‘Nao âu, Jơnŭm hơlen lăng, klăih song kơloăi tơmam OCOP dêh char Dak Lak hlôi pơdrơ̆ng kiơ̆ hơnăn 25 tơmam iŏk đei hla ar pơkăp tơmam OCOP 3 hơnglŏng, 4 hơnglŏng lơ̆m dêh char lơ̆m sơnăm 2022 găh tơdrong jang mĭnh xăh 1 tơmam jăl jang 2021 – 2025, hơtŏk akŏp kơ sô̆ tơmam OCOP tơ̆ tơring ‘nâu tŏk 143 tơmam. 

Lơ̆m kơsô̆ 25 tơmam OCOP ‘nao đei asong hla ar pơkăp ‘măng âu đei 7 tơmam đei kơloăi OCOP 4 hơnglŏng păng 18 tơmam iŏk đei kơ loăi  3 hơnglŏng. Dôm tơmam đei song hla ar pơkăp OCOP gô đei Anih vei lăng kon pơlei dêh char Dak Lak asong hla ar pơkăp tơmam ‘lơ̆ng, đei iŏk yua hơnăn drơ̆ng ăn tơmam OCOP Việt Nam păng dơ̆ng kơ loăi hơ nglŏng in tơ̆ tơpu tơmam kiơ̆ tơdrong hơgăt. Pơtôch drơ̆ng ăn klăih song kơ loăi đei gơh yua lơ̆m 3 sơnăm.

Vă hơtŏk ‘lơ̆ng kơjă kăp gĭt tơmam choh jang sa tơring, tơ̆ hơnăp kơnh, dêh char Dak Lak hơnơ̆ng tơgŭm dôm tơ ‘ngla OCOP hơtŏk ‘lơ̆ng, tơgŭm dôm anih mơdro sa, hơp tak xăh jang hơdai mơdro sa, tơchă anih tĕch mơdro, pơih să anih tĕch mơdro. Ƀok Huỳnh Ngọc Dương, Phŏ Kơdră Anih vei lăng kơmăy kơmŏk mơdro sa dêh char Dak Lak tơbăt:

“Dôm tơmam vang jang tă kơ đei sa yua dôm tơdrong jang tơgŭm đơ̆ng tơring ngăl. Mă 2 ‘noh jĭ dôm tơmam iŏk đei Ocop 3 hơ nglŏng truh 4 hơnglŏng nhôn đei dôm hla ar tơroi ăn dôm khŭl jang kơ dôn anih jang vei lăng kơmăy kơmŏk mơdro sa dôm tơring lơ̆m teh đak păng dôm anih jang pơtrŭt mơdro sa teh đak đơ̆ng anih vei lăng kơmăy kơmŏk mơdro sa ‘noh tơ̆ tơdrong hiôk vă jang hơdai hăm khŭl jang tĕch mơdro păng dôm hơnih tĕch tơmam tơ̆ tơring vă tŭn pran tĕch mơdro.”

‘Năr 14/8 âu ki, Anih vei lăng tơdrong jang tơring tơrang ‘nao dêh char Dak Lak hlôi pơgơ̆r Hop akŏm tơroi tơbăt, tơlĕch jang tơdrong jang mĭnh xăh 1 tơmam sơnăm 2023.

Hop akŏm hơlen lăng dôm tơmam OCOP hlôi tơtĕnh sơkơ̆t hơdăh anih dơ̆ng, đei anih tĕch mơdro sơng iŏk ‘lơ̆ng, tơgŭm kon pơlei jang chŭn mur pơih să tơdrong jang sa, hơtŏk kơjă tơmam, đơ̆ng noh tơplih trong jang mŭk drăm, hơtŏk ‘lơ̆ng iŏk yua, tơdrong arih sa kơ kon pơlei păng bơ̆jang kiơ̆ đei yua grŭp hơgăt “mŭk drăm păng pơgơ̆r jang sa” lơ̆m tơdrong hơgăt teh đak găh xăh tơring tơrang ‘nao.

