Yă Ka Hằng jĭ 1 lơ̆m dôm bơngai jang chŭn mir tơ̆ plei Đarahoa, xăh Hiệp An, apŭng Đức Trọng (Lâm Đồng) jang xa đei yoa lơ hlŏh sơnăm sơ̆, gơnơm đơ̆ng tơmât yoa kơmăy kơmŏk ‘nao lơ̆m tơdrong pơtăm ‘nhot. Yă Ka Hằng tơroi, tơdrong tĕch mơdro ‘nhot lơ̆m sơnăm 2023 ưh đei ƀônh hlot, kơjă reh, mă lei chĕh phe ‘nŏh tŏk tôch măk. Găh noh dơ̆ng, gơnơm jang đei tơmam lơ păng ‘lơ̆ng, kơna hăm 3 sao ‘nhot, pơkao păng chĕh phe, unh hnam yă oei iŏk đei vă jê̆ truh 500 triu hlak jên.

Yă Ka Hằng, pơma: “Sơnăm ‘nâu, mă đơ̆ng mŭk drăm atŭm pơmat tat ră mă lei tơdrong arih xa kơ kon pơlei tơ̆ âu oei sơđơ̆ng ‘lơ̆ng, jang xa đei iŏk yoa lơ ƀiơ̆ kơdôm sơnăm adrol ki. Gơnơm kơ kon pơlei adrin hŏk pơhrăm, jang kiơ̆ KHKT mưh chă pơtăm ‘nhot, pơkao kiơ̆ hla ar đe apinh răt mă gơ̆h đei iŏk yoa kơjăp ‘lơ̆ng. Dang ei rim hnam đei man hơmet ‘lơ̆ng, trong pơlei pơla tuh ƀê tông ngăl, tơdrong arih xa roi tơplih păng roi tŏk ƀiơ̆ kơ adrol sơ̆”.

Hiệp An đei 2.460 unh hnam, lơ̆m nŏh bơngai kon kông đei 37%. Lơ̆m xăh đei vă jê̆ 2.500ha tĕh choh jang xa, mă lơ 'nŏh choh jang hăm kơmăy kơmŏk 'nao kơna hơnhăk ăn iŏk yoa lơ, jô̆ păh lăp đei 420 triu hlak jên 1ha 1 sơnăm. Dang ei đĭ đei 750 unh hnam jang kiơ̆ trong jang hơdoi đơ̆ng rei pơtăm truh tĕch tơmam. Hơtŏk iŏk yoa jô̆ păh lăp kiơ̆ kơ̆l bơngai đei vă jê̆ 70 triu 1 'nu 1 sơnăm. Truh dang ei, kơsô̆ unh hnam tơnuh oei đei pă 19 unh hnam, iŏk đei dang 0,58%.

Kiơ̆ kră pơlei K’Lèn, tơ̆ plei K’Long, đơ̆ng ưh kơchăng lơ̆m tơdrong choh jang xa, mă lơ ‘nŏh gơnơm đơ̆ng jang ƀa 1 pơyan 1 sơnăm, kon pơlei tơ̆ âu pơ̆n jang kiơ̆ KHKT ‘nao, chă pơtăm ‘nhot, pơkao đei kơjă măk ƀiơ̆. Gơnơm thoi nŏh, tơdrong arih xa găh tơmam drăm păng jơhngâm đon đơ̆ng kon pơlei tŏk ‘lơ̆ng ƀiơ̆ pơting hăm adrol sơ̆. Rim hnam adrin jang xa, ưh pă đei đon gô chang, gơnang yoa, xa hơpăh tơdrong tơgŭm đơ̆ng teh đak nhen adrol sơ̆ bơih. Muk drăm roi tŏk, đon hlôh vao, đon tơnăp hăm tơpôl, hăm pơlei pơla roi tŏk ‘năi. Tơdrong jang vang pơjing tơring tơrang ‘nao đei ƀôh, hlôi păng tŏk bŏk jang kiơ̆ ‘lơ̆ng lơ̆m đĭ đăng kon pơlei.

