Lơ̆m lơ sơnăm hơrih sa lơ̆m hnam hiăh hiok, ‘mi hnăt hnot, kial tơhlu hơheo, ŭnh hnam ƀok Siu Hoàng (hơdrung Jarai) oei tơ̆ tơring Ia Mơ, apŭng Chư̆ Prông, dêh char Gia Lai hlôi sơng iŏk đei tơdrong hơpơi ‘meh vă đei mĭnh pơbŭng hnam kơ jăp ‘lơ̆ng, sơđơ̆ng. Mơ̆t oei lơ̆m pơbŭng hnam ‘nao kơ yuơ Ƀô̆ đô̆i vei lăng sơlam teh đak dêh char Gia Lai tơgŭm ming man ăn, ƀok Siu Hoàng chơt hơ iă tơbăt:"Ƀô̆ đô̆i vei lăng sơlam teh đak, Teh đak lăng ba ming man ăn ŭnh hnam nhôn hnam ‘nao. Ŭnh hnam bơ̆n chơt hơ iă dêh”.

Đơ̆ng kon jên chă tơra tơgŭm đơ̆ng kang ƀô̆, ƀô̆ đô̆i atŭm hăm tơdrong vang tơgŭm djru đơ̆ng dôm bơngai đei jơhngơ̆m đon ‘lơ̆ng, Ƀô̆ đô̆i vei lăng sơlam teh đak dêh char Gia Lai hlôi tơ iung pơjing ming man 10 pơbŭng hnam tơgŭm ăn kon pơlei dơnuh oei tơ̆ tơring sơlam teh đak. Mĭnh pơbŭng hnam đei tơgŭm ăn 70 triu hlak jên, ƀô̆ đô̆i vang chă tơgŭm dơ̆ng tơmam drăm ming man păng năr jang, sơđơ̆ng ăn ming man pơbŭng hnam să, kơjăp ‘lơ̆ng hloh.

Đại tá Trần Tiến Hải, Kơdră chĕp pơgơ̆r Ƀô̆ đô̆i vei lăng sơlam teh đak dêh char Gia Lai tơroi tơbăt, tơdrong jang xut xa hnam pơgia, hnam hnăt hnot ưh khan lăp tơgŭm ăn kon pơlei tơ̆ ou đei hnam kơjăp ‘lơ̆ng, sơđơ̆ng hơrih sa mă lei oei tơgop lơ̆m tơ iung pơjing đei jơhngơ̆m đon tơgoăt tơgoăl dih băl ƀô̆ đô̆i hăm kon pơlei sa roi kơjăp hloh dơ̆ng, atŭm dih băl vang vei lăng năng tông kơjăp tơdrong sơđơ̆ng tơ̆ tơring sơlam teh đak."Lơ̆m dôm sơnăm ou ki, nhôn lăng kơjăp tơdrong ‘nou, vă hơvơn tơdrong vang tơgŭm djru đơ̆ng kang ƀô̆, ƀô̆ đô̆i păng rim bơngai đei jơhngơ̆m đon ‘lơ̆ng. Nhôn ƀôh hơnăp jang lăng ba hăm kon pơlei oei tơ̆ tơring sơlam teh đak, vă pôk bơnê ăn jơhngơ̆m đon ‘mêm kơ eng đơ̆ng kon pơlei hăm khul ƀô̆ đô̆i vei lăng sơlam Teh đak”.

‘Nao ou, Hơnih tơm Ƀô̆ đô̆i vei lăng sơlam teh đak hlôi chih pơtruh hla bơar tơchơ̆t pơjao ăn Quân khu 5, Quân đoàn 34, Binh đoàn 15 tơgŭm djru kon pơlei Gia Lai xut xa hnam pơgia, hnam hnăt hnot. ‘Moi kiơ̆ dôm tơdrong yan ou, rim hơnih ƀô̆ đô̆i mĭnh păh tơgŭm djru kon pơlei ming man ‘nao, ming hơmet hnam oei, mĭnh păh jang kiơ̆ kơ jăp tơdrong bơ̆ jang păng sơđơ̆ng kơtang. Đei băt, hơdrol đei tơdrong jang xut xa hnam pơgia, hnam hnăt hnot lơ̆m teh đak, Khul ƀô̆ đô̆i jei hlôi đei tơdrong jang tơgŭm ăn kon pơlei pơm hnam oei. Kiơ̆ hla bơar chih tơbăt, 5 sơnăm ou ki, Binh đoàn 15 hăm Quân đoàn 34 hlôi jang hơdoi hăm kơdră chĕp pơgơ̆r Đảng, Kơdră chĕp pơgơ̆r tơring, dăr lăng, tơ iung pơjing ming man, ming hơmet păng pơjao ăn hloh 1.000 pơbŭng hnam ăn rim ŭnh hnam dơnuh lơ̆m dêh char Gia Lai, Kon Tum. 

