Sơnăm 1993, đơ̆ng rŏng năm pơm ƀô̆ đô̆i đang brŏk tơ̆ tơring, ƀok Y-Tuyên Ƀuôn Krông oei tơ̆ plei Drai H’Ling, xăh Hòa Xuân, pơlei tơm Buôn Ma Thuột, dêh char Dak Lak hlôi hơdrin vang jang dôm tơdrong jang tơpôl lơ̆m dôm anih jang Đoàn hơdruh tơdăm, Khŭl lĭnh so tơ̆ tơring. Truh sơnăm 2015, ƀok đei pôk pơm Phŏ bí thư Chi bộ, Bơngai pơgơ̆r pơlei plei Drai H’Ling.

Lơ̆m 30 sơnăm bơ̆jang tơdrong jang tơpôl, ƀok Y-Tuyên Ƀuôn Krông jing gơng tơƀưh hơnhăk trong jang đơ̆ng Đảng, tơdrong jang tơgŭm, khôi luơ̆t đơ̆ng teh đak truh jê̆ ƀiơ̆ hăm kon pơlei Ê Đê tơ̆ xăh Hòa Xuân pơma atŭm păng plei Drai H’Ling pơma hơdrô̆. Mă đơ̆ng tơ̆ tơdrong jang hơyơ, ƀok kŭm ưh kơ ‘nhoen mơmat tat, năm rim trong, tơteh rim hnam vă tơroi tơbăt, krao hơvơn kon pơlei jang kiơ̆ ‘lơ̆ng trong jang tơgŭm đơ̆ng Đảng păng teh đak. Ƀok Y-Tuyên Ƀuôn Krông tơroi:

“Tơ̆ plei Drai H’Ling kơ sô̆ kon pơlei găh lơ ‘noh bơngai Ê Đê đei hloh 93%, hŏk chư ưh kơ hơ tŏ băl. Hăm đĭ jơhngơ̆m, ĭnh ling lang krao hơvơn kon pơlei lơ̆m pơlei pơla pơm kiơ̆ trong jang păng tơdrong tơgŭm đơ̆ng Đảng păng Teh đak tơlĕch ăn. Lơ̆m khei ‘năr âu ki, kon pơlei kŭm pơm kiơ̆ ‘lơ̆ng pơtêng hăm sơnăm hơdrol kơna ĭnh ƀôh tôch kơ chhôk ‘nă.”

Ƀok Y-Tuyên Ƀuôn Krông tơbăt, sơ̆ kon pơlei lơ̆m pơlei oei chĕp vei lơ tơdrong joăt so ưh kơ ‘lơ̆ng, tơdrong iŏk ŭnh om, kơ nê̆ hơkâu đa pơgơ̆r lơ năr, pơm ăn hiach lơ; oei tơdrong joăt pŭ pơ nŭ ‘mưh chă klo iŏk lơ tơmam.... Ƀok đa hơnơ̆ng truh tơ̆ rim hnam kon pơlei vă pơma dơnuh, băt hơdăh jơhngơ̆m đon ‘meh vă păng tơroi tơbăt vă hơtŏk ‘lơ̆ng đon hlôh vao, hŭt lê̆ dôm tơdrong joăt so ưh kơ ‘lơ̆ng lĕch đơ̆ng tơdrong arih sa tơpôl. Hơdai hăm ‘noh, ƀok Y-Tuyên Ƀuôn Krông hơdrin tơroi tơbăt tơgŭm kon pơlei tơplih đon tơchĕng jang sa, pơ̆n tơmơ̆t jên jang hơtŏk tơiung mŭk drăm. Yă H’I Ƀuôn Yă (đa krao ‘noh Amĭ Bảo) – kon pơlei lơ̆m pơlei tơroi, kon pơlei ling lang ‘mêm kơ eng păng hŏk pơhrăm jang kiơ̆ ƀok Y-Tuyên Ƀuôn Krông yua kơ jơhngơ̆m đon hơdrin, đĭ jơhngơ̆m hăm pơlei pơla:

“Ama Hà pơm bơngai pơgơ̆r pơlei nhôn đunh dêh bơih. Mưh đei dôm trong jang đơ̆ng Đảng păng teh đak tơlĕch ăn ‘noh ƀok ling lang roi tơbăt tơblang hơdăh ăn kon pơlei; mưh đei trong jang tơplih, asong hơdrĕch ‘long pơtăm ling lang tơ tă kơ kon pơlei hŏk pơhrăm păng iŏk hơdrĕch ‘long. Kon pơlei nhôn ‘măn lơ tơdrong ‘mêm kơeng kơ bơngai pơgơ̆r pơlei dêh.”

