Ƀok Ka Phu Beng jĭ bơngai Cơ Tu tơ̆ xăh Cà Dy, apŭng Nam Giang, dêh char Quảng Nam. Dang ei jing unh hnam đei iŏk yoa kơjăp bơih mă lei ƀok oei ưh kơ hiơt dôm năr pơmat tat adrol sơ̆, klo kăn ƀok choh jang hơnơ̆ng ưh đei pơdơ̆h kiơ mă lei tơdrong arih xa oei kơƀăh kơƀôch hơnơ̆ng đech.

Mơ̆ng nơ̆r kăn ƀô̆ xăh krao hơvơn păng pơtho tơƀôh trong jang xa, ƀok năm tŏk iŏk 50 triu hlak jên đơ̆ng Anih mong jên tơgŭm tơpôl vă pơtăm hơmet ming pơgar ‘long, pơtăm ‘long xa plei, pơtăm ‘long bri, dar dĕh pơih xă tơdrong rong kon tơrong. Dang ei, ƀok Ka Phu Beng đei rơih jĭ bơngai jang choh jang xa rơgei tơ̆ apŭng:  “Unh hnam nhôn rong 6 tŏ rơmo yŏng, khei âu ki tĕch 2 tŏ, 7 triu 1 pôm. Iŏk đeo truh 80 triu 1 sơnăm. Unh hnam pơtăm ‘long xa plei tĕch kŭm pôm păi mơ̆n. Dôm anih jang kơpal tơ̆ apŭng Nam Giang pơtho tơƀôh trong jang, ki thuơ̆t vei rong, rei pơtăm. Pơtho tơƀôh ăn lơ unh hnam kon pơlei tơ̆ tơring jang kiơ̆. Dôm tơdrong iŏk yoa đơ̆ng pơtăm ‘long bri, rong kon tơrong, tơgŭm ăn unh hnam nhôn jang xa roi đunh roi tŏk, klăih đơ̆ng tơnuh hin. Đơ̆ng noh, unh hnam man đei hnam, rong 3 ‘nu kon hŏk hăm Đăi hŏk”.

Apŭng Nam Giang đei dang 80% kơsô̆ kon pơlei ‘nŏh jĭ bơngai kon kông. Tơ̆ apŭng đei 200 trong jang kon pơlei jang pơgar xă hơdai hăm choh jang-pơtăm ‘long, atŏk tơiung mŭk drăm hơdai kiơ̆ grup unh hnam, tơplih ming ‘long pơtăm, rong kon tơrong. Lơ unh hnam kon pơlei đei iŏk yoa kơjăp đơ̆ng dôm jĭt triu truh 2,3 hrĕng triu 1 sơnăm. Ƀok Châu Văn Ngọ, Phŏ Kơdră vei lăng kon pơlei apŭng Nam Giang ăn tơbăt: Đơ̆ng dôm kơsô̆ jên tơgŭm đơ̆ng teh đak păng dêh char, ‘ngoăih kơ tơlĕch jên man anih jang, pơm trong, apŭng Nam Giang vang tơgŭm ăn kon pơlei pơjing lơ trong jang xa lăp hăm rim tơdrong đei tơ̆ tơring, tơgŭm đe sư pơm hơtŏk iŏk yoa. Dang ei kơsô̆ unh hnam tơnuh tơ̆ apŭng Nam Giang đĭ jur pă 25%. Jô̆ păh lăp rim sơnăm, kơsô̆ unh hnam tơnuh jur hlŏh 8%.

“Kiơ̆ tơdrong tơgŭm tơmât jên jang đơ̆ng teh đak kŭm nhen mong akŏm jên lơ̆m tơpôl, apŭng Nam Giang tơlĕch bơ̆ jang lơ tơdrong jang tơ̆ tơring. ‘Ngoăih kơ tơlĕch jên man anih jang, pơm trong vă pơyoa ăn tơdrong choh jang xa păng arih xa, ‘nŏh oei tơgŭm ăn tơdrong jang xa, arih xa kơ kon pơlei hai, mă loi jĭ dôm unh hnam tơnuh, vă jê̆ tơnuh, unh hnam ‘nao klăih đơ̆ng tơnuh vă tơgŭm ăn kon pơlei gơ̆h tŏk klăih đơ̆ng tơnuh hin kơjăp ‘lơ̆ng. Lơ̆m noh, đei lơ trong jang atŏk tơiung tơdrong jang xa kiơ̆ đơng jang hơdoi, pơm hơtŏk kơjă tơmam hăm anih tĕch mơdro. Kơlih thoi noh mă gơ̆h tơgop ‘lơ̆ng ăn tơdrong jang tơjur tơnuh hin, pơjing tơring tơrang ‘nao.”

Dôm tơdrong jang tơm kơ teh đak, mă loi jĭ tơdrong jang tơjur tơnuh hin kơjăp ‘lơ̆ng vang tơgŭm ăn rơbâu unh hnam kon pơlei tơ̆ tơring kon kông, tơring hơtăih yăih, tơring groi kông kơ dêh char Quảng Nam đei tơgŭm găh trong jang xa, ƀơk bơ̆n hơdrĕch, tơđăh ‘long, pơtho tơƀôh ki thuơ̆t rei pơtăm, rong kon tơrong, tơgŭm ăn đe sư pơih xă trong jang xa.

Ƀok Hồ Quang Bửu, Phŏ Kơdră vei lăng kon pơlei dêh char Quảng Nam ăn tơbăt: “Dôm tơdrong jang tơm đơ̆ng Trung ương kŭm nhen jên jang đơ̆ng dêh char vang tơgŭm ăn kon pơlei tơ̆ tơring kon kông kơ dêh char Quảng Nam, đei yoa tôch ‘lơ̆ng, pơm tơplih um ai, trong jang tŏk mŭk drăm tơpôl tơ̆ tơring groi kông. Hrei ‘nâu, nhôn oei pơtho tơƀôh pơih xă dôm trong jang âu, pơthoi yơ vă lơ unh hnam kŭm nhen khul tơpôl, mă loi ‘nŏh tơ̆ tơring groi kông jang kiơ̆ ‘lơ̆ng dôm trong jang ‘nâu. Đơ̆ng noh vang tơgop ăn tơdrong pơm hơtŏk iŏk yoa, tơjur tơnuh hin kơjăp ‘lơ̆ng”./.