Ou ki, tơdrong pơgơ̆r “Khei Pêng sơlam teh đak" jei đei pơgơ̆r tơ̆ apŭng sơlam teh đak Đức Cơ, dêh char Gia Lai, hăm lơ tơdrong jang ‘lơ̆ng hơ iă, lơ̆m ou đei tơdrong jang tơgŭm ăn kon pơlei xut xa hnam pơgia, hnam hnăt hnot. ‘Nhŏng Đỗ Đức Thanh, Kơ iĕng Bí thư Đoàn dêh char Gia Lai tơbăt:“Nhôn jei pơrô̆ pơrôp tơgum djru ming hơmet hnam oei, vang iung jang tơdrong jang xut xa hnam pơgia, hnam hnăt hnot tŏk bŏk tơlĕch jang. Tơdrong pơgơ̆r sơnăm ou ‘ngoăih tơdrong vang iung jang hơdoi đơ̆ng rim hơnih bơ̆ jang kơ pơlei tơm Hồ Chí Minh ‘noh jei hlôi sơng iŏk đei tơdrong vang iung jang đơ̆ng rim hơnih bơ̆ jang lơ̆m dêh char, hloh đơ̆ng ou ƀôh hơdăh tơdrong lăng ba đơ̆ng rim hơnih jang, rim bơngai ‘meh vă tơgop ăn pơlei pơla, tơ iung pơjing pơlei pơla roi năr roi pơdrŏng pran kơtang”.

Truh dang ei, dêh char Gia Lai hlôi ming man ‘nao păng ming hơmet hloh 2.000 pơbŭng hnam găh lơ̆m Tơdrong jang Xut sa hnam pơgia, hnam hnăt hnot. Hăm trong tơlĕch jang ming man hloh 8.400 pơbŭng hnam ăn rim ŭnh hnam tơnap tap hơdrol pơyan ‘mi sơnăm ou, Gia Lai hlôi chă hơvơn lơ khul vang iung jang. Lơ̆m ou, mĭnh hơnih mơdro sa hlôi tơgŭm djru ‘moi kiơ̆ Hơnih mong jên “Kơ yuơ bơngai dơnuh” dêh char hloh 10 ti hlak jên; Hơnih tơm Kŏng ang jei hlôi tơgŭm ăn hloh 201 ti hlak jên păng Hơnih vei lăng kon pơlei dêh char Gia Lai hlôi klăh asong ăn 211 ti hlak jên. Hơnih vei lăng kon pơlei rim apŭng, thĭ xah, pơlei tơm đei pơjao iung jang hơdoi hăm Hơnih bơ̆ jang MTTQ Việt Nam dêh char sơng iŏk păng tơlĕch kon jên tơpôl tơgŭm djru, hrôih keh đang tơdrong jang xut xa hnam pơgia, hnam hnăt hnot lơ̆m dêh char. Kơ iĕng Kơdră chĕp pơgơ̆r Hơnih vei lăng kon pơlei dêh char Gia Lai, yă Nguyễn Thị Thanh Lịch tơbăt:“Nhôn tơchơ̆t iung jang hrơ̆p mĭnh ‘măng hloi, glăi tơ̆ yơ hơmet tơ̆ noh. Nhôn kơrŭn đĭ ai iung jang tơdrong jang ou. Kiơ̆ kơ ‘noh, ‘ngoăih kon jên teh đak klăh asong ăn, dêh char Gia Lai jei chă hơvơn rim khul đơ̆ng khul ƀô̆ đô̆i, kon pơlei păng hơnih mơdro sa vă atŭm dih băl tơ iung pơjing ming man hnam ‘lơ̆ng liĕm kơjăp ‘lơ̆ng hloh dơ̆ng ăn kon pơlei. Dêh char Gia Lai tơlĕch ăn, hơdrin đĭ ai truh khei 6/2026 gô jang keh đang xut xa hnam pơgia, hnam hnăt hnot lơ̆m dêh char.”