Hơdai hăm jơnei iŏk đei, tơdrong jang OCOP tơ̆ Dak Lak oei đei 1,2 tơdrong tam mă ‘lơ̆ng nhen: dôm trong jang tơgŭm hăm tơ ‘ngla dôm tơmam OCOP oei tŏ sĕt, tơdrong jang tơmam OCOP oei ưh kơ lơ, tơdrong jang pơtrŭt mơdro sa oei răh rai, ưh kơ đei hrơ̆ch 1 ‘măng, tam mă pơm đei tơdrong hơiă ‘lơ̆ng vă pơ jing um rup, kơjă mơdro sa.

Tơ̆ hop akŏm dôm bơngai tang măt hlôi roi tơbăt găh “Tơdrong jang mĭnh xăh 1 tơmam, tơdrong hlôh vao lơ̆m teh đak păng apŭng plĕnh teh găh hơtŏk tơiung tơring tơrang”, “Dôm tơdrong lăng băt đơ̆ng rŏng 5 sơnăm tơlĕch jang tơdrong jang OCOP tơ̆ Dak Lak”, “Tơdrong kăl tơdrong jang OCOP. Hơnăp jang đơ̆ng khŭl jang chĭnh trĭ lơ̆m tơlĕch jang Tơdrong jang OCOP. Ƀai hŏk hlôh vao, trong jang tơm lơ̆m jăl jang 2023-2025”.

Pơma tơ̆ hop akŏm, ƀok Nguyễn Thiên Văn, Phŏ kơdră Anih vei lăng kon pơlei dêh char Dak Lak pơma hơdăh, hăm trong jang kăl “ Tơdrong ‘lơ̆ng pơm jing hơnăn”, kŭm hăm tơdrong hơdrin đơ̆ng rim tơ ‘ngla, athei dôm anih jang, tơring bơngơ̆t truh hloh dơ̆ng dôm trong jang tơgŭm hăm tơ ‘ngla dôm tơmam OCOP mă loi ‘noh jĭ hơtŏk ‘lơ̆ng găh tơdrong vei lăng, pơm tơlĕch păng tĕch mơdro tơmam.

“ Tơdrong mơ̆t jang đơ̆ng kơdră đảng khŭl kơdră tơring lơ̆m tơgŭm ăn dôm tơ ‘ngla tơmam kŭm nhen hơtŏk tơiung dôm tơmam đei hơnhăk ăn đei yua kơ tơring đơ̆ng bơ̆n, đei dôm tơdrong hơtŏk tơiung tơmam păng hơtŏk tơiung anih tĕch mơdro vă tơmam đei hơ nih dơ̆ng pơm đei lơ tơdrong hiôk vă hơtŏk tơiung mŭk drăm tơpôl ăn kon pơlei lơ̆m tơchă ăn tơdrong jang, iŏk yua.”

Phŏ Kơdră Anih vei lăng kon pơlei dêh char Dak Lak kŭm athei anih jang kơpal akŏm pơtho, tơgŭm ăn dôm tơmam hlôi chih măt vang jang Tơdrong jang OCOP đơ̆ng dôm apŭng, thị xăh, pơlei tơm lơ̆m sơnăm 2023 kiơ̆ tơdrong hơgăt ‘nao đơ̆ng Tơdrong hơgăt OCOP teh đak, tơtĕnh pơgơ̆r dôm lăm pơhrăm ăn kang ƀô̆ vei lăng Tơdrong jang OCOP dôm kơdră păng dôm tơ ‘ngla tơmam vang jang Tơdrong jang găh pơm tơlĕch, pơjing trong vă jang tĕch mơdro, pơjing hơnăn, marketing păng roi tơƀôh, hơtŏk tơiung tơmam ăn dôm anih pơm tơlĕch vang jang Tơdrong jang OCOP sơnăm 2023; hơtŏk loi dơ̆ng tơdrong jang roi tơbăt găh Tơdrong jang  OCOP.