăh; klăih song đảng viên tơ̆ dôm kơđông lĭnh vang hŏk hôp tơ̆ 71 chi bộ pơlei; pơm ‘nhŏng oh, vei lăng hloh 1.000 ŭnh hnam lơ̆m tơring sơlam; tơgŭm kon pơlei hơtŏk tơiung jang sa, ming man anih jang kăl hăm dôm rơbâu năr jang. Dôm tơdrong jang tơgŭm kon pơlei sut pơngot tơjur dơnuh hin, pơjing tơring tơrang ‘nao iŏk đei jơnei hơdăh ‘lơ̆ng pơm tơplih tơdrong arih sa păng um ai tơring tơrang sơlam. Thiếu tá Nguyễn Doãn Hải, Chính trị viên phŏ Kơđông lĭnh vei lăng tơring sơlam Sa Loong, tơbăt:

“Sơ̆ kon pơlei kiơ̆ tơdrong joăt so lăp jơmŭl 1 sơnăm lăp đei 1 pơyan iŏk yua ưh kơ lơ. Kơđông lĭnh vei lăng tơring sơlam tơgŭm kon pơlei tơdrong jang pơtăm ƀa đak 1 sơnăm đei 2 pơyan iŏk yua lơ. Anih jang Đảng, Khŭl pơgơ̆r Kơđông lĭnh jang hơdai hăm khŭl kơdră chĕp kơ̆l tơring, kang ƀô̆ khŭl lĭnh jur tơgŭm kon pơlei sut hnam pơm pơgia jang đang tơring tơrang ‘nao. Ŭnh hnam hơyơ ưh kơ đei bơngai jang ‘noh kang ƀô̆ khŭl linh tơgŭm năr jang vă ŭnh hnam dă ƀiơ̆ kơ mơ mat tat găh mŭk drăm.”

Truh đĭ sơnăm 2022, dêh char Kon Tum đei 43 xăh jang đang ‘lơ̆ng tơring tơrang ‘nao. Lơ̆m noh hơdrô̆ trong sơlam kơ jung hloh 292km tơtil 2 teh đak buăl Lào păng Campuchia đei hloh 6 lơ̆m 13 xăh jang đang ‘lơ̆ng tơring tơrang ‘nao, lơ̆m noh apŭng Ngọc Hồi đei 5 xăh păng apŭng Ia H’Drai đei 1 xăh jang đang ‘lơ̆ng. Tơdrong jang kiơ̆ đei iŏk yua Tơdrong jang tơm kơ teh đak pơjing tơring tơrang ‘nao tŏk bŏk tơgŭm 13 xăh sơlam, găh 4 apŭng Đăk Glei, Ngọc Hồi, Sa Thầy păng Ia H’Drai kơ dêh char Kon Tum roi ‘năr roi tơplih ‘lơ̆ng hơiă.