Pơgê (28/10), Dơnŏ anĭh vei lăng kon pơlei dêh char Lâm Đồng pơgơ̆r pơm lêh tơbăt hơdăh apŭng Lâm Hà-tơring jang mŭk drăm ‘nao Hà Nội tơ̆ Lâm Đồng iŏk đei jing tơring tơrang ‘nao păng sơng iok Mê đai jang pran kơtang dơ̆ng mă Pêng.

Sơng iŏk Mê đai jang pran kơtang dơ̆ng mă Pêng đơ̆ng Kơdră chĕp pơgơ̆r tĕh đak pôk ăn apŭng Lâm Hà

Hlŏh 35 sơnăm tơ iung pơjing păng atŏk tơ iung, 10 sơnăm jang kiơ̆ Tơdrong jang Tĕh đak tơ iung pơjing tơring tơrang ‘nao, apŭng Lâm Hà-tơring jang mŭk drăm ‘nao kơ kon pơlei Hà Nội tơ̆ groi tĕh Lâm Đồng hlôi atŏk tơ iung tôm tong lơ̆m rim tơdrong jang. Trŭh dang ei, jang sa iok đei jô̆ hơtŏ măt bơngai hlŏh 52 trĭu hlak jên lơ̆m 1 sơnăm, tŏk hlŏh 2,5% pơtêng hăm 10 sơnăm hơdrol; ŭnh hnam dơnŭh tơjur kơtang dang ei lăp pă 1,68%; 100% tơring iŏk đei jing tơring tơrang ‘nao; jing apŭng mă 5 kơ dêh char Lâm Đồng đei Thủ tướng Tĕh đak drơ̆ng nơ̆r ‘nŏh apŭng iŏk đei jing tơring tơrang ‘nao jăl jang 2016 – 2020; păng đei Kơdră chĕp pơgơ̆r tĕh đak pôk ăn Mê đai jang pran kơtang dơ̆ng mă Pêng. Hrei au, lơ̆m dêh char Lâm Đồng hlôi đei 107 lơ̆m 111 tơring iŏk đei jing tơring tơrang ‘nao, 2 pơlei tơm jang keh đang tơdrong jang tơ iung pơjing tơring tơrang ‘nao păng 5 apŭng đei drơ̆ng nơ̆r jang keh đang jing tơring tơrang ‘nao.