Kră pơlei K’Lèn chơt hơiă pơma: “Đơ̆ng đei jang kiơ̆ KHKT lơ̆m tơdrong jang xa kiơ̆ trong choh jang hăm kơmăy kơmŏk, mŭk drăm kơ kon pơlei tŏk ‘lơ̆ng ƀiơ̆ kơ adrol sơ̆ tơpă. Tơdrong arih xa roi tơplih, roi đei ƀôh, đon hlôh vao, đon jang tơnăp, vang bơ̆ jang hăm khul kơdră pơgơ̆r pơjing pơlei pơla pơdrŏng ‘lơ̆ng rŏ hlôi đei kon pơlei jang kiơ̆ tôch ‘lơ̆ng. Bu bu kŭm kơchăng hŏk iŏk dôm tơdrong ‘lơ̆ng đơ̆ng KHKT vă jang xa, jang pơm pơdrŏng vă đei tơdrong arih xa hiôk jơnap ƀiơ̆”.

Ƀok Nguyễn Văn Khanh, Phó Bí thư chĕp kơ̆l Đảng xăh Hiệp An tơroi, tơdrong ‘nâu sư tơƀôh đon tơplih tôch hơiă đơ̆ng kon pơlei K’ho pơma hơdrô̆, kon pơlei lơ̆m xăh pơma atŭm. Yoa đơ̆ng hlôh vao, gơ̆h choh jang hăm kơmăy kơmŏk ‘nao, băt năng kăl truh tơmam jang đei kiơ̆ hla ar pơkăp răt, kơna mă tơƀâp tơdrong pơmat tat atŭm đơ̆ng mŭk drăm rơhyŭng rơhyăng, kơjă tơmam yoa tŏk hlŏh tơdrong ră, mă lei iŏk yoa đơ̆ng kon pơlei tơ̆ Hiệp An oei sơđơ̆ng ‘lơ̆ng. Gơnơm thoi nŏh, dôm tơdrong hơgăt gĭt kăl lơ̆m tơdrong jang atŏk tơiung mŭk drăm, tơpôl, tơdrong hơgăt pơjing tơring tơrang ‘nao đei ƀôh đơ̆ng xăh oei jang đei lăp hăm tơdrong hơgăt đĕch.

“Pơjing tơring tơrang ‘nao đei ƀôh ‘nŏh xăh tơlĕch jang păng iŏk đei tơdrong tơgŭm đơ̆ng kon pơlei tôch dêh. Kon pơlei hlôh vao hơdăh tơdrong ‘nâu păng adrin jang atŏk tơiung mŭk drăm, tơpôl, jŏh ayŏ kơ dŏ xoang đei tŏk ‘lơ̆ng. Mă đơ̆ng sơnăm ‘nâu mŭk drăm pơma tat, mă lei tơdrong arih xa găh mŭk drăm đơ̆ng kon pơlei oei sơđơ̆ng đĕch, anih jang, trong nơnăm đei man hơmet roi ‘lơ̆ng. Dôm tơdrong hơgăt mă tơring tơlĕch truh dang ei jang đei ngăl. Lơ̆m sơnăm 2023 xăh đĭ jang đei tơring tơrang ‘nao đei ƀôh bơih”.

Kŭm hăm tơdrong pran ‘lơ̆ng đơ̆ng choh jang xa hăm kơmăy kơmŏk ‘nao, xăh Hiệp An oei đei lơ tơdrong ‘lơ̆ng vă atŏk tơiung chă tơmang lăng păng tĕch mơdro dơ̆ng, mưh oei ƀât anih tôch ‘lơ̆ng, jĭ ‘măng jang mât lĕch găh Pơbăh kơ plt Đà Lạt, dêh char Lâm Đồng hăm lơ anih chă tơmang lăng tih, ‘lơ̆ng rŏ dar dĕh đei pơjing, jang tŏk. ‘Nâu jĭ dôm tơdrong ‘lơ̆ng vă xăh Hiệp An hơnơ̆ng tơplih ‘nao, jang tŏk pran rim năr.