Ƀok Đinh Đăm - Kră pơlei kơ pơlei Kon Sơ Nglok, tơring Hà Đông, apŭng Đak Đoa, dêh char Gia Lai tơroi akhan: Tơring Hà Đông lơ̆m chăl tơblăh vang sơ̆ pơngot rơvĕt tơngiĕt găng dơnuh hin tôch kơ dêh, kơ ‘nhŏ mĭnh pơnhan por jei ưh kơ đei. Mă lei mư̆h đei krao hơvơn iung tơblăh, bu bu jei mĭnh jơhngơ̆m đon kơrŭn jơhngơ̆m atŭm hăm kĕch mang bơ̆n iŏk đei jơnei.

Sơnăm ‘nŏh sơ̆, Kon pơlei tơ̆ tơring tôch hơdrin jang sa vă đei phe sa ƀa sŏng, ‘nhot sa tơgŭm ăn ‘măng iung tơblăh. Mĭnh ŭnh hnam mĭnh pơnhan phe, ŭnh hnam ayơ đei lơ ‘nŏh tơra lơ vă tơgŭm ăn ƀô̆ đô̆i bơ̆n. Kon pơlei bơ̆n mă đơ̆ng pơngot rơvĕt ră mă lei chă sa bơ̆n ƀum au to hơdrin ư̆h kơ lê̆ ƀô̆ đô̆i bơ̆n pơngot rơvĕt vă đei jơhngơ̆m iung tơblăh pran kơtang hlŏh. Ƀok Đinh Đăm hơdơ̆r dơ̆ng:“Kon pơlei bơ̆n kơtơ̆ng đei kang ƀô̆ bơ̆ jang lơ̆m tơring pơgơ̆r hop akŏm, vang chă pơma dơnŭh trong pơm rơngei ăn teh đak vă hơnhăk đei tơdrong erĭh sa phĭ tơtŏ dơno ‘lơ̆ng dơ̆ng kơ jăp ‘nŏh rim răih bơngai năm ngăl. Kon pơlei ư̆h kơ hrơ̆ng erĭh sa lơ̆m tơpang ti ayăt pơgŏ pơđep, teh dong kon pơlei, hơpơi đei tơdrong erĭh sa rơngei hiôk hian kơna kon pơlei bơ̆n kiơ̆ kĕch mang, vang tơgoăt tơgoăl mĭnh nơ̆r ƀơ̆r đon, tơgŭm djru dĭh băl. Chăl dŏh sơ̆, khul ayăt tôch chư̆ kơnê̆, rôp, teh dong kon pơlei, tơtông klĕ bơ̆n nhŭng iĕr kơna kon pơlei bơ̆n tôch kơ blĕch, tôch hơreh.”

Oei lơ̆m groi tĕh thŭng mơmat tat, Hà Đông tơpă đei trong tơplĭh ‘nao mư̆h sơng iŏk đei tơdrong lăng ba kơ jăp đơ̆ng Đảng păng Teh đak ‘măn ăn kon pơlei kon kông. Gơnơm đơ̆ng nŏh, jăl trong nơnăm đơ̆ng tơring Đak Sơ Mei trŭh tơ̆ tơring Hà Đông lơ̆m sơnăm 2015 ‘nŏh mĭnh lơ̆m dôm trong kăl hlŏh tơgŭm ăn Hà Đông atŏk tơ iung. Lăp đunh kơ au 2 sơnăm, đơ̆ng kon jên bơ̆ jang teh đak, gơng hơneh pơgia kơ pơlei hlôi đei tơplĭh hăm gơng man kơjung 100met, să 3 met, yak hlŏh klŏh klĕch hiôk hian trŭh 5 pơlei dih băl. ‘Nhŏng Đinh Nhưc, oei tơ̆ pơlei Ma Har, tơring Hà Đông chơt hơ iă pơma:“ Sơ̆, trong, gơng ư̆h kơ đei chă yak mơmat tat. Dang ei hlôi đei gơng ‘lơ̆ng, tơdrong chă yak vih vơ̆t, chơ tơmam drăm chŏh jang sa kơ kon pơlei hlôi hiôk hian bơih. Đe kôn mon kon sau lơ̆m pơlei năm hŏk jei ƀônh kơ trŭh, trong rơgŏh ‘lơ̆ng, bơnê kơ Đảng păng Teh đak lăng tông nông gia ăn tơring tơnap tap nhen nhôn au”

