Kiơ̆ Anih vei lăng hơdrĕch kon kông păng tơdrong lui khop dêh char Kon Tum, tơdrong tơm đei dơ̆ng hlŏh 1.300 tŏ hnam hiăh hiok ‘nŏh yoa ƀât jô̆ hơlen blŭng a ki hnam oei ƀôh kơjăp ‘lơ̆ng mơ̆n mă lei yoa đơ̆ng ‘mi kial hơbŭt, đak tơjroh kơna jing hư pơchăh, ưh pă kơjăp ‘lơ̆ng; Tơdrong pơgơ̆r jô̆ hơlen lăng dơ̆ng kiơ̆ tơdrong hơgăt đơ̆ng Anih tơm vei lăng ming man tơlĕch ‘nŏh ƀôh đei dơ̆ng lơ unh hnam kăl đei tơgŭm hnam oei; Khei ‘năr chih hơlen blŭng a ki ưh kơ đunh kơna oei lon 1,2 unh hnam đei xa yoa.

Ưh kơ đei jô̆ hnam hiăh hiok ‘nao đei, jô̆ truh ‘năr 21/5, dêh char Kon Tum hlôi tơgŭm man hnam oei, sut pơđĭ hnam hiăh hiok ăn 2.622 unh hnam, lơ̆m noh man ‘nao đei 2.077tŏ hnam păng pơm hơmet ming 545 tŏ hnam, iŏk đei truh 95% lơ̆m kơsô̆ đĭ đăng 2.752 unh hnam kăl đei tơgŭm man ăn hnam oei.