‘Nâu jĭ 1 păh tôch gĭt kăl lơ̆m trong jang mưh bơ̆ jang tơdrong tơchơ̆t 214 găh hnam hiăh hiok mă dêh char Đắk Lắk oei bơ̆jang. ‘Năr 1/3 truh, dêh char Đắk Lắk vă tơlĕch man hlŏh 4.000 tŏ hnam ‘nao ăn dôm unh hnam tơnuh, unh hnam vă jê̆ tơnuh tơ̆ dêh char. kŏm đĭ đăng jên vă man ‘nao, sut pơđĭ hnam hiăh hiok ‘nŏh hlŏh 342 ti hlak jên.

Dang ei dôm anih jang, tơring tơrang lơ̆m dêh char Đắk Lắk đĭ mong akŏm đei hlŏh 193 ti hlak jên vă bơ̆ jang tơdrong ‘nâu. Dêh char Đắk Lắk oei adrin vă jăh jang kĕh tơdrong sut pơđĭ hnam hiăh hiok tơ̆ dêh char, vang tơgop tơgŭm ăn dôm unh hnam pơmat tat jăh đei tơdrong arih xa sơđơ̆ng ‘lơ̆ng.