Sơ̆, kon pơlei oei lơ̆m tơring Hà Đông lăp băt jang mir kông ư̆h kơ gan plei lơ. Hrei au, kon pơlei hlôi băt jang chŭn na ƀa đak 2 pơyan. Atŭm hăm ‘nŏh, kon pơlei lơ̆m tơring hlôi băt chă pơtăm ‘long tơƀăr, chehphe, jang kiơ̆ khoa hŏk kih thuơ̆t lơ̆m chŏh jang sa, rong kon tơrong vă atŏk tơ iung mŭk drăm ŭnh hnam. Dang ei, pơma trŭh “bơngai pơdrŏng” kơ bơngai Bahnar Đinh Hùng oei tơ̆ pơlei Kon Sơ Nglok, kon pơlei lơ̆m pơlei bu jei lui tơpă kơ yuơ ‘nhŏng sơnăm oei mơlôh ră mă lei băt chă jang sa păng ngăl tơgŭm djru rim bơngai dơ̆ng. Hrei au, Đinh Hùng tok bŏk đei 4ha chehphe hlôi đei plei, 5ha ‘long keo, 3 ha ‘long hơmal jang sa iŏk đei hlŏh 300 trĭu hlak jên lơ̆m sơnăm. Đơ̆ng ŭnh hnam oei dơnuh mơmat tat, trŭh sơnăm 2019, Đinh Hùng hlôi jing bơngai jang sa hơgei hlŏh lơ̆m tơring. ‘Nhŏng Đinh Hùng tơroi:“Sơ̆ kon pơlei bơ̆n lăp băt jang mir ƀa đĕch mă lei đơ̆ng rŏng au đei hŏk pơhrăm pơtăm ‘long keo, chehphe jang kiơ̆ khoa hŏk. Hơdrô̆ ‘long hơmal ‘nŏh bơ̆n đei Dơnŏ anĭh Đảng tơring păng kơdră tơring lăng ba ăn năm hŏk pơhrăm đe jang sa tơ̆ tơring Đak SơMei. Lăp đơ̆ng rŏng pơtăm kơ loăi ‘long au ba ƀô̆h hơ iă păng ba jei chă pơtho ăn kon pơlei bơ̆n vang jang kiơ̆”

Ƀô̆h hơdăh dôm tơdrong tơplĭh ‘nao kơ tơring Hà Đông ‘moi kiơ̆ rim sơnăm, ƀok Hoàng Cam, Bí thư Đảng tơring Hà Đông tơbăt: Tơdrong erĭh sa kơ bơngai Bahnar tơ̆ tơring Hà Đông trŭh dang ei mă đơ̆ng oei tơnap tap ră mă lei hlôi tơplĭh kơtang pơtêng hăm chăl sơ̆. Đei tơdrong lăng ba đơ̆ng rim hơnĭh, khŭl kơdră tơring, ŭnh hơyŭh trong hnam pơgang hlôi đei tơ iung pơjing ming man ‘lơ̆ng hlôi tơgŭm hơ iă ăn tơdrong hơpơi ‘mĕh vă kơ kon pơlei. Đơ̆ng mĭnh tơring tơnap tap kơna jang kiơ̆ Tơdrong jang Teh đak tơ iung pơjing Tơring tơrang ‘nao, tơring Hà Đông hrei au lăp jang keh đang 9 lơ̆m 19 trong pơkăp jang. Jang sa iŏk đei jô̆ hơtŏ măt bơngai lơ̆m sơnăm 2022 ‘nŏh hlŏh 11 trĭu hlak jên. Khei năr kơnh, vă tơgŭm ăn Hà Đông atŏk tơ iung hlŏh dơ̆ng, Khŭl kơdră chĕp pơgơ̆r Đảng, Kơdră tơring păng apŭng Đak Đoa jei tơlĕch lơ trong jang vă ba Hà Đông atŏk tơ iung hlŏh dơ̆ng.“ Tơring tŏk bŏk kĭ pơkăp vă tơlĕch jang tơdrong jang teh đak găh atŏk tơ iung mŭk drăm tơpôl tơring kon kông adoi nhen Tơdrong jang Teh đak tơjur dơnuh. Dang ei tŏk bŏk đei tơdrong vă jang hơmet ming pơjing pơlei oei sa sơđơ̆ng dơ̆ng kơjăp ăn 5 pơlei, pơjing pơlei hle dơ̆ng. Tơ̆ au ‘nŏh đei tơ iung pơjing ming man bơ̆n ŭnh hơyŭh, trong nơnăm, đak sŏ nhăn vă kon pơlei rĭ hnam oei hơtăih dĭh băl đei pơgar să păng rim jơhnơr đơ̆ng rŏng năm oei tơ̆ au. Pơjing đei jơhngơ̆m pran ăn atŏk tơ iung tơring, pơjing tơdrong erĭh sa kon pơlei sơđơ̆ng dơ̆ng kơjăp, xut xa pơngot rơvĕt tơjur dơnŭh, tơgŭm ăn kon pơlei atŏk tơ iung”

Năm tơ̆ Hà Đông hrei au, gô ƀô̆h hơdăh dôm tơdrong tơplĭh ‘nao tơ̆ tơring kăn kư̆ kĕch mang au hăm dôm pơbŭng hnam ming man ‘nao, chŭn na ƀa đak ƀlĭk ƀlăk, dôm mir pơgar chehphe jing ‘lơ̆ng. Atŭm hăm tơdrong lăng ba kơjăp đơ̆ng Đảng păng Teh đak ‘moi kiơ̆ rim Tơdrong jang Teh đak găh tơjur dơnŭh hin, kon pơlei oei lơ̆m tơring teh nuih mơng hơnơ̆ng vei kơ jăp tơdrong joăt joe sơ̆ ji, kơrŭn jơhngơ̆m lơ̆m chăl hle păng roi năr roi atŏk tơ iung hlŏh dơ̆ng.