Ƀok Y-Niwa Ƀuôn Yă, Phŏ Kơdră Anih vei lăng kon pơlei xăh Hòa Xuân, pơlei tơm Ƀuôn Ma Thuôt, dêh char Dak Lak tơbăt Y-Tuyên Ƀuôn Krông jĭ 1 đảng viên pơm jŭk yŭk trong hơlâu. Hăm hơnăp jang ‘noh jĭ  Bí thư Chi bộ pơm hloi bơngai pơgơ̆r pơlei plei Drai H’Ling, Y-Tuyên Ƀuôn Krông ling lang iung jang hơdrol lơ̆m rim tơdrong jang. Đơ̆ng sơnăm 2016 truh dang ei, ƀok kŭm hăm chi bộ hlôi krao hơvơn kon pơlei lơ̆m pơlei tơgop dơ̆ng hloh 200 triệu hlak jên păng rơbâu năr jang vă pơm ƀê tŏng ‘lơ̆ng hloh 2 km trong lơ̆m pơlei. Truh dang ei, hloh 85% kơ sô̆ ŭnh hnam lơ̆m pơlei iŏk đei ŭnh hnam oei sa ‘lơ̆ng hơiă, tơdrong ŭnh hnam rơneh kon mă 3 jur lơ, tơdrong arih sa tơmam drăm, jơhngơ̆m đon kon pơlei roi ‘năr roi hơtŏk ‘lơ̆ng. Ƀok Y-Niwa Ƀuôn Yă, Phŏ kơdră Anih vei lăng kon pơlei xăh Y-Tuyên Ƀuôn Krông đei lơ pơcheh hơgei, chă hơlen lăng, tơplih ‘nao trong jang vă hơnhăk tơdrong tơchơ̆t, athei đơ̆ng Đảng lơ̆m tơdrong arih sa yan âu.

“Ƀok Y-Tuyên Ƀuôn Krông hăm hlôh vao 15 sơnăm pơm bơngai pơgơ̆r pơlei pơm hloi phŏ bí thư chi bộ kơ plei Drai H’Ling păng kŭm jing bơngai đei kon pơlei pôk ‘noh jĭ bơngai đei đe lui yom đĭ 10 sơnăm kơ âu. hăm hơnăp jang ‘noh bơngai pơgơ̆r pơlei, pơm hloi phŏ bí thư chi bộ kơ pơlei, sư hlôi ưh kơ đei pơdơh pơm jŭk yŭk trong hơlâu lơ̆m tơdrong jang pơjing tơring tơrang ‘nao, hơdai hăm tơroi tơbăt, krao hơvơn kon pơlei plang song teh vă iŏk teh ming man dôm tơdrong jang pơm trong nơnăm, sư ling lang băt hơdăh ‘noh gơng tơƀưh gĭt kăl đơ̆ng khŭl kơdră hăm kon pơlei.”

Ƀok Y-Tuyên Ƀuôn Krông jĭ 1 đảng viên tôch kơ đei bưng ai, đei jang tơnăp hăm tơdrong jang. Tơdrong hơdrin, đĭ jơhngơ̆m đơ̆ng ƀok hlôi tơgop pơjing grŭp tơgoăt tơgoăl hơdrĕch hơdrŭng, jang kiơ̆ dôm tơdrong jang pơjei băl ‘mêm kơ teh đak, pơtrŭt tơdrong hơtŏk tơiung rim tơdrong đơ̆ng plei Drai H’Ling. Hăm dôm tơdrong hơdrin lơ̆m tơdrong jang, ƀok Y-Tuyên Ƀuôn Krông jĭ đảng viên jang đang hơgei hloh hơnăp jang, jĭ bơngai đei đe lui yom ‘lơ̆ng lơ̆m kon pơlei kon kông.