Ƀok Nguyễn Văn Bang, Kơdră chĕp pơgơ̆r Kŏng ty Nhất Bang, pơlei tơm Pleiku ƀôh hơdăh, trong ‘nao kăl hloh kơ Tơdrong tơchơ̆t ‘noh hlôi pơchoh trong hơmet pơ ‘lơ̆ng trong mơdro sa kiơ̆ trong tơpăt ‘lơ̆ng, sơđơ̆ng păng ‘lơ̆ng hơ iă hăm hơnih mơdro sa. Mă hơdăh, tơdrong tơjur tŏ sĕt bơ̆ jang dăr lăng hơnih mơdro sa jur pă ưh kơ hloh 1 ‘măng lơ̆m sơnăm, atŏk kơtang jang kiơ̆ tơplih kơsô̆, dă ƀiơ̆ năm dăr lăng kơtă păng xek tơlang dôm tơdrong pơm mơmat tat đei tơpôl hơnih mơdro sa lăp đon kơtang.

Tơdrong tơplih đơ̆ng tơdrong năm dăr lăng hơdrol jing dăr lăng đơ̆ng rŏng, xut hŭt trong găn ga lơ̆m tơchă hơnih tĕch răt gô pơih trong ‘lơ̆ng hơ iă hloh ăn hơnih mơdro sa. Mă kăl tơdrong tơgŭm djru kon jên cheh ăn rim tơdrong jang rơgoh ‘lơ̆ng, ưh kơ thuê̆, tơjur thuê̆ ăn hơnih mơdro sa pơjing tơdrong jang tơchăr, păng pơtôch kon jên thuê̆ rim sơnăm đơ̆ng sơnăm 2026. Ƀok Nguyễn Văn Bang hôn bơnê kơtang rim trong jang xek tơlang dôm tơdrong pơm glăi kiơ̆ trong tơchơ̆t yoch păh ai tơplih ăn pơlăp tơdrong yoch kơtang, ưh tơkêng hơlơ̆k dơ̆k dôm tơdrong so, vei lăng năng tông mŭk drăm trŏ lăp kơ hơnih mơdro sa mă Tơdrong tơchơ̆t 198 hlôi pơma hơdăh.“Hăm trong pơkăp jang nhen hrei ou, ĭnh lui, kon jên jang kơ rim hơnih mơdro sa păh ai păng iĕ, mă kăl ‘noh hơdruh tơdăm pơjing tơdrong jang, gô đei hơmet pơ ‘lơ̆ng kơtang. Ĭnh lui akhan, mŭk drăm kơdih ŭnh hnam gô atŏk tơ iung kơtang kơ yuơ đei Đảng, Teh đak lăng ba kơ jăp păng rim hơnih jang ăn tŏk iŏk jên, hơnih mong jên gô pơjing rơvơn vă hơnih mơdro sa gơh chă tŏk iŏk jên tĕnh koăng păng rơvơn hloh.”

Tơdrong tơchơ̆t 198 tơƀôh hơdăh tơdrong lăng ba kơjăp đơ̆ng Đảng, Teh đak hăm tơdrong jang mŭk drăm kơdih ŭnh hnam, lăng ‘nou jing mĭnh hơyak gĭt kăl hloh lơ̆m chăl hle. Ƀok Phan Thanh Thiên, Kơdră chĕp pơgơ̆r Khul mơdro sa sơnăm mơlôh dêh char Gia Lai, sơkơ̆t hơdăh: ‘Nou jĭ mĭnh tơdrong rơvơn vă khul mơdro sa kơdih ŭnh hnam băt hơdăh. Tơdrong tơchơ̆t 198 tŏk bŏk đei khul hơnih mơdro sa Gia Lai sơng iŏk hăm hơmŏ kơtang. Đe sư lăng ƀôh tơ̆ noh mĭnh nơ̆r pơkăp chinh trĭ kơtang, mĭnh trong pơchoh ăn atok tơ iung đunh đai tai sơnăm păng gloh loi ‘noh mĭnh tơdrong rơvơn vă hơmet pơ ‘lơ̆ng dôm tơdrong tơhlăk tơhlĭn hlôi gei kơjăp prăt khei năr dăr sơnăm ou ki. Mă lei, ƀok Phan Thanh Thiên, Kơdră chĕp pơgơ̆r Khul Bơngai mơdro sa sơnăm mơlôh dêh char Gia Lai akhan, kăl đei hơnăp jang tơchơ̆t hơdăh đơ̆ng khul kơdră chĕp pơgơ̆r rim tơring lơ̆m pơgơ̆r jang kiơ̆, vă hơnhăk ba dôm Tơdrong tơchơ̆t tơpă jing hơyak pran ăn tơdrong atŏk tơ iung kơjăp ‘lơ̆ng kơ mŭk drăm kơdih ŭnh hnam.“Ĭnh chă apĭnh hơpơi ‘meh vă kơdră chĕp pơgơ̆r dêh char lăng ba kơtang hloh dơ̆ng truh hăm khul mơdro sa kơdih ŭnh hnam, adoi nhen khul mơdro sa sơnăm mơlôh Gia Lai. Mă blŭng, rim trong bơ̆ jang, trong jang tơgŭm djru kăl hơdăh, tơpăt, rơhav, tơgŭm ăn hơnih mơdro sa yak truh tĕnh koăng hăm rim tơdrong vă jang, tơdrong pơm hla bơar ou to. Adoi, kăl pơjing rơvơn hloh vă hơnih mơdro sa đei sơng iŏk kon jên jang tơgŭm djru, tơgŭm djru ăn bôl boăl mơlôh lơ̆m trong pơjing tơdrong jang păng atŏk tơ iung hơnih mơdro sa. Atŭm hăm ‘noh tơdrong tơ iung pơjing rim trong jang pơtrŭt mơdro sa, pơgơ̆r pơtho pơjing găh bơ̆ jang chĕp pơgơ̆r, tơplih kơsô̆, vă pơm hơtŏk kĕ pơjei ăn hơnih mơdro sa lơ̆m dêh char”.

Tơdrong tơchơ̆t 198 ‘nao đei Kuô̆k hô̆i pơdrơ̆ng kiơ̆ ưh khan lăp pơih trong ‘nao ăn hơnih jang mŭk drăm kơdih ŭnh hnam Việt Nam, mă oei pơm hơtok loi dơ̆ng jơhngơ̆m đon lui yom păng hơmŏ atŏk tơ iung kơ khul hơnih mơdro sa, mă kăl ‘noh tơ̆ dôm tơring dêh char đei lơ tơdrong đei nhen Gia Lai. Mưh rim trong jang đei atŏk tơ iung kơtang lang să hăm iung jang hloi păng hrơ̆p mĭnh ‘măng đơ̆ng kơdră rim hơnih, tơdrong mơdro sa gô jing tơpăt hơdăh, jơnei hloh, pơjing hơyak blŭng vă mŭk drăm kơdih ŭnh hnam tơpă jing hơyak pran kơtang lơ̆m tơdrong atŏk tơ iung teh đak. Hăm jơhngơ̆m đon hơmet đang ăn tơplih ‘nao, khul mơdro sa Gia Lai tŏk bok vang kơrŭn jơhngơ̆m, mĭnh nơ̆r ƀơ̆r đon vă pơm ăn tơdrong hơmŏ đei jing tơpă, tơgop kơtang lơ̆m tơdrong atŏk tơ iung kơjăp ‘lơ̆ng kơ tơring păng lơ̆m teh đak.